Ũĩ 5
5
Mĩlilo ya Andũ ala Athũku
1Ĩvindanĩ yĩu ya ũsilĩlo, mũndũ ũla mũlũngalu akaũngama na ũkũmbaũ mũnene,
e mbee wa ala mamũthĩnasya yĩla waĩ thayũ,
na ala mavũthasya wĩa wake.
2Yĩla memwona, makatetema me na w'ĩa mwingĩ,
na makaseng'a moona aitangĩĩwa matataĩĩe.
3Makaneenany'a ũmwe na ũla ũngĩ mayĩlila,
na me na woo mwingĩ mũno thayũnĩ makaluma na kwasya atĩĩ:
4“Ũũ nĩwe mũndũ ũla twavũthasya,
na twamũneeneaa ndeto sya kĩvũthya.
Ithyĩ twaĩ andũ atumanu!
Twasũanĩaa kana ekalaa ta mũndũ wa ndũũka,
na yĩla wakwie tũyaamũnenga ndaĩa.
5Twĩkũlya atĩĩ, yu kwatonyeka ata ethĩwe e ũmwe katĩ wa ana ma Ngai?
Nĩkĩ wĩ na kĩanda katĩ wa ala atheu?
6Kwoou nithyĩ twaendie ũtee wa nzĩa ĩla ya w'o,
na tũyaaĩkala kyeninĩ kya ũlũngalu,
o na tũyaaona kyeni o na kĩmwe kyaw'o.
7Twekalile thayũ wa kũlea kwĩanĩsya mĩao na wa wanangĩko,
na nĩtwangangie weũnĩ ũte nzĩa,
o na tũyaamanya nzĩa sya Mwĩai.
8Ngathĩĩo sitũ ĩtũtethetye ata?
Ũthwii witũ ũla tweekathĩĩaa naw'o ũtũeteete ũseo mwaũ?
9Maũndũ asu onthe yu mavĩtũkĩte ta kyuu,
na ta ndeto ite sya w'o ila ineenawa na iyũla.
10Nĩ ũndũ ũmwe na meli ĩla yĩsĩlaa kĩw'ũnĩ kĩna itulumo;
yamina kũvĩta, vayĩthĩawa kĩndũ o na kĩmwe kya kwonany'a kana nĩyavĩta.
11O ta ũu nĩ ũndũ ũmwe na yĩla nyũnyi yaũlũkĩla yayayanĩ,
vai kĩndũ kĩtiawa kya kwonany'a vala yesĩla.
Nĩkũnaa nzeve mbũthũ na nthwau syayo,
ĩkesĩla vo nũndũ yĩthĩawa ĩendete na mĩtũkĩ,
ĩtwaĩtwe nĩ nthwau syayo,
ĩndĩ ndĩtiaa kĩndũ kya kwonany'a kana nĩyesĩla vo.
12O ĩngĩ nĩ ũndũ ũmwe na yĩla ĩangi yekw'a yaatha kĩndũ;
vala ĩangi yĩu yesĩla nzeve nĩtaanĩasya na ĩisyokeanĩa ĩngĩ,
ũyĩthĩa vai mũndũ ũtonya kũmanya vala yesĩla.
13O naitũ now'o tũilyĩ, twamina kũsyawa oou, nĩtwaekie kwĩthĩwa vo,
tũyaĩ na wonany'o wa ũseo twaatia,
ĩndĩ nĩtwaminiwe nĩ mothũku maitũ.”
14Wĩkwatyo wa mũndũ ũla ũtamwĩsĩ Ngai,
nĩ ũndũ ũmwe na mavuti makuĩtwe nĩ kĩseve;
nĩ ũndũ ũmwe na ĩvũyũ yĩkuĩtwe nĩ kĩuutani,
nĩyĩvalaanaw'a nĩ kĩseve ta syũki,
na nĩyũlaa ũndũ mũeni wathoka mũthenya ũmwe wũlaa.
15Ĩndĩ ala alũngalu nĩmekalaa thayũ tene na tene,
na ĩtuvi yoo yĩna Mwĩai.
Ũla wĩ Ĩũlũ Mũno nũmasũvĩaa.
16Kwoou Mwĩai akamanenga ngovia ya kĩ-ũsumbĩ ya ndaĩa,
na kĩlaũnĩ kyanake.
Nĩkwĩthĩwa akamasũvĩa na kw'oko kwake kwĩ vinya,
na akamaseseea na kw'oko kwake.
17 #
Aev 6.11-17
Mwĩai akoosa wendo wake mũnene wĩthĩwe ta w'o mĩio yake ya kaũ;
akanenga syũmbe syonthe mĩio ya kaũ ilũngye amaitha make.
18Ũlũngalu ũkeethĩwa ta w'o ngao yake ya kĩthũi,
na ũsili wa katĩ ũte na wendeesyo ũkeethĩwa ta w'o ngovia yake ya kwĩsiĩĩa mũtwe.
19Ũtheu ũkeethĩwa ta w'o ngao yake ndũmu.
20Akanoa ũthatu wake mwai ũtw'ĩke ũvyũ,
syũmbe syonthe ikeethĩwa vamwe nake kũkita amaitha make ala mate kĩlĩko.
21Kyeni kya ũtisi kĩkathi kĩathe vandũ kĩtekũvĩtya;
kuma matunĩ kĩkaatha vala kyaĩlĩte kũatha ta maangi mekĩtw'e na ũta mũlũmu.
22Mbua ya mavia ĩkauĩĩa amaitha make yĩna vinya ta mavia mekĩtw'e na kĩkũtha,
kĩw'ũ kya ũkanga kĩkamokĩa na vinya,
na kĩw'ũ kya mbũsĩ kĩkamamina kĩte na tei.
23Kĩseve kĩna vinya kĩkauutanĩa vala maĩ,
na kĩkamaũlũkya ũndũ mavuti maũlũkaw'a nĩ kĩuutani.
Kũlea kwĩanĩsya mĩao kũkaananga nthĩ yonthe,
na kwĩka mothũku kũkatuma mosumbĩ mavalũka.
Currently Selected:
Ũĩ 5: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011