Isa 29
29
Ûrathi wîgiî Jerusalemu
1Ûûi Arieli, Arieli,#29.1 Arieli: Îvukuurî rîa Ezekieli 43.15,16 rîîtwa rîîrî riugaga mwena wa îgûrû wa metha ya kîgongoona. Arieli ava, nî rîîtwa rîa Kîhibirania rîa Jerusalemu!
we îtûûra rîrîa Daudi aambîte magema make!
Mwaka ûkaga na ûkavîtûka,
na irugo ikûngûîrwe mîaka yonthe.
2Kûnarî ûguo nîngaatûma Jerusalemu kûgîe kîeva,
na nîgûkaagîa kîrîro na macakaya,
na kûrî nie îtûûra rîu rîkethîrwa rîkariî ta metha ya kîgongoona îrî na nthakame.
3Nie nîngaamûcîgîrîria,
nîmûcîgîrîrie na nyomba ndaca na nîmûtharîkîre.
4Nîûgaatungumanua nthî kûndû kûraca;
nîûkaaruta mûgambo kuuma rungu rwa mûthetu,
nîûkaarutaga mûgambo ûrî rungu rwa mûthetu,
mûgambo waku ûkaaumaga na kûu mûtheturî wîkariî ta mûgambo wa ngoma,
na mûgambo waku ûkeguîkaga ûkîaria na kîvwe kuuma mûtheturî.
5Nwatî gîkundi Kîam nthû ciaku gîkethîrwa gîkariî ta rûkûngû rûvinyu,
nacio nthû ciaku irîa itarî ntha ikethîrwa ciîkariî ta macaki,
makaagûrûkua nî rûkûngi wa rîmwe.
6Ngai-Mûnene mwene vinya wonthe nîagaaûka kûrî mue,
na njîra ya ngwa,
kîthingithia na mûgambo mûnene,
rûkûngi rwa ngoma cia aka, rûkûngi rûnene na mwaki wa kûthiria.
7Gîkundi Kîam mavûrûri marîa marûaga na Jerusalemu,
marîa monthe marûaga nake,
makatharîkîra nthingo ciake cia vinya,
na makamûretere thîna,
magekara ta kîroto, na ta kîoneki gîa ûtukû.
8Mavûrûri monthe marîa matharîkagîra Kîrîma gîa Zayuni
magekara ta mûndû arî mûvûtu akîrota akîrîa irio,
kana ta mûndû mûnyondu akîrota akînyua manjî,
nwatî akîramûka akethîra arî mûnogu na arî mûnyondu.
Ûgwati wa kûregana na mataaro
9Îritieni na mûtuîke irimû!
Vingani metho na mûtuîke ndumumu!
Rîwani, nwatî mûtikarîwe nî ndivei;
tûgûganani, nwatî mûtigatûgûgithue nî njovi ndûrû!
10 #
Aro 11.8
Nîûndû Ngai-Mûnene nîatûmîte mûnyitwe nî toro na mûmame toro ndito;
nîavingîte metho menyu mue arathi,
na nîakunîkîte ciongo cienyu, mue oni a maûndû.
11Kwoguo kûrî mue, cioneki ino cionthe ciîkariî ta ciugo ciandîkîtwe îvukuurî, rîkînavingwa na rîkînavûrwa mûvûûri. Ûngînengera mûndû ûngîvota kûthoma na ûmwîre atîrî, “Ta nthomera ava,” nake akauga atîrî, “Ndingîvota, nîûndû nî kîvinge na gîkavûrwa mûvûûri.” 12Ûngînengera mûndû ûtangîvota kûthoma na ûmwîre atîrî, “Ta nthomera îvuku rîîrî,” ke akaauga atîrî, “Ndiîcî kûthoma.”
13 #
Mat 15.8-9; Mar 7.6-7 Mwathani aaugire atîrî,
“Andû aya mamvecaga gîtîîo na mîromo,
nwatî ngoro ciao irî kûraca nanie,
gîtîîo kîrîa mamvecaga nî Kîam mawatho marîa mathondeketwe nî andû,
na makamathoma.
14 #
1Akor 1.19
Kwoguo, nîngeka andû aya maûndû ma kûmakania,
maûndû ma kûgegania na ma kûmakania.
Naguo ûûgî wa andû ao arîa aûgî nîûkaathira,
na ûmenyo wa andû ao arîa amenyi ûgaatuîka wa mana.”
Kîîrîgîrîro kîa vuvarî
15Andû arîa mathithaga Ngai-Mûnene mîvango yao kaî marî na thîna-î! Marûthagîra mîvango yao ndumarî makiugaga atîrî,
“Gûtirî mûndû ûratwona,
na gûtirî mûndû ûtwicî.”
16 #
Isa 45.9; Aro 9.20 Mue mûgarûranagia maûndû monthe. Mûmbi wa nyûngû-î, nwa egananue na yûmba? Kîndû kîthondeketwe nwa kîre mûkîthondeki atî tîke wakîthondekire, kana kîndû kîrî kîûmbe kîre ûrîa wakîûmbire atîrî,
“We ndwathondeka,” kana
“We ndwîcî wanarî ûndû?”
17Nî kavinda kanini gatigarîte Lebanoni îgarûrwe îtuîke mûgûnda mûnoru;
naguo mûgûnda ûcio mûnoru ûgatuîka mûtitû.
18Mûthenya ûcio itegua nîikegua îvuku rîkîthomwa,
nao arîa matûûraga ndumarî marî atumumu nîmakoona.
19Andû arîa avooreri nîmakaagîa na gîkeno gîcerû kuuma kûrî Ngai-Mûnene,
nao arîa athîni gûkû nthî nîmagaakena nîûndû wa Ûrîa Mûtheru wa Isiraeli.
20Andû arîa matarî ntha nîmagaacûkangua,
na arîa mathekanagîrîra mathirue.
Nao arîa onthe meciragia gwîka maûndû ma waganu nîmakaathirua.
21Ngai nîagaacûkangia arîa marutaga ûira wa maveeni nîguo mûndû atuwe mwîvia,
arîa mavîtithagia atucanîri ciira magootirî,
na arîa maragia maveeni,
nîguo maime arîa matarî na mavîtia kîvooto Kîamo.
22Kwoguo Ngai-Mûnene ûrîa wakûûrire Iburahimu arauga ûvoro wîgiî nyomba ya Jakovu atîrî,
“Jakovu ndagaaconorithua rîngî,
na ûthiû wake ndûgaatuka rîngî.
23Nîûndû rîrîa akoona ciana ciake, wîra wa njara ciakwa,
nîmagaakumia rîîtwa rîakwa nie Ûrîa Mûtheru wa Jakovu;
na metigîre Ngai wa Isiraeli.
24Andû arîa ariitu nîmakaagîa na ûmenyo,
nao arîa manugunaga nîmagetîkîra kûthomithua.”
Currently Selected:
Isa 29: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
