Isa 28
28
Gûkaanua kwa ûthamaki wa mwena wa Rûgûrû
1Kaî andû a Efiraimu arîa mîrîu marî na thîna-î,
ûthaka wa riiri wao ûrathira ta ûrîa yûa rîvovaga,
ûthaka wao ûrîa ûvana ta maûa maravova
maigîrîrîtwe ciongorî cia atongoria acio marîtwe nî ndivei.
2Taroria, Mwathani nîethuurîrîte njamba îrî vinya;
ûrîa wîkariî ta mbura ya mbembe na rûkûngi rûnene,
ta makûmbî manene ma manjî makiuna;
nîakaamarivania nthî na vinya.
3Nthûmbî ya mwîtîîo wa mîrîu îo ya Efiraimu nîgaakinyangîrwa nthî.
4Riiri wao ûrathira ta ûrîa yûa rîvovaga,
riiri ûrîa ûrî Kîamndarî kîrîa kîrî ûtonga,
ûkethîrwa wîkariî ta ngûû irîa itunîvaga mbere ya îvinda rîa riûa,
rîrîa mûndû aciona aitucaga na akairîa wa rîmwe.
5Mûthenya ûcio, Ngai-Mûnene mwene vinya wonthe nîke ûkethîrwa arî nthûmbî ya riiri, na arî nthûmbî ya ûthaka kûrî andû ake arîa magaatigara marî mwoyo. 6Nîagaatongoria atucanîri ciira nîguo marûmagîrîre kîvooto marî magootirî, na nîakaava arangîri a îtûûra vinya.
Isaia na arathi a Juda arîa maarî mîrîu
7Arathi na athînjîri-Ngai wanao nî arîe nî ndivei,
nîmaratûgûgana nîûndû wa kûrîwa nî njovi ndûrû.
Nîavîngîcîku nîûndû wa kûrîwa nî njovi ndûrû,
nîavîngîce nî ndivei makaremwa nî kwona cioneki,
nîmavîngagwa magîtua ciira.
8Metha cionthe ciîcûrîte matavîka,
gûtirî wanarî vandû vatarî na gîko.
9Manthekagîrîra makîûragia atîrî,
“Mûrathi ûcio arenda kûthomithia û?
Areciria nîagûtûtarîria ndûmîrîri yake?
Tue tûrî ciana cia ngenge irîa iratigithirue kwonga?
10Aratûthomithia watho kiugo gwa kiugo,
mûvari kwa mûvari,
ava ûndû mûnini, vaarîa ûndû mûnini.”
11 #
1Akor 14.21
Nama, Ngai-Mûnene nîakaaria na andû aya na njîra ya andû matecîkene andû maragia rûthiomi rûgeni.
12Kûnarî ûguo, nîwerîrîte andû aya atîrî,
“Ûyû nîguo ûvurûko;
nîngûva arîa anogu ûvurûko.
Ava nîvo varî ûvurûko,”
nwatî nîmaaregire kûnthikîrîria.
13Kwoguo Ngai-Mûnene nîakaamathomithia watho,
kiugo gwa kiugo,
ava ûndû mûnini, vaarîa ûndû mûnini;
nîguo makîthiî mavîngagwe makagwa na vuva,
na nîmakaaunîkanga, mategwe na manyitwe.
Îthiga rîa mûcingi rîa Zayuni
14Kwoguo mue andû aya ang'endu mue mwathaga andû mûrî Jerusalemu, thikîrîriani ûrîa Ngai-Mûnene arauga!
15Nîûndû mugîte atîrî,
“Tue tûrî arûthu kîrîkanîro na gîkuû,
na tûrîetîkanîriu na kwa arîa akuû!
Rîrîa mûthiro ûkaavîtûkîrîra gûkû ndûgaatûvutia,
nîûndû tûtuîte maveeni kûndû gwa kûrîra,
na tûkethitha maûndûrî ma maveeni.”
