Isa 38

Ûrwaru wa mûthamaki Hezekia

(2Atha 20.1-11; 2Maû 32.24-26)

1Vîndî îo, Hezekia nîwarwarire mûno nginya agîkuvîvîria gûkua. Nake mûrathi Isaia, mûvîcî wa Amosi nîwathiîre kûrî ke na akîmwîra atîrî, “Ngai-Mûnene arauga ûvange maûndû ma nyomba yaku, nîûndû nîûgûkua tîûvona.”

2Hezekia nîwacokire akîvûgûka akîroria rûthingo na akîvoya Ngai-Mûnene, 3na akiuga atîrî, “Ûûi Ngai-Mûnene, nakûthaitha ûririkane ûrîa mbîthîrîtwe nîrî mwîvokeku kûrî we na ngoro yonthe, na ngîkaga maûndû marîa wonaga marî maro.” Na Hezekia nîwarîrire arî na ûrûrû mwîngî mûno.

4Naguo mûgambo nîwaumire kûrî Ngai-Mûnene ûkîra Isaia atîrî, 5“Thiî ûkeere Hezekia, Ngai-Mûnene, Ngai wa aguo Daudi arauga atî: ‘Nîmbîguîte îvoya rîaku na nîmonete methori maku; kwoguo nîngûkwongerera mîaka îkûmi na îtano ûtûûrorî waku. 6Nîngaakûvonokia we wana îtûûra rîîrî rîa Jerusalemu kuuma kûrî mûthamaki wa Asîria na nîrîgitîre.’ ”

7Nake Isaia nîwamûcokerie atîrî, “Rûrû nîruo rûûri rûrîa Ngai-Mûnene agaakûva rwa gûkwonia atî nîageka wata ûrîa eranîrîte: 8Nîngaatûma kîruru Kîam ngathî îrîa yatumirwe nî mûthamaki Ahazi gîcoke na vuva makinyo îkûmi.” Nakîo kîruru nîgîacokire na vuva makinyo îkûmi.#38.8 Mûvari ûyû na Kîhibirania ndwereekaga.

9Kwoguo vuva wa Hezekia kûvona, nîwatungire rwîmbo rûrû: 10Nînaugire atîrî,

“Nwanginya ngue vîndî ya wîthî wakwa,

Mvangîrîtwe kûthiî kwa arîa akuû mîaka îo îngî ya ûtûûro wakwa.

11Naaugire ndikona Ngai-Mûnene vûrûrirî wa arîa matûûraga mwoyo;

na ndikona mûndû wanarî ûrîkû gatagatîrî ka arîa matûûraga nthî.

12Nîrî mûthengutie kûrîa ndûûraga,

ta ûrîa îgema rîa mûrîthi rîtharagua,

Ngai akûnjîte ûtûûro wakwa;

ta ûrîa mûtumi wa nguo akûnjaga gîtambaa agîtinia kuuma ngorarî,

mûthenya na ûtukû we nîûnyamaragia.#38.12 Kîhibirania gîtiereekaga.

13Naarîrire ûtukû mûgima ngîvoya ûtethio;

amunangîte mavîndî ta ûrîa mûnyambû unangaga.

Mûthenya na ûtukû we nîûnyamaragia.#38.13Mûvari wa 13 ndwereekaga na Kîhibirania

14“Ng'ambaga ta cûcû wa njoka,

njaaga ta ndutuura.

Metho makwa nîmathiru vinya nî kûroria îgûrû.

Ûûi Mwathani, nînîrathînîka tuîka mûgitîri wakwa.

15Nwatî nîngiuga atîa?

Ke mwene nîwambîrire,

na ke mwene nîke wîkîte ûguo.

Toro yakwa yonthe nînthiru,

nîûndû wa ûrûrû ûrîa ûrî ngororî yakwa.

16“Ûûi Mwathani, tue tûtûûragua nî maûndû monthe marîa wekire,

na mau monthe nîmo matûmaga ndûûre.

Ûûi, njokeria vinya wa mwîrî na ûmvotithie gûtûûra.#38.16 Mûvari wa 15 na wa 16 ndîereekaga na Kîhibirania.

17Naathînîkire ûguo nîûndû wa wagîrîru wakwa,

nwatî nîûvonoketie ûtûûro wakwa,

kuuma ûgwatirî wa gîkuû,

nîûndû nîûnjoverete mevia makwa monthe.

18Nîûndû mûndû arî kwa arîa akuû ndangîgûcokeria ngatho,

arîa akuû matingîgûkumia we,

arîa mathiîcaga kûu îrimarî,

matingîgîa na kîîrîgîrîro Kîam wîvokeku waku.

19Arîa marî mwoyo nîo magûcokagîria ngatho,

ta ûrîa nie nîragûcokeria ngatho rîu,

îthe wa ciana nîke ûimenyithagia ûvoro wa wîvokeku waku.

20“Ngai-Mûnene nîakaamvonokia, natue nîtûkaamwinîra tûkîvûraga kînanda Kîam ngunju nyîngî mîthenya yonthe ya ûtûûro wetû, tûrî nyombarî ya Ngai-Mûnene.” 21#38.21 Mûvari wa 21 na wa 22 îretetwe ava kuuma mûthiiarî wa mûrango ûyû (roria 2 Atha 20.6-9). Kwoguo Isaia nîwamerire moce maguta ma ngûû, na mavake îvûvarî nîguo avore. 22Mûthamaki Hezekia nîwacokire akîûria atîrî, “Nî rûûri rûrîkû rûkaamonia atî nîngaathiî nyombarî ya Ngai-Mûnene?”

Currently Selected:

Isa 38: KKB

Highlight

Copy

Compare