Isa 19

Ngai nîakaaverithia Misiri

1 # Jer 46.2-26; Ezek 29.1—32.32 Îno nîyo ndûmîrîri îgiî Misiri:

Ngai-Mûnene nîaûkîte vûrûrirî wa Misiri,

aûkîte ekarîrîte îtu rîthiîte na îvenya,

mîvuanano ya ngai cia Misiri nîgaatetemaga îrî mbere yake,

nao andû a Misiri nîmakaathira vinya ngoro.

2Ngai-Mûnene augîte atîrî,

“Nie nîngaatûma andû a Misiri marûe o ene:

wa mûndû nîmakaarûa na mûrwang'ina,

wa mûndû marûe na ûrîa mariganîtie nake,

wa îtûûra rîrûe na îtûûra rîrîa rîngî,

na mûthamaki nîakaarûa na mûthamaki ûrîa wîngî.

3Nîngaathiria ûrûme wa andû a Misiri,

na njûkangie mîvango yao.

Nîmakaaûria ûtaaro kûrî mîvuanano na aringi ciama,

na kûrî ago na arogi.

4Nîngaanenganîra andû a Misiri kûrî mûtongoria mwaganu,

na nîmakaathwa nî mûthamaki ûtarî ntha.

Nie Ngai-Mûnene mwene vinya wonthe, nînie nauga ûguo.”

5Manjî ma Rûnjî rwa Nilo nîmakaavûa,

naruo rûnjî rûnyare.

6Mîtaro ya rûnjî rûu nîkaanunga,

na tûrûnjî tûrîa tûviraga manjî rûnjîrî rwa Nilo nîtûkaavwa.

Mûthanje na nyaki nîikoora,

7ndere na nguvarî cia Rûnjî rwa Nilo gûtikaamera kîndû.

Na kîrîa kîonthe gîkaavandwa nîgîkaaûma,

na kîgûrûkue nî rûkûngi kîûre.

8Ategi onthe a nthamaki nîmakaarîra na macakae,

arîa onthe mategaga na ndûano nîmakaarîra,

nao arîa mategaga na neti nîmakaathirwa nî vinya.

9Arîa matumaga nguo na arîa marûthaga ngoora cia vamba,

nîmagaakua ngoro.

10Itugî cia vûrûri nîikaaunangwa,

na aruti wîra wa kîvarûa nî makegua kîeva.

11Atongoria a îtûûra rîa Zoani nî aritu mûno;

ataari a mûthamaki wa Misiri mavecanaga mataaro ma ûrimû.

Mangîvota atîa kwîra mûthamaki wa Misiri,

atî o nî njiarwa cia andû arîa aûgî,

njiarwa cia athamaki a tene atîa?

12We mûthamaki wa Misiri marî kû andû acio aku aûgî?

Tiga makwonie na makwîre,

maûndû marîa Ngai-Mûnene mwene vinya wonthe,

avangîte gwîka vûrûri wa Misiri.

13Atongoria a Zoani nî aritu,

na atongoria a Memufisi nîaveenie;

magîrîrwe nî gûtongoria andû,

nwatî nîmavîtithîtie vûrûri wa Misiri.

14Ngai-Mûnene nîatûmîte mavecane mataaro mavîngîcanu,

nîmatûmîte andû a Misiri magaage mawîrarî mao monthe,

na magatûgûga ta ûrîa mûrîu atûgûgaga agîtavîkaga.

15Gûtirî mûndû vûrûrirî wa Misiri,

arî gîtonga kana mûthîni,

mûndû ûrî îgweta kana ûtarî îgweta,

ûngîvota gwîka ûndû wa vata.

Andû a Misiri nîmakaagooca Ngai-Mûnene

16Mûthenya ûcio andû a Misiri nîmakegua guoya ta aka, mainaine nî guoya rîrîa makoona Ngai-Mûnene mwene vinya wonthe aûkîrîrîtie njara yake nîguo amaverithie. 17Andû a Misiri nîmakaanyitwa nî guoya nîûndû wa vûrûri wa Juda. Mûndû wa wonthe ûkaagweterwa ûvoro wa Juda nîagetigîra nîûndû wa ûrîa Ngai-Mûnene mwene vinya wonthe avangîte kûmeka.

18Mûthenya ûcio wakinya, nîgûkaagîa na matûûra matano vûrûrirî wa Misiri kûrîa rûthiomi rwa Kîhibirania rûkaaragua. Andû a matûûra mau nîmakevîta na mauge atî makethagîrwa marî evokeku kûrî Ngai-Mûnene mwene vinya wonthe. Îtûûra rîmwe rîamo rîgeetwa, “Îtûûra rîa Riûa.”

19Mûthenya ûcio gûkethîrwa kûrî na metha ya kîgongoona ya Ngai-Mûnene vûrûrirî wa Misiri, na gîtugî Kîammûrîrîtwe Ngai-Mûnene kîrî mûvakarî wa vûrûri ûcio. 20Metha îo ya kîgongoona îgaatuîka kîmenyithia na ûira kûrî Ngai-Mûnene mwene vinya wonthe vûrûrirî wa Misiri. Rîrîa andû a kuo makaarîrîra Ngai-Mûnene amatethie kuuma kûrî arîa mamavinyagîrîria, ke nîakaamatûmîra mûmatethia wa kûmagitîra na kûmavonokia. 21Ngai-Mûnene nîakemenyithania kûrî andû a Misiri, nao nîmakaamûmenya na mamûgooce, na mamûrutagîre magongoona na matega ma kûvîvua. Nîmakevîta kûrî Ngai-Mûnene na mavingie mîvîtwa îo. 22Ngai-Mûnene nîakaaverithia andû a Misiri, acoke amavonie; nao nîmakaamûcokerera nake nîakegua mathaithana mao na amavonie.

23Mûthenya ûcio, nîgûkethîrwa kûrî na varavara nene yumîte Misiri îthiîte vûrûrirî wa Asîria. Andû Asîria nîmagaceraga Misiri, nao andû a Misiri nîmagaceraga Asîria; nao andû a Misiri na andû a Asîria nîmakaagooca Ngai vamwe. 24Mûthenya ûcio vûrûri wa Isiraeli nîûkaanyitanîra na vûrûri wa Misiri na wa Asîria; namo mavûrûri mau mathatû nîmagaatuîka kîrathimo kûrî nthî yonthe. 25Ngai-Mûnene mwene vinya wonthe nîakaamarathima akiugaga atîrî, “Mûrorathimwa andû akwa a Misiri, mûrorathimwa andû a Asîria arîa naûmbire na njara ciakwa, na Aisiraeli arîa nîîthuurîrîte.”

Currently Selected:

Isa 19: KKB

Highlight

Copy

Compare