Isa 21

Kîoneki kîgiî kûgwa kwa Babuloni

1Îno nîyo ndûmîrîri îgiî ûrathi wa Babuloni: #21.1 Babuloni: Mandîko mamwe maugaga, ‘werû ûrîa ûrî rûtere rwa îria.’

Ta ûrîa rûkûngi rûnene rûvurutanaga kuuma îveti,

ûguo nîguo thîna mûnene ûgaaûka umîte werûrî, vûrûrirî wa gwîtigîrwa.

2Nîmonetue kîoneki gîa kûmakania;

kîoneki Kîam arîa maîaga makîîa,

na arîa macûkangagia magîcûkangia.

Mue andû a Elamu, unûkiani mûthiî mbaararî;

mue andû a Media cîgîrîriani Babuloni!

Ngai nîagûtûma mînyamaaro îrîa Babuloni aretete îthire.

3Maûndû marîa noonire na ngîgua nîmaatûmire mbîgua ûrûrû mûno,

nîrî mwîcûre nî ûrûrû mwîngî,

ûrûrû ta wa mûndûmûka agîciara.

Nînîratuurwa mûno nginya ngaremwa nî kwîgua,

nîrî mûmaku mûno nginya ngaremwa nî kwona.

4Ngoro yakwa nî îratumatuma,

na nîrîmwîcûre nî guoya.

Nîneriragîria kîvwaî gîkinye,

nwatî rîrîa gîakinyire nîgîatûmire minaine.

5Îruga rînene nîrîavarîrîrue,

metha igatandîkwa,

na andû makîrîa na makînyua.

Wa rîmwe mûgambo nîwaugire atîrî,

“Ûkîrani mue athamaki! Varîrîriani ngo cienyu!”

6Mwathani nîwacokire akîmbîra atîrî,

“Thiî wige mûrangîri,

mwîre anagîrîre maûndû marîa arona.

7Rîrîa akoona andû mathiîte aîrî aîrî,

matwîte mbarathi, andû matwîte mvunda na engî matwîte ngamîîra,

mwîre akaaroria waro,

akaaroria na kinyi.”

8Mûrangîri#21.8 Mûrangîri: Mandîko mamwe maugaga, ‘mûnyambû.’ ûcio nîwacokire akiugîrîria atîrî, “Mwathani, nûngamaga nyombarî ndaca na îgûrû ngîrangîra,

mûthenya na ûtukû!”

9 # Kûguû 14.8; 18.2 Taroria maûkîte matwîte mbarathi,

na marî aîrî kwa aîrî.

Mûrangîri ûcio nîwacokire akiuga atîrî,

“Babuloni nîngwîu!

Mîvuanano yonthe ya ngai ciakuo nîmiunange na îkagwîthua nthî.”

10Mue Isiraeli andû akwa,

mûrî avûûre na mûkagûrûkua ta ngano.

Nîramwîra maûndû marîa mbîguîte,

kuuma kûrî Ngai-Mûnene mwene vinya wonthe, Ngai wa Isiraeli.

Ndûmîrîri îgiî Edomu

11Îno nî ndûmîrîri nene îgiî Edomu,

nînîregua mûndû agîtana kuuma Seiru,

“Mûrangîri, ûtukû ûtigarîtie vegana atîa ûthire? Gûgaakîa rî?”

12Nanie mûrangîri ngîcokia atîrî,

“Nîgûkîa, na gûcoke gûtuke rîngî.

Wenda kûria ûria,

thiî ûûke rîngî.”

Ndûmîrîri îgiî Arabia

13Ûyû nî ûrathi wîgiî Arabia.

Mue andû a Dedani mûthiîte mûrûmanîrîrîte,

rarîrîrani werûrî wa Arabia ûmûnthî.

14Mue arîa mûtûûraga vûrûrirî wa Tema,

kundiani andû arîa anyondu manjî;

vani andû acio maûrîte irio.

15Andû acio nîkwa maûrîrîte mviû,

icomoretwe nîguo maûragwe nacio,

maûrîrîte mota matungîtwe marathwe na ûgwati wa mbaara.

16Mwathani nîwacokire akîmbîra atîrî, “Varî îvinda rîa mwaka ûmwe, ta ûrîa ûtaragîrwa mûruti wa wîra, riiri wonthe wa Kedari nîûkaathira. 17Andû arîa njamba maikagia mîguî a ciana cia Kendari, nî andû anini tu gatagatîrî kao magaatigara. Nie, Ngai-Mûnene, Ngai wa Isiraeli, nînie nauga ûguo.”

Currently Selected:

Isa 21: KKB

Highlight

Copy

Compare