Isa 14
14
Andû a Isiraeli nîmaacokire kuuma Îthamîriorî
1Ngai-Mûnene nîakeguîra andû a Jakovu ntha na athuure andû a Isiraeli rîngî matuîke ake kîûmbe. Nîakaamacokia vûrûrirî wao o ene, na ageni nîmagaaûka na matûûranie nao. 2Andû a mavûrûri nîmagaatethereria andû a Isiraeli gûcoka vûrûrirî ûrîa maaverwe nî Ngai-Mûnene. Nao andû acio a mavûrûri nîmagaatungatagîra Aisiraeli marî ngombo. Arîa maatavîte Aisiraeli nîmagaatavwa nî Aisiraeli, na andû a Isiraeli nîmakaatha arîa maamavinyagîrîria.
Mûthamaki wa Babuloni nîwakuire
3Rîrîa Ngai-Mûnene akaathirîria andû a Isiraeli kîeva, mathîna na mawîra marito marîa maarutithagua, 4nîmakaaina rwîmbo rwa kûnyûrûria mûthamaki wa Babuloni makiugaga atîrî,
“Kaî mûthamaki ûrîa ûratûvinyagîrîria nî mûcûkangie-î!
Ûng'endu wake rîu nî mûthiru!
5Ngai-Mûnene nîacûkangîtie wathani wa arîa aganu,
nîaunangîte mûragi wao wa wathani,
6ûrîa maarivaga andû naguo marî na marakara matagûtigithîria,
na kûmatha makîmanyariraga matarî na ntha.
7Rîu nthî yonthe nîînogokete na îrî na thayû,
na andû onthe nî maraina makenete.
8Mîthithinda na mîtarakwe ya Lebanoni nîîrakena,
îrakenerera kûgwa kwa mûthamaki îkiugaga atî,
‘nîûndû rîu nîûgwîthîtue,
gûtirî mûndû ûgaaûka gûtûtema!’
9“Kwa arîa akuû nî kwîvarîrîtie gûgûtûnga rîrîa ûkaathiî kuo,
maroho ma arîa akuû nîmagaakwamûkîra,
na arîa onthe maarî atongoria a nthî,
nîmaraûkîra itîîrî ciao cia ûthamaki,
arîa onthe maarî athamaki a ndûrîrî.
10Onthe marî vamwe nîmagaakwîra atî:
‘Wa nawe ndûrî na vinya wa tatue,
we ûvanene natue!’
11Mwago wonthe ûrîa wegucaga,
vamwe na nyîmbo irîa wainagîrwa na ngita ciaku,
rîu irî kwa arîa akuû.
Igunyû nîcio ûmamagîra irî ûrîrî waku,
na mûthûa ûgagûkunîkîra ûrî mûrengeti waku.’
12 #
Kûguû 8.10; 9.1 “We wakengaga ta njata ya kîraûko,
na kaî wî mûgwîu na vinya kuuma îgûrû-î!
We wavootire mavûrûri,
nwatî rîu ûrî mûgwîthie nthî-î!
13 #
Mat 11.23; Luka 10.15 Weîrire na ngoro atîrî,
‘Nîngunûkia nginya îgûrû;
nîngaaiga gîtî gîakwa Kîam ûthamaki îgûrû rîa njata,
nîngekara îgûrû rîa kîrîma kûrîa ngai cia mîvuanano icemanagia,
kûndû kûraca mwena wa rûgûrû.
14Nîngunûkia nginye îgûrû rîa matu,
nînîvaanania na ûrîa ûrî Îgûrû Mûno.’
15Nwatî nîûnyûrûrûkîtue ûgakinyua kwa arîa akuû,
nîûgwîthîtue kûrîa kûriku mûno.
16“Arîa magaakûonaga magaagûkûûragîra metho makîûragia:
‘Ûyû nîke mûndû ûrîa watûmaga nthî îteteme,
na agatûma mothamaki mainaine?
17Nîke watûmire nthî îtuîka ta werû,
na agîcûkangia matûûra mayo,
na akîgiria andû arîa moovetwe macoke kwao mîciî?’
