Ũĩ 6
6
Wĩa wa Asumbĩ
1Ĩthukĩĩsyei inyw'ĩ asumbĩ na mũimanya;
ĩmanyĩsyei inyw'ĩ asili onthe ĩũlũ wa nthĩ.
2Teai kũtũ inyw'ĩ ala mũsumbĩkaa andũ aingĩ,
na mwĩkathĩĩaa nũndũ nĩmũsumbĩkĩte nthĩ mbingĩ.
3 #
Alo 13.1
Mwanengiwe ũtonyi wenyu wa kũsumbĩka nĩ Mwĩai,
na ũsumbĩ wenyu mwanengwa nĩ Ũla wĩ Ĩũlũ Mũno.
Akenda kũmanya maũndũ ala mwĩkaa,
na aikũlĩĩlya mĩvango yenyu.
4Nĩkwĩthĩwa inyw'ĩ ta mwĩ athũkũmi ma ũsumbĩ wake, mũyaasumbĩka kwa nzĩa ĩla yaĩlĩte,
mũyaaĩanĩsya mĩao,
o na mũyaaĩkala kwĩanana na mũvango wa Ngai.
5Akooka kũla mũĩ kwa kĩthũlũmũko na kũmũkany'a vate tei,
nũndũ ala matongoetye makanaw'a na ũkany'o mwai.
6Andũ ala mate ũtonyi nĩmatonya kwĩw'ĩwa tei na kũekewa,
ĩndĩ ala me ũtonyi makasilĩlwa mũno.
7Nĩkwĩthĩwa Mwĩai wa andũ onthe ndakakĩa mũndũ o na wĩva,
o na ũnene wa mũndũ ndũtuma Mwĩai amũtaĩa.
We mwene nĩwe woombie andũ onthe; anene na anini,
na nĩwĩanĩasya mavata ma onthe o ũndũ ũmwe.
8Ĩndĩ akaatĩĩa mwĩkalo wa atongoi mũno.
9Kwoou ndeto ii nĩmũtavya inyw'ĩ asumbĩ,
nĩ kana mwĩmanyĩsye kwĩthĩwa na ũĩ na mũilea kũvĩtya.
10Nĩkwĩthĩwa ala mekaa maũndũ matheu maatĩĩe ũtheu, makatw'ĩkĩthw'a atheu,
na ala mamanyĩiw'e maũndũ asu makeethĩwa matonya kwĩtetea kĩsilĩlonĩ.
11Kwoou ĩthĩwai na wendi wa momanyĩsyo makwa;
endeew'ai nĩmo, na nĩmũũkwata ũmanyĩsyo.
Vata wa Ũĩ
12Ũĩ nũtisatisaa na ndatukaa,
nũmanyĩkaa vate thĩna nĩ ala mamwendaa,
ala mamũmanthaa nĩmamwonaa.
13Ũĩ nĩwĩkalaataa kwĩmanyĩthany'a kwa ala mamwendaa.
14Ũla ũamũkaa tene akamanthe Ũĩ ndakethĩwa na thĩna,
nĩkwĩthĩwa akamwĩthĩa ailyĩ mũvĩanĩ.
15Kũsũanĩa mũno ĩũlũ wa Ũĩ nĩ kũkwata ũmanyi mwĩanĩu;
ũla ũmũmanthaa na kĩthito akaeka kwĩthĩwa na kĩũũyũ.
16Ũĩ aendaa amanthĩte ala mamwaĩlĩte,
nĩwĩyonanasya na wendo nzĩanĩ syoo,
na nĩwĩthĩawa namo mosũanĩonĩ moo onthe.
17Wambĩlĩĩlyo wa Ũĩ nĩ yĩla mũndũ weethĩwa na wendi waw'o wa kũmanyĩw'a;
kwenda ũmanyĩsyo nĩ kwenda Ũĩ.
18Kwenda Ũĩ nĩ kwĩanĩsya mĩao yake,
na kwĩka ũndũ mĩao yake ĩkwasya nĩ ũĩkĩĩthyo wa kwĩkala thayũ tene na tene.
19Kwĩkala thayũ tene na tene nĩkũthengeanĩasya mũndũ na Ngai.
20Kwoou kwenda Ũĩ nĩkũtongoeasya mũndũ akasumbĩka.
21Kwoou ethĩwa inyw'ĩ ala mũsumbĩkaa andũ,
nĩmwendeeaw'a nĩ ivĩla syenyu sya kĩ-ũsumbĩ na ndata sya kĩ-ũsumbĩ,
nengai Ũĩ ndaĩa nĩ kana mũsumbĩke tene na tene.
22Nĩngũmũtavya Ũĩ nũũ, na wumo wake,
na ndimũvitha ũndũ o na ũmwe.
Ĩndĩ nĩngũmanthana na wumo wake,
kuma mwambĩlĩĩlyonĩ wa kũmbwa kwa syĩndũ.
Nĩngũtuma Ũĩ amanyĩka vyũ,
na nditia ũw'o o na ũmwe ĩũlũ wake.
23Ndikaendany'a na kĩwĩu kĩla kĩthũku,
nũndũ kĩwĩu kĩi ngwatanĩo na Ũĩ.
24Andũ aingĩ oĩ nĩmaeteae nthĩ ũtangĩĩo,
na mũsumbĩ wĩ na ũmanyi nĩwĩkwataw'a nĩ andũ make.
25Kwoou ĩmanyĩsyei kuma ndetonĩ syakwa,
na nĩmũũtetheka.
Currently Selected:
Ũĩ 6: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011