Ũĩ 15
15
Ngai wa w'o Anengae Andũ Thayũ Ũtathela
1We Ngai waitũ, wĩ mũseo na wĩ wa w'o,
wĩ wũmĩĩsyo na ũsumbĩkaa syĩndũ syonthe na tei.
2Nũndũ o na tweeka naĩ twĩ o andũ maku, na nĩtwĩsĩ vinya waku.
Ĩndĩ tũyĩĩka naĩ, nĩkwĩthĩwa nĩtwĩsĩ ũtũtalaa ta twĩ andũ maku.
3Kũũmanya we, nĩ kw'o kwĩthĩwa na ũlũngalu mwĩanĩu,
na kũmanya vinya waku nĩkw'o mwambĩlĩĩlyo wa thayũ ũtathela.
4O na kĩeleelo kĩthũku kya andũ ala maseũvasya syĩndũ na ũĩ kĩyaatwasya,
na mĩnoo ĩte na ũsyao ya ala mavakaa langi ndyaatwasya,
kana tũkaw'a nĩ kĩndũ kĩvakĩtwe malangi ma mĩthemba mingĩ.
5Andũ ala atumanu moona kĩndũ kĩu nĩmakwatawa nĩ wendi,
na kũtuma mendeew'a nĩ mũvw'anano mũkw'ũ ũte na thayũ.
6Onthe ala maseũvasya, na mendaa kana mathaithaa mĩvw'anano,
nĩmo mendaa syĩndũ nthũku,
na makwataa kĩla kĩmaĩlĩte nũndũ wa kũsyĩkwatya.
Ũtumanu wa Kũthaitha Mĩvw'anano ya Yũmba
7Mũmbi wa mbisũ nũkimaa yũmba yĩla yololo,
na ayũmba nesa syĩndũ syĩ kĩvathũkany'o tũtũmĩae.
Kuma yũmbanĩ o yĩmwe nĩwũmbaa syĩndũ sya kwĩkĩa syĩndũ nzeo,
na ingĩ sya kwĩkĩa syĩndũ ite nzeo.
Syĩndũ isu syonthe asyũmbaa o ũndũ ũmwe,
ĩndĩ nĩwe ũtusaa kĩla kĩmwe kĩkatũmĩawa ata.
8Mũmbi ũsu nĩwanangaa vinya wake ayũmba ngai ya mũvw'anano kuma yũmbanĩ o yĩu,
o na kau o nake anoombiwe na yũmba ĩvinda ĩnini ĩvĩtũku,
na ĩtina wa ĩvinda ĩnini akasyoka mũthanganĩ vala waumie,
yĩla wĩĩwa atũnge veva ũla wakovethiw'e.
9Ĩndĩ we ndatalaa ta ũndũ kwĩthĩwa avangĩwe kũkw'a,
na kana thayũ wake nĩ mũkuvĩ,
asindanaa na andũ ala maseũvasya syĩndũ sya thaavu na sya silĩva,
nĩwĩyĩelekanasya na ala maseũvasya syĩndũ sya kyũma kĩtune,
na nĩwĩkathĩĩaa nũndũ ombaa ngai sya ũvũngũ.
10Ngoo yake nĩ mũu mũthei, na kĩtoo kĩ kavaa kwĩ wĩkwatyo wake,
yũmba yĩ vata kwĩ thayũ wake,
11nĩkwĩthĩwa nĩwaleile kũmũmanya ũla wamũmbie,
ũla wamũnengie veva wa kũtethya wĩa,
na amũveveea mĩthũmũ ya thayũ.
12Ĩndĩ mũndũ ũsu asũanĩaa kana kwĩthĩwa thayũ no ĩthaũ,
na kana thayũ nĩ mathaũ mavangĩtwe ma kũetee mũndũ ũtandĩthyo,
nũndũ aĩkĩĩaa kana no nginya akwate mbesa kwa nzĩa syonthe ila itonyeka, o na ethĩwa nĩ kwa nzĩa nthũku.
13Mũndũ ũsu nĩwĩsĩ o na kũvĩtũka andũ ala angĩ kana ethĩawa ayĩka naĩ,
yĩla ũtũmĩaa yũmba kũmba syĩndũ ila ikusaa na mĩvw'anano myasũvye.
Ũtumanu wa Andũ ma Misili
14Ĩndĩ andũ ala atumanu mbee wa ala angĩ onthe,
na ala mathĩnaa mbee wa kana kanini,
nĩ amaitha onthe ala mathĩnisye andũ maku.
15Nũndũ masũanĩaa kana mĩvw'anano yoo yonthe ya andũ matamwĩsĩ Ngai nĩ ngai,
o na kau ndĩtonya kwona na metho mayo,
o na ndĩtonya kũveva na manyiũũ mayo,
ndĩtonya kwĩw'a na matũ mayo,
na ndĩtonya kũvavata na moko mayo,
o na ndĩtonya kũthi na maũũ mayo.
16Ĩseũvĩtw'e nĩ mũndũ,
yũmbĩtwe nĩ mũndũ wĩ na thayũ wa kũkovethw'a,
nũndũ vai mũndũ ũtonya kũseũvya ngai ĩilyĩ take mwene.
17Mũndũ nũkusaa, na kĩla ũseũvasya na moko make mathũku kĩthĩawa kĩ kĩkw'ũ,
nũndũ mũndũ nĩ mũseo mbee wa syĩndũ ila ũthaithaa,
nĩkwĩthĩwa we e na thayũ, ĩndĩ syo iyĩsaa kwĩthĩwa naw'o.
18Amaitha ma andũ maku mathaithaa nyamũ ila itendeeasya o na vanini,
ila nthũku kwĩ nyamũ syonthe;
nyamũ syĩ na ũmanyi mũnini kwĩ nyamũ ila ingĩ syonthe.
19Nĩ nyamũ itonekaa syĩ sya kwendeesya ũndũ ituma mũndũ asyenda,
Ngai ndaaitaĩa, o na ndaaiathima.
Currently Selected:
Ũĩ 15: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011