16 #
Tha 118.22-23; Aro 9.33; 10.11; 1Pet 2.6 Kwoguo Ngai-Mûnene mwene vinya wonthe arauga atîrî,
“Taroria, nîngwiga îthiga rîa mûcingi Zayuni, îthiga rîrî na vinya,
îthiga rîa mûcingi rîa goro, rîa mûcingi wîna vinya na rîa goro:
‘Mûndû ûrîa wîtîkîtie ndakeenyenyeka.’
17Ngaatûmîra kîvooto kîrî kîthimi gîakwa,
naguo ûthingu ûrî ta kavirû.”
Mbura ya mbembe nîkaavata maveeni monthe,
namo manjî macûkangie ûgitîri wenyu.
18Vîndî îo kîrîkanîro kîenyu na gîkuû nîgîkaathirua,
na ngwatanîro yenyu na kwa arîa akuû îgaatuîka ya mana.
Rîrîa mûthiro ûkaavîtûkîrîra kûu nîûkamûthiria.
19Rîrîa rîonthe mûthiro ûcio ûkûvîtûka nîûkaamûcûkangia;
nîûndû ûkaavîtûkaga iraûko cionthe,
mûthenya na ûtukû;
nî gûkaagîa na guoya mûnene rîrîa ndûmîrîri îno îkeguîka.
20Nîûndû ûrîrî wenyu nî mûkuvî mûno mwîtambûrûkîtie kuo,
naguo mûrengeti ûrîa mwîkunîkagîra naguo nî mûceke mûno.
21 #
Josh 10.10-12; 2Sam 5.20; 1Maû 14.11 Ngai-Mûnene nîakaarûngama ta ûrîa aarûngamire arî Kîrîmarî gîa Perazimu,
na arakare ta ûrîa aarakarire arî Kîamndarî gîa Gibeoni;
nîageka ûndû ûtecîkene,
nîakaaruta wîra wake wa kûgegania.
22Kwoguo, mue mûtikarie ciugo njûku,
nîûndû mûngîka ûguo nîmûkoovwa na vinya.
Nîûndû nîmbîguîte Ngai-Mûnene mwene vinya wonthe
akiuga nîatuîte gûcûkangia vûrûri wonthe.
Ûûgî wa Ngai
23Tegani matû mwîgue ûrîa nîrauga;
thikîrîriani waro mwîgue ûrîa ngwaria.
24Nîkwa mûndû ûrîa ûrîmaga na mûraû nîguo avande arîmaga mîthenya yonthe?
Nîkwa atûûraga acimbaga akîaraganagia mûgûnda wake?
25Na kinthî arîkia kwaragania mûgûnda,
ndavandaga mbeû cia manyenyi ta ma rwoga,
karîmî ka nthiia na akavanda ngano na mîvari,
nacio cairi akaivanda vandû va cio,
na akavanda mîmera îrîa îngî mîvakarî ya mûgûnda ûcio?
26Mûndû ûcio nîamenyaga ûrîa agwîka,
nîûndû Ngai wake nîamûthomithagia.
27Mbegû cia manyenyi ta ma rwoga itivûragwa na mûvûro,
kana cia karîmî ka nthiia ikinyangwa na gîkaari Kîam ng'ombe.
Nwatî mbegû cia manyenyi ta ma rwoga ivûragwa na mûragi,
nacio mbegû cia karîmî ka nthiia ikavûûrwa na rûthanju.
28Rîrîa mûndû akûvûra ngano ndaivûûraga igatutumûka,
rîrîa igûkinyangwa na gîkaari Kîam mbarathi,
nîaimenyagîrîra itigatutumûke.
29Ûûgî ûyû wonthe umîte kûrî Ngai-Mûnene mwene vinya wonthe,
mataaro make nî ma kûgegania,
na ûûgî wake nî mwîngî mûno.
Currently Selected:
Isa 28: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
