Ũĩ 17
17
Mũisyo ũla Wakwatie Andũ ma Misili Ũtukũ
1We Ngai motw'ĩo maku nĩ manene na me vinya kũmaelesya;
kwoou andũ ala mate amanyĩsye nĩmaĩte.
2Yĩla andũ athũku masũanĩaa kana maĩ na ũtonyi ĩũlũ wa mbaĩ yaku ntheu,
mo ene nĩmekalile movetwe nĩ kĩvindu na makavingĩwa nĩ ũtukũ mũasa,
mavingĩĩtwe nyũmbanĩ syoo, ũkethĩa maivikĩwa nĩ ũsũvĩo waku wa tene na tene.
3Masũanĩaa kana meekĩa naĩ syoo kĩmbithĩnĩ iitonya kũmanyĩka,
ivw'ĩkĩtwe nĩ suka mwiũ wa mbũlwa,
ĩndĩ nĩmanyaĩĩkiw'e matelemete mũno,
na makasaanĩw'a nũndũ wa syĩndũ ila moonie.
4Nũndũ o na kasũmba ka nthĩnĩ kala malikĩte kayaamavetea w'ĩa,
ĩndĩ nĩmeew'aa mawasya ma kũtelemya kuma ngalĩko syonthe,
na maumĩlĩĩlwa nĩ mĩvw'ano yĩna kyeva na ikũnzĩte mothyũ.
5Vayaĩ mwaki waĩ ũtonya kumya kyeni,
o na ũtheu mũtisu wa ndata sya ĩtunĩ ndwaĩ ũtonya kũmulĩka kĩvindunĩ kĩu kĩthũku.
6Vayaĩ kyeni o na kĩmwe moonaa,
ateo mwaki wa kũtelemya ũla weeyakanĩtye e w'o,
na nũndũ wa kũtelema masũanĩaa kana syĩndũ ila moonaa, nĩsyo syaĩ nthũku mbee wa syĩndũ ila mataĩ matonya kwona.
7Maũndũ ma mana ala meekaa na syama syoo nĩmasindiwe,
na ũĩ ũla meekathĩĩaa naw'o nĩwaumĩlilw'e ũtheinĩ na wavũthĩĩw'a.
8Nĩkwĩthĩwa ala mamathĩte kana makamavetea w'ĩa na mathĩna ma ala me na ũwau wa kĩlĩko,
mo ene maĩ na ũwau wa w'ĩa ũte kĩtumi.
9Nũndũ o na ethĩwa vayaĩ kĩndũ kya kũmatelemya,
nĩmeekĩiwe w'ĩa nĩ nyamũ ivĩtĩte na nĩ wasya wa nzoka,
10nĩmooaiwe nĩ w'ĩa mũnene,
nũndũ o na nĩmakĩaa kũsisya nzeve,
o na kau vai ũndũ mũndũ wĩka akamyathũkĩa.
11Ũthũku nĩ kĩndũ kĩetae w'ĩa, na ũsilĩlawa nĩ ũkũsĩ waw'o.
Mũndũ aithĩnw'a nĩ wasya wa ngoo onaa mathĩna me manene mbee wa ũndũ meana.
12Mũndũ akwatawa nĩ w'ĩa,
ethĩwa ndekwosa ũtethyo ũla wumaa mosũanĩonĩ.
13Ethĩwa ngoonĩ yake ndekwĩkwatya kwona ũtethyo,
anyuvaa kwĩkala atesĩ kĩla kĩũmũetee mathĩna.
14Ĩndĩ ũtukũ w'onthe ũla mataĩ makoma,
ũtukũ ũla wamokĩie kuma kũla maveva ma ala akw'ũ mekalaa,
onthe makomie o ũndũ ũmwe,
15masembanĩtw'e nĩ syuu sya kũtelemya,
na mathelwa nĩ vinya vyũ nũndũ nĩmeeyĩtũkĩte,
nũndũ kwa kĩthũlũmũko na matataĩĩe nĩmakwatiwe nĩ w'ĩa mwingĩ.
16Kĩla mũndũ waĩ vo nĩwavalũkile nthĩ,
na ekala avingĩwe yela ĩtaseũvĩtw'e na kyũma.
17Aĩmi, aĩthi kana andũ ala matethasya wĩa kĩthekanĩ,
nĩmakwatiwe nĩ thĩna ũsu na moomĩĩsya nũndũ mayaĩ mevĩtya,
nũndũ onthe moovetwe nĩ nyololo ĩmwe ya kĩvindu.
18O na meew'a nzeve ĩkũuutana mĩtĩnĩ,
kana nyũnyi ikwina na wasya mũseo syĩ mbongenĩ ndaasa sya mũtĩ,
kana kĩuumo kya kĩw'ũ kĩsembete mũno,
19kana kĩlitũko kya mavia manene meũvalũka nthĩ,
kana nyamũ itenekee isembete ithaanyũkangĩte,
kana wasya wa nyamũ mbai ikũluluma,
kana wasya watũngana ngunganĩ sya iĩmanĩ,
nĩmakwatawa nĩ w'ĩa mũnene na maithela vinya vyũ.
20Nthĩ yonthe yamulĩkĩtwe nĩ kyeni kĩtheu,
na andũ maendee na mawĩa moo matekũsiĩĩwa,
21ĩndĩ andũ asu me oka mavw'ĩkĩtwe nĩ kĩvindu kĩkamu,
mũvw'ano wa kĩvindu kĩla kyameteelete;
ĩndĩ mo ene meetw'ĩkĩa mũio mũito mbee wa kĩvindu kĩu.
Currently Selected:
Ũĩ 17: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011