Isa 39

Anjaama kuuma Babuloni

(2Atha 20.12-19)

1Vîndî îo, Merodaki-baladani, mûthamaki wa Babuloni ûrîa warî mûvîcî wa Baladani, nîwatûmire anjaama mavirîre Hezekia maarûa na kîveo rîrîa egwire atî aarî mûrwaru na nîwavonete. 2Hezekia nîwamagwatire ûgeni, na akîmonia nyomba îrîa aigaga ûtonga wake: sîlûva, thaavu, indo cia gwîkîra irio mûnungo mwaro, maguta ma goro, indo ciake cionthe cia mbaara na indo cionthe irîa ciarî makûmbîrî make. Gûtirî Kîamrî nyombarî ya Hezekia kana Kîamrî vûrûrirî wake ataamoonia. 3Mûrathi Isaia nîwacokire akîthiî kwa Hezekia na akîmûria atîrî, “Andû aya makwîra atîa na maumîte kû?”

Hezekia nîwacokirie atîrî, “Maûka kûrî nie maumîte Babuloni vûrûri wa kûraca.”

4Isaia nîwacokire akîmûria atîrî, “Mona ndûî gwaku nyomba?”

Nake Hezekia nîwacokirie atîrî, “Mona indo cionthe irîa irî gwakwa nyomba. Gûtirî kîndû kîrî makûmbîrî makwa ndanamonia.”

5Isaia nîwacokire akîra mûthamaki atîrî, “Thikîrîria mûgambo wa Ngai-Mûnene mwene vinya wonthe: 6Taroria, mîthenya nîyûkîte, rîrîa indo cionthe irîa irî gwaku nyomba, vamwe na irîa methe maku maigîte nginya ûmûnthî ikaavirwa Babuloni. Gûtirî kîndû gîgaatigwa; ûguo nîguo Ngai-Mûnene augîte. 7#Dan 1.1-7; 2Atha 24.10-16; 2Maû 36.10 Anake amwe aku, arîa ûciarîte we mwene nîmakaathiîwa nao na matuwe ngaramba nîguo matungatage mûciî kwa mûthamaki wa Babuloni.”

8Nake Hezekia nîwerire Isaia atîrî, “Mîgambo ya Ngai-Mûnene îo wauga nî mîaro.” Mûthamaki aaugire ûguo nîûndû eeciragia atî, nîgûkethîrwa na thayû na ûgitîri vîndî ya ûtûûro wake wonthe.

Currently Selected:

Isa 39: KKB

Highlight

Copy

Compare