Ũĩ 8
8
Ũndũ Solomoni Wendete Ũĩ
1Vinya wa Ũĩ ũnyaĩĩkaa kĩla vandũ ĩũlũ wa nthĩ,
na Ũĩ avangaa syĩndũ syonthe nesa.
2 #
Sil 15.2
#
Sil 15.2
Nĩnendie Ũĩ na namũmantha kuma nĩ wa mũika,
nĩnendeeiw'e nĩ kũmwosa atw'ĩke mwendwa wakwa;
nĩnakusiw'e mũno nĩ wanake wake.
3Ũĩ nũkumasya wumo wake wĩ ndaĩa kwa kwĩkalany'a na Ngai,
nake Mwĩai wa onthe nũmwendete.
4 #
Nth 8.27-30
Ũĩ nĩwĩsĩ ũmanyi wa Ngai,
na nũtethasya wĩa vamwe nake.
5Ethĩwa ũthwii nĩ kĩndũ kya kwendeesya thayũnĩ ũũ,
ũthwii nĩ kyaũ ũisyaanĩw'a na Ũĩ ũla ũtongoeasya maũndũ onthe?
6Ethĩwa ũmanyi nĩ kĩndũ mũndũ waĩlĩte kwĩthĩwa nakyo,
vai kĩndũ kĩseo mbee wa Ũĩ ũla ũseũvasya syĩndũ syonthe.
7Ethĩwa mũndũ nĩwendete ũlũngalu,
ũsyao wa Ũĩ nĩ mwĩkalo mũseo,
nĩkwĩthĩwa Ũĩ amanyĩasya wĩting'o na ũmanyi,
ũsili wa katĩ na ũkũmbaũ.
Thayũnĩ wa mũndũ vai kĩndũ kĩseo ta kwĩthĩwa na syĩndũ isu.
8Ethĩwa ve mũndũ o na wĩva ũkwenda kwĩthĩwa na ũmanyi mwingĩ,
Ũĩ nĩwĩsĩ maũndũ ma tene na nũtonya kũweta maũndũ ala mokĩte;
nĩwĩsĩ kũvuany'a nthimo sya andũ na kũsũngĩa ndaĩ.
Nĩwĩthĩawa esĩ syama na maũndũ ma kũseng'ya ala meĩkĩka,
na maũndũ ala meĩkĩka mavinda mamina kũvĩta.
9Kwoou nĩnatwie kwosa Ũĩ nĩkalanasye nake,
nũndũ nĩneesĩ kana nũkũnenga ũtao mũseo,
na kũmbĩkĩa vinya ĩvindanĩ ya kĩũũyũ na kyeva.
10Nũndũ wa Ũĩ ngeethĩwa na ũkumyo andũnĩ aingĩ,
na atumĩa makanenga ndaĩa o na kau nĩ wa mũika.
11Ngooneka nĩ na ũĩ mwingĩ yĩla ngumya ũtw'ĩo,
na asumbĩ makendeeaw'a ninyie.
12Yĩla navindya makambeteelaa nĩneene,
na yĩla ngũneena makateaa kũtũ mew'e.
Yĩla naneena ĩvinda ĩasa,
makambĩthukĩĩasya mavindĩtye ki.
13Nũndũ wa Ũĩ, ngeethĩwa na thayũ wa tene na tene,
na ala meũka ĩtina wakwa makandilikanaa ĩvinda yonthe yĩla yũkĩte.
14Ngasumbĩka mbaĩ sya andũ,
na nthĩ ikeethĩwa ungu wa ũtongoi wakwa.
15Asumbĩ ala masumbĩkaa na vinya makangĩa yĩla meĩw'a ũvoo wakwa.
Ngoony'a andũ ũtonyi wakwa na ũkũmbaũ wakwa kaũnĩ.
16Yĩla nalika nyũmba kwakwa, ngathũmũaa vamwe na Ũĩ,
nĩkwĩthĩwa kwĩkalany'a nake kũietae woo,
na kwĩthĩwa ngwatanĩo nake kũietae mathĩna, ĩndĩ kwĩ ũtanu na mũyo.
17Nĩnavindĩĩisye maũndũ asu ngoonĩ yakwa,
na namasũanĩa kĩlĩkonĩ kyakwa,
kana kũtwaana na Ũĩ kũkatuma nĩkala thayũ tene na tene.
18Nĩnamanyie kana kũtuma ndũũ nake, nĩ kwĩthĩwa na ũtanu mwĩanĩu,
na kũthũkũma wĩa wake nĩ kũkwata ũthwii ũtathela;
kwĩkalany'a nake nĩ kwĩthĩwa na ũmanyi,
na kũneenany'a nake nĩ kwĩthĩwa na nguma,
nĩnaendie kũmũmantha nĩ kana atw'ĩke wakwa.
19Yĩla naĩ kana, naĩ na kĩnengo kya kwĩka maũndũ,
na naĩ na thayũ mũseo.
20Ĩndĩ nũndũ naĩ mũseo,
nĩneethĩiwe na mwĩĩ ũte mũvukye.
21Ĩndĩ nĩnamanyie kana ndyaĩ ndonya kũkwata Ũĩ ate o nĩnengetwe we nĩ Ngai,
na kwĩthĩwa namanyie kana Ngai e weka nowe waĩ atonya kũnenga Ũĩ, ũsu waĩ wonany'o wa kwĩthĩwa na ũmanyi.
Kwoou nĩnamũvoyie Mwĩai, na namwĩsũva na thayũ wakwa w'onthe nasya atĩĩ:
Currently Selected:
Ũĩ 8: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011