Ũĩ 16
16
1Kwoou andũ asu nĩmakaniw'e na nyamũ isu ũndũ waaĩlĩte,
nĩmathĩniw'e nĩ nyamũ syaĩ mbingĩ mũno.
2 #
Kuma 16.11-13; Mot 11.31-32 Ĩndĩ vandũ va kũkany'a andũ maku ũu,
nĩwamew'ĩie tei na wamanenga ngwae maye;
lĩu mũseo meanĩĩsye wendi ũla maĩ naw'o.
3Weekie ũu nĩ kana andũ asu mathaithaa mĩvw'anano,
meew'a nzaa, maemwe nĩ kũya nũndũ wa nyamũ nthũku ila maeteiwe,
ĩndĩ andũ maku ĩtina wa kwĩw'a nzaa vandũ va kavinda kakuvĩ,
maya lĩu ũla mũseo mũno.
4Kwaĩ vata andũ asu mathĩnasya angĩ manyivĩwe nĩ kĩla me na vata nakyo,
namo andũ maku maikũsĩĩa ũndũ amaitha moo mathĩnaw'a.
5 #
Mot 21.6-9
Yĩla andũ maku mookĩiwe nĩ nyamũ mbai sya kũtĩsya,
na weethĩa nĩmeũminwa nĩ nzoka ila syamaũmangaa,
ũthatu waku ndwaaendeea kũvika mũminũkĩlyo.
6Nĩmathĩniw'e vandũ va ĩvinda ĩkuvĩ nĩ kana makanw'e,
na manengwa wonany'o wa wovosyo ũmalilikany'e ũndũ mĩao ĩkwasya.
7Mũndũ ũla weethyũũaa akasisya wonany'o ũsu nĩwatangĩĩawa;
wonany'o ũsu ti w'o wamũtangĩĩaa,
ĩndĩ atangĩĩawa nue, Mũtangĩĩi wa onthe.
8O ta ũu nĩwatũmĩie ũndũ ũsu kũĩkĩĩthya amaitha maitũ,
kana nue wovoasya andũ kuma ũthũkunĩ wa kĩla mũthemba.
9Amaitha maitũ makwie nũndũ wa kũũmangwa nĩ ngie na ngi,
na vayaĩ kĩndũ kĩtonya kũmavosya,
nĩkwĩthĩwa maaĩlĩtwe nĩ kũkanw'a na syĩndũ ta isu.
10Ĩndĩ ana maku mayaaminwa o na maũmangwa nĩ nzoka syĩ maeo me sumu,
nũndũ teinĩ waku nĩwamatethisye na wamavosya.
11Nĩmaũmangiwe nĩ kana malilikanw'e mĩao yaku,
na o mĩtũkĩ moovow'a,
nĩ kana maikolwe vyũ wĩthĩe o na wamew'ĩa tei maikũsyokea.
12Andũ maku mayaavow'a nĩ mũtĩ kana ndawa o na yĩva,
ĩndĩ mavoiw'e nĩ ndeto yaku we Mwĩai,
ndeto yaku ĩla ĩvoasya andũ onthe.
13Nũndũ we Ngai wĩ na ũtonyi ĩũlũ wa thayũ na kĩkw'ũ;
nũtongoeasya andũ ũkamatwaa mĩvĩanĩ ya vala maveva ma ala akw'ũ mekalaa na ũimatũnga.
14Mũndũ mũthũku nũtonya kũaa mũndũ,
ĩndĩ ndatonya kũtũnga veva ũla wauma mũndũnĩ ũsu,
o na ndatonya kũthasya veva ũla wovetwe vala maveva ma ala akw'ũ mekalaa.
Mathĩna ala Makwatie Andũ ma Misili
15Vai mũndũ ũtonya kũsemba akauma vala ũĩ we Ngai;
16nũndũ andũ ala matena kĩkĩo kya Ngai na maleile ũkũmanya,
nĩwamakanisye na vinya waku mũnene,
nĩmookĩiwe nĩ mbua yaĩ nene mũno,
mbua ya mavia na iseve itathelaa vinya,
na maminwa vyũ nĩ mwaki.
