Ũĩ 19
19
Andũ ma Misili Maiminwa nũndũ wa Ũtumanu woo
1Andũ ala mataĩ na kĩkĩo kya Ngai maatĩĩiwe nĩ ũthatu wake ũte tei kũvika mũminũkĩlyo,
nũndũ Ngai nĩweesĩ maũndũ ala makeka o na mbee wa matanameka.
2Ngai nĩweesĩ kana o na kau nĩmaekete andũ make mathi,
na mamakalaata maume nthĩ yoo,
nĩmekũalyũla mosũanĩo moo na kũmaatĩĩa.
3Nũndũ o na yĩla andũ ma Misili maendee kwĩthĩwa na kyeva,
na kũĩa me mbũanĩ sya andũ moo ala makw'ĩte,
nĩmatwie ũndũ ũngĩ wa ũtumanu,
na maatĩĩa andũ ma Ĩsilaeli ta andũ masemba makĩa,
o na kau nĩmo mamesũvie na mamathing'ĩĩsya mathi.
4Ũkany'o ũla wamaĩlĩte nĩw'o watumie matw'a ũu,
o na watuma molwa nĩ maũndũ ala meekĩkĩte,
nĩ kana meanĩĩsye ũkany'o ũla ũtaĩ ũneanĩw'a nĩ mathĩna ala makwatie.
5Kweekiwe ũu nĩ kana andũ ma Misili makw'e kĩkw'ũ kĩsaanĩtye,
namo andũ maku maithi kyalo kya kũseng'ya.
Ngai Aitongoesya na Kũsũvĩa Andũ Make
6Mũmbĩle wa syĩndũ syonthe ila syoombiwe,
nĩwaalyũlilwe watw'ĩka mweũ,
syekala ũndũ we Ngai weeaie syĩkale,
nĩ kana syana syaku iikakwatwe nĩ ũndũ mũthũku.
7Ĩtu nĩyoonekaa yĩkĩĩte maeema moo muunyĩ,
na nthĩ nyũmũ nĩyaumĩlile vala mbeenĩ vaĩ kĩw'ũ,
na veethĩwa nzĩa ntheu ĩvĩtĩlĩte nthĩnĩ wa Ũkanga Mũtune,
na ũiĩ wĩ na nyeki vala veethĩawa itulumo syĩ vinya.
8Vau nĩvo mbaĩ yonthe ya andũ ala wasũvĩaa yaingĩle,
ĩtina wa kwona maũndũ ma kũseng'ya mũno.
9Nĩmathaanyũkie ta mbalasi,
na matũlĩlanga ta tũtena twa malondu,
maikũtaĩa we Mwĩai ũla wamatangĩĩie.
10Nũndũ o na nĩmalilikanaa maũndũ ala meekĩkie nthĩ ĩla mekalaa ũeninĩ,
ũndũ nthĩ yausũie mbangũle vandũ va kwĩthĩwa na ũsyao wa indo,
na ũsĩ wausũa syoa itatalĩka vandũ va makũyũ.
11Ĩtina wa ũu nĩmoonie mũthemba wa nyũnyi mataĩ maasyona ĩngĩ,
yĩla meethĩiwe na mea ma kwĩtya lĩu mũseo,
12nĩmaeteiwe ngwae kuma ũkanganĩ nĩ kana maye mavũne.
Ũkany'o wa Andũ ma Misili
13Mbee wa andũ asu athũku matanakanw'a,
nĩmaeteiwe mawonany'o nthĩnĩ wa itundumo syĩ vinya,
nĩkwĩthĩwa makwatie thĩna ũla wamaĩlĩte nũndũ wa meko moo mathũku,
nũndũ nĩmamenete aeni mũno.
14Mbaĩ ingĩ nĩsyaleaa kũthokya aeni mooka nthĩ yoo,
ĩndĩ andũ asu nĩmatw'ĩkĩthisye ngombo aeni ala mamekaa nesa.
15Ũu wĩ o vo, mbaĩ ĩsu yaleile kũthokya aeni nesa,
ĩkakwata ũkany'o wĩanĩe ĩvĩtyo yoo.
16Ĩndĩ mbaĩ ĩno ĩngĩ yavĩtisye mũno,
nũndũ yathokisye aeni na ũtanu na yamaseũvĩsya mboka,
ĩndĩ ĩtina yamathĩny'a mũno,
o na kau nĩyambĩte kũmosa ta amwe ma andũ mayo.
17Andũ asu nĩmaekie kwona nthĩ,
o tondũ andũ ala maĩ mũomonĩ wa ũla mũndũ mũlũngalu meekiwe.
Yĩla maĩ kĩvindunĩ kĩkamu ũkethĩa maitonya kwona,
kĩla ũmwe nĩwavavataa aimantha mũomo wa nyũmba yake mwene.
Vinya wa Ngai wa Kũseng'ya
18O tondũ ndii sya ngitaa nene syumasya mawasya me kĩvathũkany'o,
kĩla ũlii ũyumya wasya waw'o,
now'o syĩndũ syakũaniw'e na ila ingĩ.
Ũndũ ũũ ũtonya kũeleeka nesa kumana na maũndũ ala meekĩkie.
19Nyamũ ila syĩkalaa nthĩ nyũmũ nĩsyatw'ĩkie sya kĩw'ũnĩ,
nasyo nyamũ ila syĩkalaa kĩw'ũnĩ syatw'ĩka sya nthĩ nyũmũ.
20Mwaki waĩ na ũtonyi wa kwakana o na wĩ kĩw'ũnĩ,
na kĩw'ũ kyaalyũlwa weethĩa kĩitonya kũvosya mwaki.
21O ta ũu mwaki nĩwaemiwe nĩ kũvĩvya syũmbe itonya kũvya ila syesĩlaa ĩũlũ waw'o,
na o ta ũu nĩwaemiwe nĩ kũtwekethya lĩu ũla waumĩte ĩtunĩ,
o na kau waĩ ũtonya kũtweka mĩtũkĩ.
Ndeto sya Mũthya
22Maũndũnĩ onthe we Mwĩai nũnenevetye andũ maku na ũkatuma mataĩwa,
ndwaalea kũmatethya mavinda onthe kĩla vandũ maĩ.
Currently Selected:
Ũĩ 19: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011