Isa 27

1 # Ayu 41.1; Tha 74.14; 104.26 Mûthenya ûcio, Ngai-Mûnene nîagooca rûviû rwake rûrîa rûnene na averithie Leviathani,#27.1 Leviathani: Ciarî ciûmbe cia tene irîa ciarî mîvuano ya mavûrûri marîa maavinyagîrîria Isiraeli. njoka îrîa îgûrûkaga, njoka îrîa îîthioraga, na aûrage njûnamatu îrîa îtûûraga îriarî.

2Mûthenya ûcio Ngai-Mûnene nîakaaina rwîmbo rwîgiî mûgûnda wake mwaro wa mîthavibu atîrî:

3“Nie Ngai-Mûnene, nînie nîûmenyagîrîra,

na ngawîtîrîria manjî vîndî cionthe.

Nîûrangagîra ûtukû na mûthenya,

nîguo ndûgacûkangue nî mûndû wa wonthe.

4Nie ndikaarakara rîngî nî mûgûnda ûyû.

Kûngîrî mîgua na nthaugû kuo nwa ndûire nacio,

nwa ndûe nacio na ngaivîvia na mwaki ikathira viû.

5Tiga nwa maûkire kûrî nie nîmagitîre,

tiga tûgîe na thayû nao,

îî, tiga tûgîe na thayû nao.”

6Vîndî nîgaakinya rîrîa njiarwa cia Jakovu ikaagîa na mîri,

Isiraeli nîkaamera na îtheûke,

na matunda mayo nîmagecûra nthî yonthe.

7Ngai-Mûnene ndaaverithia Aisiraeli na vinya

ta ûrîa aaverithirie nthû ciao.

Aisiraeli arîa maaûragîrwe mbaararî,

nî anini gûkîra nthû ciao.

8Aaverithirie andû ake na njîra ya kûmavira îthamîriorî.

Rîrîa kwarî na rûkûngi rûnene rwa mwena wa îrathîro,

nîwamavonokirie kuuma kûrî rûkûngi rûnene.

9Kwoguo ûguo nîguo mavîtia ma Jakovu makaathirua,

ûguo nîguo wîvia wake ûkaathirua viû;

mathiga marîa matumîte metha cia magongoona,

makaathîwa matuîke mûthetu,

na gûtirî mîvuanano ya Ashera, ngai ya mûndûmûka,

wana kana metha cia kûvîvîria ûbani igaatigara.

10Nîûndû îtûûra rîrîa ririgîre rîtigîtwe rîrî rîonga,

rîtiganîrîtue na rîkathamwa ta werû.

Kûu nîkuo ng'ombe irîthagua na ikamama wa kuo.

11Mvûa cia mîtî ya kuo nî nyûmû na ikaunîkanga,

nao aka nîmathiîcaga kuna ngû cia mîtî îo.

Andû aya a Isiraeli nî aritu.

Kwoguo Ngai, ûrîa wamaûmbire ndakaameguîra ntha,

ke ûrîa mûmaûmbi ndakaamatuga.

12Mûthenya ûcio Ngai-Mûnene nîakaaûngania maketha make kuuma rûnjîrî rwa Farati nginya karûnjîrî ka Misiri, namue andû a Isiraeli nîmûkaaûnganua ûmwe kwa ûmwe.

13Mûthenya ûcio karumbeta kanene nîgakaavuvwa, nao Aisiraeli arîa maaûrîrîte vûrûrirî wa Asîria na arîa maavirîtwe îthamîriorî vûrûrirî wa Misiri nîmagaaûka na magoocere Ngai-Mûnene îgûrû rîa kîrîma kîrîa kîtheru Kîam Jerusalemu.

Currently Selected:

Isa 27: KKB

Highlight

Copy

Compare