Ũĩ 4
4
1 #
Sil 16.3
Nĩ kavaa mũndũ akethĩwa ate na syana na e mũseo,
nũndũ ũseo wake ũkalilikanawa tene na tene,
na nĩwĩsĩkĩe nĩ Ngai na andũ.
2Yĩla ũseo wooneka andũ nĩmosaa ngelekany'o yaw'o,
yĩla ũte vo andũ nĩmawĩliĩlaa.
Kĩla ĩvinda ũseo ũendaa wĩkĩĩtwe ngovia ya ũsindi,
nĩ mũsindi masindanonĩ ala manenganawe mĩthĩnzĩo ĩte mĩvuku.
3Ĩndĩ syana mbingĩ sya andũ matamũkĩaa Ngai nĩ sya mana,
na vai kamwe ka syana syoo sya ũlaalai kakaumya mĩi mĩliku,
kana kwĩthĩwa na wambĩlĩĩlyo mũlũmu.
4Kwa kavinda nĩmatonya kwĩthĩwa na mbonge,
ĩndĩ nũndũ mai na mĩi mĩlũmu makathingithw'a nĩ kĩseve,
na maikũwa nĩ vinya wa kĩuutani.
5Mbonge syoo ikatũlĩka itanamba kwĩana,
na matunda moo makeethĩwa ma mana,
maikew'a maĩwe; nĩ ma mana vyũ.
6Syana isyaĩwe ũlaalainĩ,
ikakũsĩĩa ũthũku wa asyai masyo,
yĩla Ngai wĩmasilĩla.
7Ĩndĩ mũndũ mũlũngalu o na akw'a e wa mũika,
akakwata ũthũmũo.
8Nĩkwĩthĩwa ũkũũ ndũnengawe ndaĩa nũndũ wa ũasa wa thayũ wa mũndũ,
o na ndũthimawa na wingĩ wa myaka.
9Ĩndĩ ũĩ nĩ wonany'o wa ũima,
na mwĩkalo mũseo nĩ wonany'o wa ũkũũ wa w'o.
Ngelekany'o ya Mũndũ Mũlũngalu
10 #
Mwa 5.21-24; Sil 44.16; Aevl 11.5 Ve mũndũ ũmwe wamwendeeasya Ngai, nake Ngai nĩwamwendete.
Yĩla watũaa katĩ wa eki ma naĩ, Ngai nĩwamwosie.
11Nĩwamũthamisye nĩ kana ũthũku ndũkaalyũle ũmanyi wake,
na ũkengani ndũkaluluutĩkye thayũ wake.
12Nĩkwĩthĩwa kũkusw'a nĩ ũthũku nĩkũsiĩĩaa mũndũ kwona ũla ũseo,
na wendi mwingĩ nũluluutĩkasya mũndũ mũlũngalu.
13Mũndũ ũsu akwatie ũlũngalu kwa ĩvinda ĩkuvĩ,
eanĩsya kĩla andũ angĩ mataĩ matonya kwĩanĩsya thayũnĩ woo w'onthe.
14Thayũ wake nĩwamwendeeasya Mwĩai,
kwoou Mwĩai amumya mĩtũkĩ ũthũkunĩ katĩ.
15Andũ nĩmoonie ũu na mayaamanya,
mayaaĩkĩa ũndũ ta ũsu ngoonĩ,
kana mumo na tei wa Ngai syĩkalaa andũnĩ make ala ũnyuvĩte,
na nũsũvĩaa atheu make.
Mũminũkĩlyo wa Andũ Athũku
16Mũndũ mũlũngalu ũla wakw'a,
akasilĩla ala me thayũ na matamũkĩaa Ngai.
Mũndũ wa mũika ũla ũminĩte kũvikĩa ũlũngalu mĩtũkĩ,
akasilĩla mũndũ mũkũũ ũte mũlũngalu.
17Nĩkwĩthĩwa andũ athũku makoona mũndũ mũĩ aikw'a,
ĩndĩ maikamanya Mwĩai amũvangĩĩe ata,
na amwĩkalĩtye e ũsũvĩonĩ nĩkĩ.
18Makoona na kũvũthya kĩkw'ũ kya mũndũ mũlũngalu,
ĩndĩ Mwĩai akamathekeea na kĩvũthya.
Yĩla mekw'a mĩĩ yoo ndĩkanengwa ndaĩa,
na makavũthw'a nĩ ala akw'ũ tene na tene.
19Nĩkwĩthĩwa Mwĩai akamang'atangany'a nthĩ amavindĩthye,
na kũmathingithya nginya myambĩlĩĩlyonĩ yoo.
Akamatia me athei ta weũ,
makakwatwa nĩ woo mwingĩ,
na vai mũndũ ũkamalilikana.
20Andũ ala athũku makooka ũsilĩlonĩ me na w'ĩa mwingĩ,
yĩla naĩ syoo syĩĩthĩwa iitalwa,
na meko moo mathũku makamasilĩla ũtheinĩ.
Currently Selected:
Ũĩ 4: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011