Ũĩ 7
7
Mũsumbĩ no ũndũ Ũmwe na Andũ ala angĩ
1Nyie nĩ mũndũ ũkusaa o ta andũ ala angĩ onthe,
nĩ nzyawa ya mũndũ ũla woombiwe mbee kuma mũthanganĩ.
Nĩnoombĩiwe ĩvunĩ ya inyia wakwa natw'ĩka mwĩĩ,
2ĩvindanĩ ya myei kenda mwĩĩ wakwa nĩwoombĩiwe ĩvunĩ ya inyia wakwa,
kuma mbeũnĩ ya mũndũ-ũme na ũtanunĩ wa mũtwaano.
3Yĩla nasyaiwe, nĩnambĩĩie kũveva nzeve ĩla ĩvevawa nĩ andũ ala angĩ,
nookie nthĩ o ĩla numĩtw'e,
na wasya wa mbee ũla naumisye waĩ kũĩa o ta andũ ala angĩ.
4Nĩnavw'ĩkiwe ngũa sya kaũkenge, nasũvĩwa mũno.
5Nĩkwĩthĩwa vai mũsumbĩ waambĩĩa kwĩkala thayũ kwa nzĩa ĩngĩ.
6Andũ onthe mokaa ĩũlũ wa nthĩ kwa nzĩa o ĩmwe, na maumaa vo kwa nzĩa o ĩmwe.
7 #
1Asu 3.6-9; Ũĩ 9.1-18 Kwoou nĩnavoyie, na nanengwa ũmanyi;
nĩneekaĩlile Ngai, na veva wa Ũĩ walika nthĩnĩ wakwa.
8Nĩnendie Ũĩ mũno mbee wa ndata sya kĩ-ũsumbĩ na ivĩla sya kĩ-ũsumbĩ,
na noona ũthwii wĩ wa mana naũsianĩsya na Ũĩ.
9O na ndyaamwĩanany'a na mavia me thooa mũnene mũno,
nũndũ thaavu w'onthe ũisianĩw'a na Ũĩ nĩ ũndũ ũmwe na kĩthangathĩ kĩnini,
na silĩva ũisianĩw'a nake nĩ ũndũ ũmwe na ndaka.
10Nĩnamwendie mbee wa ũima wa mwĩĩ na wanake,
na nanyuva kwĩthĩwa nake vandũ va kwĩthĩwa na kyeni,
nũndũ kyeni kyake kĩithelaa o na ĩndĩĩ.
11Yĩla Ũĩ wookie, syĩndũ syonthe ila nzeo nĩsyookie vala nĩĩ,
andeteie ũthwii mwingĩ mũno.
12Nĩnatanĩie syĩndũ isu syonthe, nũndũ naieteiwe nĩ Ũĩ,
ĩndĩ ndyamanyaa kana Ũĩ nĩwe inyia wa syĩndũ isu syonthe.
13Nĩneemanyĩisye nde na ũseleke, na nĩnĩmanyĩasya ndekũnyungunyĩsya;
ndivithaa ũthwii wa kwĩthĩwa na Ũĩ.
14Nĩkwĩthĩwa Ũĩ nĩ ũthwii ũtathelaa wa andũ,
ala makwataa Ũĩ matw'ĩkaa anyanyae ma Ngai;
nũĩkĩĩthasya maũndũ onthe ala twĩmanyĩasya kuma vala ve Ũĩ.
15Nĩvoya Ngai andethye nĩneene kwĩanana na kwenda kwake,
na ndyĩthĩwa na mosũanĩo mekwonany'a kĩla ngwatĩte.
Nĩkwĩthĩwa Ngai mwene nĩwe ũtongoeasya Ũĩ,
nũtũngaa ala oĩ nzĩanĩ.
16Ithyĩ vamwe na ndeto sitũ twĩthĩawa twĩ mokonĩ make,
o tondũ ũmanyi w'onthe, na ũmanyi wa kũseũvya syĩndũ wĩ mokonĩ make.
17Nĩkwĩthĩwa nĩwe wanengie ũĩ wa w'o wa kũmanya syĩndũ ila syĩkw'o;
kũmanya ũndũ nthĩ yũmbĩtwe ĩilyĩ, na ũndũ syĩndũ ila imĩkwatanĩtye iilyĩ.
18Nĩwanengie kũmanya ũndũ mavinda mambĩĩaa, ũndũ mathelaa, na mavinda ma katĩ katĩ;
moalyũku ma ũndũ syũa yĩendaa na ma mavinda,
19mavinda me kĩvathũkany'o ma mwaka, na nguthu sya ndata.
20Nũmanyĩĩtye mĩkalĩle ya nyamũ na kũthilĩka kwa nyamũ sya kĩthekanĩ,
mavinya ma maveva na mosũanĩo ma andũ;
mĩthemba ya mĩmea na ũseo wa mĩi ya yo.
21Nĩnamanyie maũndũ ala mavithany'e na ala mavuany'e,
22nũndũ Ũĩ ũla nĩwe woombie syĩndũ syonthe nĩwamanyĩisye.
Ũndũ Ũĩ Ũilyĩ
Nthĩnĩ wa Ũĩ ve veva wa ũmanyi na ũtheu,
veva wa mwanya, na wĩyonanasya kwa nzĩa mbingĩ,
veva ũtamanyĩkaa mĩtũkĩ, ũtonya kũthi,
ũtevithanĩtye, ũte mũvukye, wa mwanya, na ũtatonya kwanangwa.
Veva wendete ũseo, wĩ kĩthito, na ũtasiĩĩwa nĩ kĩndũ.
23Veva ũsu nĩ mũlau na wĩ tei,
veva ũsu nĩ mũlũmu, wa kũĩkĩĩwa na ũte nzika,
wĩ vinya, wĩ ũtonyi wa kwona maũndũ onthe,
ũlikaa mathayũnĩ onthe ala me kĩlĩko,
matheu, na matamanyĩkaa mĩtũkĩ.
24Nĩkwĩthĩwa Ũĩ nũendaa vate thĩna mbee wa kĩndũ o na kĩva kĩla kĩendaa,
na nũndũ wa ũtheu waw'o nũendaa na kũlika syĩndũnĩ syonthe.
25Ũĩ nĩ mĩthũmũ ya vinya wa Ngai,
nĩ wumo mũtheu wa ũkumyo wa Mwene Ũtonyi W'onthe;
kwoou vai kĩndũ kĩvuku o na kĩva kĩtonya kũlika nthĩnĩ wa Ũĩ.
26Ũĩ wonanasya kyeni kya tene na tene,
kĩoo kĩtheu kya maũndũ ala Ngai wĩkaa, na wonany'o wa ũseo wake.
27O na kau Ũĩ nowe e weka, nũtonya kwĩka maũndũ onthe;
nũtw'ĩkĩthasya maũndũ onthe meũ, o na kau we mwene ndaalyũkaa.
Kuma nzyawa ĩmwe kũthi ĩla ĩngĩ nũlikaa mathayũnĩ ma ala atheu,
na kũtuma matw'ĩka anyanyae ma Ngai na athani.
28Nĩkwĩthĩwa Ngai endete mũndũ ũla wĩkalanasya na Ũĩ mbee wa syĩndũ ila ingĩ syonthe.
29Ũĩ nĩ mwanake mbee wa syũa,
na mbee wa nguthu syonthe sya ndata;
nĩwe mũseo mbee wa kyeni,
30nĩkwĩthĩwa ĩtina wa kyeni kya mũthenya, ũtukũ nĩwũkaa,
ĩndĩ ũthũku ndũsinda Ũĩ.
Currently Selected:
Ũĩ 7: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011