Isa 26

Rwîmbo rwa ûvootani

1Mûthenya ûcio, andû nîmakaaina rwîmbo rûrû marî vûrûrirî wa Juda:

Tue tûrî na îtûûra rîrî na vinya!

Ngai nîke ûtûgitagîra ta ûrîa nthingo igitagîra andû.

2Vingûrani ivingo cia îtûûra,

nîguo vûrûri ûrîa mûthingu,

na ûrîa mwîvokeku ûtonye ndaarî.

3We Ngai-Mûnene, arîa magwîtîkîtie,

nîûmaigaga marî na thayû mûkinyanîru,

nîûndû nwawe mevokete.

4Îîvokage Ngai-Mûnene tene na tene,

nîûndû Ngai-Mûnene, Ngai nî îthiga rîa ûgitîri tene na tene.

5Nîûndû nîagwîthîtie arîa metûûgagîria,

nîomomorete îtûûra rîrîa rîrî vinya na akarîvaragania mûtheturî.

6Îtûûra rîu nîrîkinyangagwa,

na magûrû ma athîni,

na ma ngîa.

7Njîra ya andû arîa athingu nî nûngarû;

we Ngai-Mûnene nîûrûngaragia njîra cia andû arîa athingu.

8We Ngai-Mûnene nîtûgwetagîrîra,

tûrûmîrîrîte matuîro maku ma ciira;

na ngoro cietû nwawe ciîriragîria.

9Ngoro yakwa nîîkwîriragîria ûtukû;

nie nîngûcaragia na kinyi.

Nîûndû rîrîa ûgaatuîra nthî,

andû onthe a nthî nîmakaamenya gwîka maûndû ma ûthingu.

10Nwatî wana mûndû mwaganu angîguîrwa ntha,

nderutaga gwîka maûndû ma ûthingu;

wana rîrîa arî vûrûrirî wa andû arîa athingu,

nwa ekaga maûndû ma waganu;

na ndakenagua nî ûnene wa Ngai-Mûnene.

11 # Ahib 10.27 Ûûi Ngai-Mûnene, nîûkîrîrîtie njara yaku ûkîenda kûverithia nthû ciaku,

nwatî itirona.

Cionie ûrîa wendete andû aku na nîigaaconoka;

tiga mwaki wa mang'ûrîka maku ûivîvie.

12We Ngai-Mûnene nîûtûvete thayû,

nîûtûvotithîtie kûruta mawîra metû monthe.#26.12 nîûtûvotithîtie kûruta mawîra metû monthe: kana: nîûtwîkîte kûringana na ciîko cietû.

13Ûûi Ngai-Mûnene, Ngai wetû,

nîtwathagwa nî athani engî,

nwatî we wenga tu nwawe twicî.

14Andû acio nîmaakwire na matigaatûûra mwoyo rîngî;

nîmatuîkîte iruru na matikaariûka.

We nîwe wamaverithirie na ûkîmathiria,

na gûtirî mûndû ûkaamaririkana rîngî.

15Nwatî we Ngai-Mûnene nîûtûmîte rûrîrî rwetû rûkûre,

nîwaramîtie mîvaka yonthe ya vûrûri wetû,

kwoguo we nîûtîîtwe.

16Ûûi Ngai-Mûnene, rîrîa maarî thînarî, nîmaagûkaîre,

rîrîa wamaverithirie, o nîmaakûvoire.#26.16 Kamûvari gaka na Kîhibirania gîtiereekaga

17Wata ûrîa mûndûmûka arî vakuvî gûciara eyunangaga na akarîra nîûndû wa ruuo,

nwaguo we Ngai-Mûnene watûmire tûrîre.

18Tue twarî na ûrûrû wa gûciara kaana,

nwatî twaciarire rûkûngi.

Gûtirî ûndû twekire nîûndû wa kûvonokia nthî,

tûtiavota kwongerera andû gûkû nthî.

19Andû aku arîa akuû nîmagaatûûra mwoyo,

mîîrî yao nîkaariûka!

Arîa mamamîte mûtheturî nîmagaaûkîra,

na maine makenete.

Nîûndû îme rîa Ngai-Mûnene nî îme rîa ûtheri,

nao arîa marî kwa arîa akuû nîmakaariûka.

Îtuîro na andû gûcokanîrîrua

20Ûkani andû akwa, tonyani nyombarî cienyu na mwîvingîre kuo; îîthitheni kavinda kanini nginya rîrîa marakara ma Ngai makaathira. 21Nîûndû Ngai-Mûnene nîagaaûka kuuma îgûrû kûrîa ekaraga aûke averithie andû nîûndû wa mavîtia mao. Nayo nthî nîkaaumbûra arîa maaûragirwe na ndîkaathitha rîngî arîa maaûragirwe.

Currently Selected:

Isa 26: KKB

Highlight

Copy

Compare