Isa 13
13
Ngai nîakaaverithia Babuloni
1 #
Isa 47.1-15; Jer 50.1—51.64 Îno nî ndûmîrîri îgiî Babuloni îrîa Isaia, mûvîcî wa Amozu oonirue nî Ngai.
2Ngai augîte atîrî,
“Vandani vendera îgûrû rîa kîrîma gîtarî na mîtî,
ugîrîriani mwîte athigari, na mûmavenerie na njara,
nîguo matonyere kîvingo gîa îtûûra rîa andû arîa marî îgweta.
3Nie mwene nîmbathîte arîa nyamûrîte,
nîmbîtîte andû akwa arîa njamba
arîa makenaga rîrîa navootana,
makarûe na arîa mandakarîtie.”
4Tathikîrîriani înegene rîrîa rîrî irîmarî îgûrû,
nîta rîa andû eengî mûno!
Tathikîrîriani înegene rîa mothamaki na mavûrûri magomanîte vamwe.
Ngai-Mûnene mwene vinya wonthe
nîaravarîrîria athigari ake a mbaara.
5Maûkîte maumîte mavûrûri ma kûraca,
maumîte mîthiia yonthe ya nthî.
Ngai-Mûnene arî na marakara akuuîte indo ciake cia mbaara,
nîguo acûkangie nthî yonthe nîûndû wa marakara make.
6 #
Joe 1.15
Rîrani, nîûndû mûthenya wa Ngai-Mûnene ûrî vakuvî,
ûgaaûka wîkariî ta mûthiro kuuma kûrî mwene vinya wonthe.
7Kwoguo njara cia andû onthe nîikaaregera,
na ngoro cia andû onthe iringîke.
8Nîmakegua guoya na ruuo,
megue ruuo ta rwa mûndûmûka akîgîa mwana.
Makaaroranagia wa mûndû amakîtue nî ûrîa wîngî,
namo mothiû mao makethîrwa mecûrîtwe nî nthoni.
9Taroria, mûthenya wa Ngai-Mûnene nîûgaakinya,
mûthenya mûcûku wa marakara meengî na mang'ûrîka.
Nthî nîgaacûkangua, nao andû evia arîa marî kuo mathirue viû.
10 #
Ezek 32.7; Mat 24.29; Mar 13.24-25; Luka 21.15; Kûguû 6.12-13 Njata cionthe wana irîa ciîthagîrwa irî itutu nîigaatiga gûkenga;
riûa rîkaaratha rîkariî ta nduma,
naguo mweri ndûkaara.
11Ngai-Mûnene arauga atîrî,
“Nîngaaverithia nthî nîûndû wa waganu wayo,
na mverithie andû arîa aganu nîûndû wa mevia mao.
Nîngaathiria mwîtîîo wa andû arîa eyambî,
na nthirie mwîcaaro wa andû arîa matarî ntha.
12Nîngaatûma andû matigare anini gûkîra thaavu îrîa mbaro mûno;
nao andû makethîrwa marî anini gûkîra thaavu ya Ofiri.
13Kwoguo nîngaatûma îgûrû rinaine,
na nthî nîkaathingitha yume vandû va yo,
mûthenya ûrîa nie, Ngai-Mûnene mwene vinya wonthe,
ngonania marakara makwa manene.
14“Wa mûndû akaavinyûraga ta nthwariga îkîvîtwa,
ta ng'ondu itarî na mûrîthi,
wa mûndû nîagaacoka kûrî andû ake,
na wa mûndû nîakaaûra athiî vûrûrirî wake.
15Mûndû wa wonthe ûkoonwa nîakaamundwa na rûviû,
na mûndû wa wonthe ûkaanyitwa nîakaaûragwa.
16Ciana ciao cia ngenge nîikaaûragwa wa makîyonagîra;
indo cia nyomba ciao nîigaatavwa,
na aka ao mamenywe kîîmwîrî na vinya.”
17Ngai-Mûnene arauga atîrî,
“Nîngaaringîrîra Amede#13.17 Amede: Andû a vûrûri arîa marî gatagatî ka mwena wa rûgûrû na îrathîro wa Babuloni, arîa maatuîkire amwe a ûthamaki wa Perisia. nîguo matharîkîre Babuloni.
Mavûrûri mama matiûragia sîlûva,
na matikenagua nî thaavu.
18Nîmakaaûraga andû ethî na mîguî yao,
matikeguîra ciana ntha,
kana macaîre ciana cia ngenge.
19 #
Kîam 19.24
Babuloni îrî riiri gûkîra mothamaki monthe;
ûnene waguo nîûtûmaga Akalidei metîîa.
Nwatî nie Ngai-Mûnene ngaacûkangia îtûûra rîu,
wata ûrîa nacûkangirie Sodomu na Gomora.
20Îtûûra rîu rîtigacoka gûtûûrwa nî andû,
kana rîkarwa nî njiarwa tene na tene.
Gûtirî Mûarabu ûkaamba îgema rîake kuo,
na gûtirî mûrîthi ûkaarîthia ndîthia yake kuo.
21 #
Isa 34.14; Zef 2.14; Kûguû 18.2 Vandû va ûguo, gûgaatûûrwa nî nyamû cia kîthaka,
na nîkuo irwîgî igaatumaga ciomba ciacio.
Nyaga nîcio igekaraga kuo,
na mbûri cia kîthaka irûgarûgage kuo.
22Mviti nîikaarîraga irî nyombarî ndaca na îgûrû,
nacio ciathi igambage irî nyombarî irîa ciarî ciao athamaki.
Îvinda rîa Babuloni rîrî vakuvî!
Mîthenya yarîo îrî vakuvî kûthira.”
Currently Selected:
Isa 13: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
