Ũĩ 18
18
Andũ ma Ĩsilaeli Maikwata Kyeni
1 #
Kuma 13.17-22
Ĩndĩ andũ maku atheu nĩmamulĩkĩlwe nĩ kyeni kĩnene mũno.
Amaitha moo nĩmeew'aa mawasya moo, ĩndĩ mayaĩ matonya kũmona,
na nĩmamatalile kwĩthĩwa aathime nũndũ mayaathĩna.
2Amaitha asu nĩmatũngie mũvea nĩkwĩthĩwa o na kau vau mbeenĩ nĩmathĩnasya andũ maku atheu,
andũ maku mayaameka ũndũ mũthũku,
na nĩmametisye ũekeo nũndũ wa maũndũ mathũku ala mamekĩte.
3We Ngai nĩwanengie andũ maku kĩtuĩ kya mwaki,
kĩmatongoeasye nũndũ mayeesĩ vala maendete,
nĩwamanengie syũa yĩuĩtye kwondũ wa kyalo kĩu kya ndaĩa.
4Amaitha moo maaĩlĩte kũvetewa kyeni na mayovwa kĩvindunĩ,
nũndũ nĩmoovie ana maku yela,
ala kwĩsĩla kwoo nthĩ yaaĩlĩte kũnengwa kyeni kĩtathelaa kya mĩao.
Kũkw'a kwa Makithathi ma Andũ Misili
5Yĩla matwie kũaa twana twa andũ maku atheu,
na kana kamwe katiwa na kesa kũtangĩĩwa,
we nĩwamakanisye kwa kũaa syana syoo mbingĩ,
na wamoaa onthe na kĩw'ũ kingĩ.
6Aaũmae maitũ nĩmataviw'e ĩũlũ wa ũtukũ ũsu ũtanamba kũvika,
nĩ kana matane maimanya kana maũndũ ala mathĩtwe maĩ ma kwĩkwatw'a.
7Andũ maku nĩmeeteelete kũtangĩĩwa kwa ala alũngalu,
na kũminwa kwa amaitha moo.
8O maũndũ ala weekie ũkany'e amaitha maitũ,
nomo weekie watũtaĩa kwa kũtwĩta tũtw'ĩke maku.
9Syana ntheu sya andũ aseo nĩsyaumasya nthembo kwa kĩmbithĩ,
na kwa ngoo ĩmwe nĩsyeetĩkĩlile kũatĩĩa mĩao mĩtheu,
nĩ kana andũ atheu makwatanĩae syĩndũ ũndũ ũmwe,
moathimo o na mĩisyo;
o na maĩ manambĩĩa kwina mbathi sya kũtaĩa ila syainawa nĩ aaũmae moo.
10Ĩndĩ nakyo kĩĩo kya amaitha moo nĩkyeew'ĩkaa kĩla vandũ,
na kĩĩo kyoo kĩ tei nũndũ wa syana syoo kyaĩ kĩla vandũ.
11Ngombo yakaniw'e o ũndũ ũmwe na mũnene wayo,
na mũsumbĩ akwatie wasyo o ũndũ ũmwe na andũ ala angĩ.
12Andũ onthe mookĩiwe nĩ kĩkw'ũ kwa nzĩa ĩmwe,
na meethĩwa na simba mbingĩ mũno itatalĩka.
Ũtalo wa ala matialile me thayũ waĩ mũnini,
ũkethĩa maitonya kũthika ala maĩ akw'ũ makathela,
nũndũ o kwa kavinda kanini syana syoo ila mendete mũno nĩsyooaiwe.
13O na kau nĩmaleile kũĩkĩĩa maũndũ onthe nĩkwĩthĩwa maĩkĩĩaa syama syoo,
yĩla makithathi moo mooaiwe,
nĩmamanyie kana andũ ma Ĩsilaeli maĩ ana ma Ngai.
14Yĩla kwakilĩtye ki kĩla vandũ,
na ũtukũ waĩ ũnathi mĩtũkĩ ũkavika katĩ,
15ndeto yaku ĩla yĩ vinya w'onthe nĩyaumie ĩtunĩ,
yauma kĩvĩlanĩ kyaku kya kĩ-ũsumbĩ,
yalika katĩ wa nthĩ ĩsu yatw'ĩĩwe kwanangwa,
yalika ta mũsikalĩ wĩyũmbanĩtye kũkita,
16akuĩte ũvyũ mũĩ eanĩsye mwĩao waku wa w'o.
Aũngamie na aetee syĩndũ syonthe kĩkw'ũ,
aũngyĩ ĩũlũ wa nthĩ mũtwe wake watinĩte ĩtunĩ.
17Nĩvo ĩndĩ saanĩ o ũsu andũ ma Misili mathĩniw'e nĩ mawoni mathũku ndotonĩ,
na mookĩwa nĩ w'ĩa kwa kĩthũlũmũko.
18Kĩla vandũ nthĩ ĩsu andũ nĩmavalũkangile makilĩlye kũkw'a,
na mamanyĩthya andũ kĩla kyatumaa makw'a.
19Ndoto ila mambie kwĩthĩwa nasyo
nĩsyamamanyĩthisye kĩla kyookĩte,
nĩ kana maikakw'e mateũmanya kĩla kyamathĩnasya.
Mboya ya Alũni Ĩitangĩĩa Andũ ma Ĩsilaeli Maikakw'e
20Andũ ala alũngalu o namo nĩmookĩiwe nĩ kĩkw'ũ,
ũwau mũthũku nĩwookĩie andũ aingĩ me weũnĩ,
ĩndĩ ũthatu waku we Ngai ndwaaendeea vandũ va ĩvinda ĩasa.
21Mũndũ ũmwe mũlũngalu nĩwookĩlile mĩtũkĩ amavoyee.
Nĩwaetie ũthũkũmi wake wĩthĩwe ta ngao ĩmasũvĩe,
nĩwavoyie na atoeesya ũvani wĩthĩwe nthembo ya wĩw'anĩthyo.
Nĩwasiĩĩie ũthatu ũsu na amina kĩkw'ũ,
na oonany'a kana aĩ mũthũkũmi waku.
22Ndaasinda ũthatu ũsu vinya kwa ũtonyi wa mwĩĩ,
o na ndaaũsinda na mĩio ya kaũ,
ĩndĩ aneenie ndeto na asinda ũla wakanasya andũ,
kwa kũmũlilikany'a mawĩvĩto na motianĩo ala wanengete aaũmae maitũ.
23Yĩla andũ maĩ manavalũkanganĩla me akw'ũ makethĩwa ivumbu,
nĩwalikile vau katĩ na asiĩĩa ũthatu,
nĩwaũsiĩĩie ndũkavikĩe andũ ala me thayũ.
24Eekĩĩte ngũa ndaasa yakululĩtye nthĩ yonthe,
na masyĩtwa ma aaũmae maitũ maandĩkĩtwe tũvilanĩ twavangĩtwe mĩthĩa ĩna,
na kĩlaũnĩ kĩla weekĩĩte mũtwenĩ wake kyoonanasya ũnene waku.
25Yĩla ũla wooaa andũ woonie syĩndũ isu, nĩwakĩie na aeka kũmoaa,
nĩkwĩthĩwa kũsama ũthatu ũsu o vanini nĩkweanĩte.
Currently Selected:
Ũĩ 18: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011