Isa 11
11
Ûthamaki wa thayû
1 #
Kûguû 5.5; 22.16 Nîgûkaaumîra mûthamaki kuuma njiarwarî cia Jesii,
ta ûrîa rûvûa rûkûraga kuuma mûtîrî.
2Nîagecûrwa nî Roho wa Ngai-Mûnene,
roho wa ûûgî na ûtaûku;
roho wa ûtaarani na vinya,
roho wa ûmenyo na gwîtigîra Ngai-Mûnene.
3Nîagaakenagua nî kwathîkîra Ngai-Mûnene.
Ndagaatucanagîra kûringana na ûrîa metho make monaga,
kana atue ûndû kûringana na ûrîa matû make megucaga.
4 #
2Ath 2.8
Agaatucagîra athîni na ûthingu,
na atucagîre andû arîa matarî vinya gûkû nthî na waragania.
Nîakaaverithia nthî na kiugo gîake,
na aûrage andû arîa aganu na mûgambo wake.
5 #
Aef 6.14
Ke akaathanaga na ûthingu na wîvokeku.
6 #
Isa 65.25
Ciathi igaatûûranagia na tûgondu,
itang'a ikaamamaga vamwe na twori twa mbûri.
Tûcaû na twana twa mûnyambû ikaarîcaga vamwe,
na igaatongoragua nî kaana kanini.
7Ng'ombe na ngatûnyi ikaarîcaga vamwe,
natuo tûcaû twacio tûkaamamaga vamwe na thayû.
Mînyambû nîkaarîcaga nyaki ta ng'ombe.
8Gakenge gakaathakagîra vakuvî na îrima rîa njoka,
mwana nîagaatonyia njara îrimarî rîa kîmvuva.
9 #
Hab 2.14
Kîrîmarî kîrîa kîtheru Kîam Ngai,
gûtigativanua kana gwîkwa maûndû macûku.
Nîûndû nthî îkethîrwa îcûrîte ûmenyo wa Ngai-Mûnene,
ta ûrîa manjî methagîrwa mecûrîte îriarî.
Andû arîa marî îthamîriorî nîmagaacoka
10 #
Aro 15.12
Mûthenya ûcio mûthamaki mûcerû wa rûciaro rwa Jesii akethîrwa arî kîonereria kûrî andû. Mavûrûri nîmakaathiî gwake mûciî îtûûrarî rîake rîrîa rîrî riiri. 11Mûthenya ûcio, Mwathani nîagaatambûrûkia njara yake rîngî nîguo acokie andû ake arîa matigarîte Sîria, Misiri, Pathirosi, Ethiopia, Elamu, Shinari, Hamathi na icîgîrîrarî cia îria.
12Nîagaaûkîrîria vendera ya kwonia mavûrûri,
atî nîakaaûngania andû a Isiraeli arîa matarî kîene,
nîakaaûngania andû a Juda arîa manyaganîtie mîthiiarî îna ya nthî.
13Wîru wa Efiraimu kûrî Juda nîûkaathira,
na Efiraimu na Juda matikethîrwa marî nthû rîngî.
14Efiraimu na Juda marî vamwe nîmakaatharîkîra Afilisiti mwena wa îthûîro.
Nîmakaavoota andû a Edomu na a Moabu,
nao andû a Amoni mamathîkîre.
15 #
Kûguû 16.12
Ngai-Mûnene nîaakanyarithia Îria Îtune,
na arete rûkûngi rûviû nîguo rûnyarithie rûnjî rwa Farati,
na arûgaanie rûtuîke tûrûnjî mûgwanja,
nîguo andû maringage na magûrû.
16Nîgûkaagîa na njîra nene yumîte Asîria,
nîûndû wa andû ake arîa maatigarire kuo,
wata ûrîa gwekîkire kûrî andû a Isiraeli rîrîa maaumaga Misiri.
Currently Selected:
Isa 11: KKB
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
