Isa 40
40
Ciugo cia kûmanîrîria
1Ngai wenyu arauga atîrî,
“Ûmîrîriani andû akwa,
thiîni mûkamaûmîrîrie!
2Arîriani andû a Jerusalemu na ûvoreri.
Na mûmeere atî ûkomborî ûrîa mararî nîwathira,
na mevia mao nîmoverwa.
Na atî Ngai-Mûnene amaverithîtie kwîgana
nîûndû wa mevia mao monthe.”
3 #
Mat 3.3; Mar 1.3; Joh 1.23 #Luka 3.4-6 Kûrî na mûndû ûranîrîra arî werûrî akiugaga atîrî,
“Thondekani varavara ya Ngai-Mûnene!
Rûngariani njîra ya Ngai wetû werûrî!
4Cianda cionthe nîigeecûrua,
na irîma cionthe na tûrîma tûvaraganue.
Nakuo kûrîa gûtarî kûrûngarû kûrûngarue,
na kûrîa gûtarî kwaraganu kwaraganue.
5Naguo riiri wa Ngai-Mûnene nîûkonanua,
nao andû onthe nîmakawona,
nîûndû Ngai-Mûnene nîke ugîte ûguo.”
6 #
Jak 1.10-11; 1Pet 1.24-25 Kûrî na mûgambo waugire atîrî, “Anîrîra!”
Nanie ngîûria atîrî, “Manîrîre ndûî?”
“Anîrîra atî:
Andû onthe mekariî ta nyaki,
ûthaka wao wîkariî ta maûa marî mûgûndarî.
7Nyaki nîyûmaga namo maûa makavova,
rîrîa rûkûngi rwa Ngai-Mûnene rwavurutana îgûrû rîamo;
nama, andû mekariî ta nyaki.
8Nyaki nîyûmaga namo maûa makavova,
nwatî kiugo Kîam Ngai wetû gîgaatûûra tene na tene.”
9Unûkia îgûrû rîa kîrîma kîraca na îgûrû we Zayuni,
anîrîra ûvoro ûrîa mwaro!
Ugîrîria na vinya we Jerusalemu,
anîrîra ûvoro mwaro.
Ugîrîria na ndûgetigîre na wîre matûûra ma Juda atî:
“Ûyû nîke Ngai wenyu!”
10 #
Isa 62.11; Kûguû 22.12 Taroria Mwathani Ngai-Mûnene nîaûkîte na vinya,
vinya wake nîguo ûrathana,
nîaûka na andû arîa avonoketie na iveo cia andû ake.
11 #
Ezek 34.15; Joh 10.11 Akaarîthia ndîthia yake ta mûrîthi,
agaacokanîrîria tûgondu na njara ciake,
na atûkuue atuigîrîrîte kîthûrirî gîake,
na atongorerie ng'ondu irîa irongithia wa kavora.
Gûtirî kîndû kîngîringithanua na Ngai wa Isiraeli
12Nû wanathima manjî ma îria na rûvî rwake
kana akathima matu na njara ciake?
Nû ûngîvota gwîkîra mûthetu wa nthî gîkomberî,
kana athime irîma na tûrîma na kîthimi?
13 #
Aro 11.34; 1Akor 2.16 Nû ûngîvota kwonereria Roho wa Ngai-Mûnene ûrîa agwîka,
kana kûmûtaara ûrîa angîka?
14Ngai aavoire ûrîkû kîrîra nîguo ataûkîrwe,
na nû wamûthomithirie njîra ya kîvooto?
Nû wamûthomithirie ûmenyo,
na akîmwonia njîra ya gûtaûkîrwa?
15Kûrî Ngai-Mûnene mavûrûri nîta îtata rîa manjî rîrî ndoorî,
nîta rûkûngû rûrî kîthimirî,
kûrî ke, icîgîrîra nîta rûkûngû rûvinyu.
16Mûtitû wa Lebanoni ndûngiuma ngû mbîganu,
kana nyamû ciakuo ciîgana cia kûmûrutîra îtega rîa kûvîvua.
17Mavûrûri monthe nîta kîndû vatarî mbere yake,
kûrî ke nîta kîndû vatarî.
18 #
Ciîko 17.29
Kwoguo mûngîringithania Ngai na ndûî,
kana nîndûî mûngîmûvuanania nakîo?
19Nwa aringithanue na mûvuanano ûrîa umîtue nî mûndû,
nake mûturi wa indo cia thaavu akaûvaka thaavu,
na akaûgemia na mîkathî ya sîlûva?
20Mûndû ûrîa mûthîni athuuraga mûtî ûrîa ûtangîora.
Nîacokaga agacaria mûndû ûrî na wara wa kumia,
na akamumîria mûvuanano ûrîa ûtangîgwa.
21Anga mue mûtiîcî?
Anga mûtirî mwegua?
Anga mûtierwa kuuma Kîammbîrîria?
Anga mûtianataûkîrwa kuuma rîrîa nthî yaûmbirwe?
22Nthî yaûmbirwe nî ûcio wîkaragîra gîtî gîake Kîam ûnene îgûrû maturî,
na kûrî ke andû arîa matûûraga nthî nîta mvandi.
Ke atambûrûkîtie matu ta gîtambaa,
na agakûnjûra gîtambaa kîu ta îgema rîa gûtûûrwa.
23Ke nîagwîthagia anene a nthî,
na athamaki akamatua kîndû vatarî.
24Wa rîrîa mavandwa na mambîrîria kûmera,
wana matarî aumu mîri ta ûrîa mûtî ûtonyagia mîri mûtheturî,
Ngai-Mûnene angîmavuva na mîvevû nîkwa mavovaga,
rûkûngi rûnene rûmagûrûkagia ta macaki.
25Ûrîa Mûtheru araûria atîrî,
“Nîûrîkû mûngîningithania nake,
kûrî na wîngî wîkariî tanie?”
26Taroriani îgûrû mwone!
Nû waûmbire indo icio cionthe?
Nî ûrîa ûitongoragia ta athigari ake a mbaara,
nîaicî cionthe ûrîa ciîgana,
aciîtaga cionthe na marîîtwa ma cio.
Gûtirî wanarî kîndû kîmwe kîthagîrwa gîtarî vo,
nîûndû Ngai-Mûnene arî vinya nyîngî.
27We Isiraeli njiarwa cia Jakovu, nîndûî gîtûmaga warie,
nîndûî gîtûmaga uuge atî,
“Ngai-Mûnene ndatwîciragia,
na Ngai wetû ndatûtucagîra ciira na kîvooto.”
28Anga mue mûtiîcî?
Anga mûtirî egu?
Ngai-Mûnene nîke Ngai ûrîa ûtûûraga tene na tene,
nîke mûmbi wa indo cionthe cia nthî.
Ke ndathiraga vinya kana anoga,
ûmenyo wake ndûngîmenyeka nî mûndû.
29Nîavecanaga vinya kûrî arîa athiru vinya,
nake ûrîa ûtarî na ûvoti nîamwongagîrîra vinya.
30Wana andû arîa ethî nîmakaathira vinya na manoge,
na andû arîa matarî akûrû nîmakaagwa nî kûnoga.
31Nwatî arîa metagîrîra Ngai-Mûnene nîmakoongererwa vinya wao,
makaagûrûkaga îgûrû na mathagu ta nderi,
makaavinyûra na matikaanoga,
makaathiîcaga na magûrû na matikaathira vinya.
Currently Selected:
Isa 40: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
