Isa 20

Isaia nîwathiîre arî njaga na atarî na iratû

1Mwaka ûrîa mûnene wa athigari a mbaara aakinyire îtûûra rîa Ashidodi atûmîtwe nî Sarigoni mûthamaki wa Asîria, akîrîtharîkîra na akîrînyita, 2Ngai-Mûnene nîwerire Isaia mûvîcî wa Amozu atîrî, “Thiî ûrute nguo îo ya macakaya wîyovete kîûnûrî na ûrute iratû magûrûrî maku.” Nake Isaia nîwekire guo, akîthiî arî njaga na arî magûrû matheri. 3Mwaka ûrîa îtûûra rîa Ashidodi rîatavirwe, Ngai-Mûnene nîwaugire atîrî, “Ndungata yakwa Isaia îtûûraga îthiîcaga îrî njaga na îrî magûrû matheri îvinda rîa mîaka îthatû rûrî rûûri rwa kwonania ûrîa ngeeka Misiri na Ethiopia. 4Ûguo nîguo mûthamaki wa Asîria akaathiî na andû arîa akaanyita marî mîgwate kuuma vûrûrirî wa Misiri na Ethiopia. Andû ethî na akûrû makaathiî marî njaga na marî magûrû matheri, matarî na thuruvarî. Ûguo nîguo Misiri îgaaconorithua. 5Kwoguo arîa onthe mevokete Ethiopia na metîîaga nîûndû wa Misiri nîmakaamaka na maconoke. 6Nao andû arîa matûûraga rûtererî rwa îria, mûthenya ûcio nîmakaauga atîrî, ‘Taroriani ûrîa gwekîkire kûrî andû arîa tûrevokete atî nîmagûtûgitîra kûrî mûthamaki wa Asîria! Rîu tue-î, nîtûkûvonoka?’ ”

Currently Selected:

Isa 20: KKB

Highlight

Copy

Compare