18Athamaki onthe a mavûrûri mathikîtwe na gîtîîo,
wa mûthamaki mbîrîrarî yake;
19nwatî we ûtetwe nja kûraca na mbîrîra yaku,
wîkariî ta kîvuno kîrî na magigi,
kimba gîaku nî gîkinyange,
gîkunîkîrîtwe nî ciimba cia andû maûragîtwe na rûviû,
na gîgaikua îrimarî rîa mathiga.
20Nwatî we tîûthikwa na gîtîîo ta athamaki acio,
nîûndû nîwacûkangirie vûrûri waku,
na ûkîûraga andû aku.
Njiarwa cia eki naaî itikaaririkanwa tene na tene.
21Îîvarîrieni kûûraga ciana ciake nîûndû wa mavîtia ma methe mao,
nîguo matigacoke kwatha nthî,
na mamîcûrie matûûra mao.”
Ngai nîagaacûkangia Babuloni
22Ngai-Mûnene mwene vinya wonthe arauga atîrî, “Nîngaacûkangia îtûûra rîa Babuloni na nîrîthirie viû. Nîngaacûkangia indo cionthe, ciana na mûndû wa wonthe ûtigarîte arî mwoyo. Nie Ngai-Mûnene, nînie nauga ûguo. 23Nîngaatûma îtûûra rîu rîtuîke rîa gûtûûrwa nî Tûtiti, na rîtuîke maria ma manjî. Ngaathiria indo cionthe Babuloni gwîkare ta kûvatîtwe na kîvati. Nie Ngai-Mûnene mwene vinya wonthe, nînie nauga ûguo.”
Ngai-Mûnene nîagaacûkangia Asîria
24 #
Isa 10.5-34; Nah 1.1—3.19; Zef 2.13-15 Ngai-Mûnene mwene vinya wonthe evîtîte akauga atîrî,
“Ûrîa mvangîte nîguo gûgeekîka,
na ûrîa nduîte nîguo gûkaavinga.
25Nîngaathiria Asîria arîa marî vûrûrirî wakwa,
na nîmakinyangîre irîmarî ciakwa.
Nîngaaruta andû akwa ûkomborî wa Asîria,
na nîmaûre mûrigo ûrîa mamakuuithîtie.
26Ûyû nîguo mûvango ûrîa mvangîrîte nthî yonthe;
na rîîrî nîrîo îvera rîrîa ngaaverithia mavûrûri monthe narîo.”
27Ûndû ûrîa Ngai-Mûnene mwene vinya wonthe avangîte gwîka,
nû ûngîmûgiria?
Rîrîa araverithania nû ûngîmûgiria?
Ngai nîagaacûkangia Afilisiti
28 #
2Atha 16.20; 2Maû 28.27 Mwakarî ûrîa Mûthamaki Ahazi aakwire, Ngai nîwavecanire ndûmîrîri îno:
29 #
Jer 47.1-7; Ezek 25.15-17; Joe 3.4-8; Amo 1.6-8; Zef 2.4-7; Zak 9.5-7 “Mue andû onthe a Filisiti, mûtigakene,
atî nîûndû mûragi ûrîa mwarivirwe naguo nî munîkangu;
nîûndû njoka îtarî ûrogi nîgaaciara kîmvuva,
nakîo kîmvuva nîgîgaaciara njoka mbaganu makîria.
30Marikithathi ma athîni nîmakaagîa na irio cia kûrîa,
na mamamage marî na thayû.
Nwatî mue Afilisiti, nîngaathiria rûciaro rwenyu na yûra,
na ûrîa ûgaatigara arî mwoyo nîngaamûraga.
31“Rîrani mue matûûra monthe ma Afilisiti!
Mue Afilisiti muonthe, gîani na guoya!
Nîûndû rûkûngû rwa athigari rûkîte rumîte mwena wa rûgûrû:
nî gîkundi Kîam athigari matarî guoya.”
32Anjaama arîa makaauma vûrûrirî ûcio magaacokerua atîa?
Makerwa atî, Ngai-Mûnene nîatumîte îtûûra rîa Zayuni,
kûu nîkuo andû ake arîa marî na thîna maûragîra.
Currently Selected:
Isa 14: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