17Ũndũ ũla waĩ wa kũseng'ya mũno nĩ kana, mwaki ũsu ndwaavow'a nĩ kĩw'ũ,
ĩndĩ waendeeie kwakana na vinya mũno,
nũndũ syĩndũ syonthe ila syoombiwe nimokitĩaa ala alũngalu.
18Ĩvindanĩ yĩmwe mwaki ũsu nĩwaolekile,
nĩ kana ndũkavĩvye syũmbe ila syatũmĩtwe kũkany'a andũ ala mataĩ na kĩkĩo kya Ngai,
ĩndĩ nĩ kana andũ asu moona ũu, mamanye kana Ngai nĩwe ũendee kũmasilĩla.
19Ĩvindanĩ yĩngĩ mwaki ũsu nĩwakanie mũno wĩ kĩw'ũnĩ,
mbee wa ũndũ mwaki o na wĩva waakana,
nĩ kana wanange lĩu mĩũndanĩ ya nthĩ ĩsu ya andũ mate alũngalu.
Andũ ma Ĩsilaeli Mainengwa Lĩu wĩtawa Mana
20 #
Kuma 16.1-36
Vandũ va kwĩka andũ maku maũndũ ta asu, nĩwamanengie lĩu wa alaĩka,
nĩwamanengie mũkate mũue kuma ĩtunĩ maye, lĩu ũla mataanoea,
mũkate ũsu waĩ wa kwendeesya, na kĩla mũndũ nĩwatanĩie mũsamo waw'o.
21Kwa kũmanenga lĩu nĩwoonanisye kana nĩwendete syana syaku;
mũkate ũsu nĩweanĩĩasya vata wa ũla waũya,
nĩwaalyũkaa ũkasama ũndũ mũndũ wendete.
22Ĩa na mbalavu nĩsyavĩviw'e nĩ mwaki itekũtw'ĩka kĩw'ũ,
nĩ kana mamanye lĩu ũla waĩ mĩũndanĩ ya amaitha moo,
wavĩvaw'a nĩ mwaki ũla wakanĩte nthĩnĩ wa mbua na mbua ya mavia ĩla yauaa,
23ĩndĩ mwaki ũsu nĩwathelile vinya,
nĩ kana methĩwe na lĩu wa kũya.
24Syĩndũ ila woombie nikũthũkũmaa we ũla wasyũmbie,
na nitũmĩaa vinya wasyo kũkany'a ala mate alũngalu,
ĩndĩ niekaa kũtũmĩa vinya nĩ kana imeke nesa ala makwĩkwatasya.
25Kwoou ĩvindanĩ o yĩu, syĩndũ ila woombie nĩsyaalyũkile syekala ũndũ ũngĩ,
nĩ kana syĩanĩsye mavata ma andũ kwa ũlau waku,
o kwĩanana na kĩla maĩ na vata nakyo.
26Syeekie ũu nĩ kana syana syaku ila wendete we Mwĩai,
imanye kana andũ maikwataa lĩu nũndũ wa kũĩma mĩũnda yoo,
ĩndĩ ndeto yaku nĩyo yĩkalasya thayũ ala makwĩkwatasya.
27Lĩu ũla ũtaanangwa nĩ ũla mwaki,
nĩwathelile yĩla waathiwe o vanini nĩ syũa,
28nĩ kana andũ mamanye maĩlĩte kũamũka mbee wa syũa yĩtanauma makũtũngĩe mũvea,
na kana no nginya makũvoye kĩoko tene kũyambĩĩa kũkya,
29nũndũ wĩkwatyo wa mũndũ ũla ũtatũngaa mũvea,
ũkathela o tondũ ĩa ya ĩvinda ya mbevo yĩthelaa,
na ũivĩta ta kĩw'ũ kĩte vata.
Currently Selected:
Ũĩ 16: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011