Isa 18

Ngai nîakaaverithia Ethiopia

1 # Zef 2.12 Kûrî na vûrûri ûrî mûringo wa nyûnjî cia Ethiopia,

mathagu meguîkaga makîvatavata.

2Vûrûri ûcio ûtûmaga anjaama makathiî na rûnjî rwa Nailo,

marî matarûrî matumîtwe na mîrura.

Thiîni mue anjaama aya mûthiîcaga na îvenya,

thiîni vûrûrirî ûcio mûnene na ûrî vinya,

vûrûri ûcio ûgaanîtue nî nyûnjî,

ûrî andû araca na marî rûûo rûnyoroku,

andû metigîrîtwe nî andû a nthî yonthe.

3Mue arîa mûtûûraga mavûrûrirî monthe ma nthî,

namue mûtûûraga nthî,

rîrîa kîmenyithia gîkoonanua îgûrû rîa kîrîma, mûkaaroria!

Rîrîa karumbeta gakaavuvwa, mûkaathikîrîria!

4Nîûndû Ngai-Mûnene ambîrîte atîrî,

“Nîngaaroria gûkû nthî ngirîte nîrî îgûrû kûrîa ndûûraga,

nîngaaroria ngirîte nîrî kûrîa ndûûraga,

ngirîte ta ûrugarî vîndî îrîa riûa rîarîte,

ta ûrîa îtu rîa îme rîgûcaga vîndî ya maketha.

5Mbere ya thavibu ikethwa,

kîrao gîatuîka na thavibu ciambîrîria gûtunîva,

Ngai-Mûnene nîagaatinia matheûka na tûviû twa gûcaa,

na nîagaacaa mvûa irîa iratamba.

6Ciimba cionthe cia athigari arîa njamba igaatigwa irîmarî,

irîwe nî iconi na nyamû cia kîthaka.

Iconi irîa irîcaga nyama ikaairîa vîndî ya riûa,

nacio nyamû cia kîthaka ikaairîa vîndî ya mvevo.”

7Vîndî îo, Ngai-Mûnene mwene vinya wonthe nîakaavirîrwa iveo kuuma vûrûrirî ûyû ûgaanîtue nî nyûnjî, ûrî andû araca na marî ngothi nyoroku. Andû acio nîmetigîrîtwe nthî yonthe. Magaaûka Kîrîmarî gîa Zayuni, varîa Ngai-Mûnene Mwene Vinya wonthe agoocagîrwa.

Currently Selected:

Isa 18: KKB

Highlight

Copy

Compare