Ũĩ 14
14
Mĩvw'anano ya Mĩtĩ Ĩielekanw'a na Ngalawa ya Noa
1O ĩngĩ, mũndũ akĩyũmbany'a kũthi kyalo esĩlĩte ũkanganĩ wĩ na itulumo,
nĩwĩkaĩlaa kĩlungu kya mũtĩ kyonzu kwĩ meli ĩla ĩkũmũkua.
2Mũndũ aseũvisye meli ĩsu nĩkwĩthĩwa endaa kũkwata ũtandĩthyo,
na mũndũ amyakie na ũĩ.
3Ĩndĩ ũsũvĩo waku we Asa, nĩw'o ũmĩtongoeasya vala yĩsĩlĩte,
nĩkwĩthĩwa nũmĩnengete nzĩa ya kwĩsĩla ũkanganĩ,
nzĩa yĩ ũsũvĩo ya kwĩsĩla kũla kwĩ itulumo.
4Wĩkaa ũu wonany'e kana nũtonya kũtangĩĩa kuma mĩisyonĩ yonthe,
wĩthĩe o na mũndũ ũla ũte na ũmanyi nũtonya kũtwaĩla meli ũkanganĩ.
5Nĩ kwenda kwaku wĩthĩe syĩndũ ila woombie na ũĩ waku nĩsyatũmĩwa;
kwoou andũ nĩmekwatasya o na kĩlungu kĩnini kya mũtĩ kĩkalye mathayũ moo ũsũvĩonĩ,
nĩmesĩlaa ũkanganĩ wĩ na itulumo mekalĩle kĩlungu kya mũtĩ, na maithi kũvika nthĩ nyũmũ vate mũisyo.
6Ũu nĩw'o kweekĩkie mwambĩlĩĩlyonĩ,
yĩla andũ anene aasa na ang'endu maminawa,
andũ ala maĩ wĩkwatyo wa nthĩ yonthe meevithie melinĩ,
na matongoew'e nĩ vinya waku nĩmatiĩie nthĩ mbeũ ya ũsyao mweũ.
7Meli ĩsu ya mũtĩ ĩla yaetie ũlũngalu nĩ ngathime.
8Ĩndĩ mũvw'anano ũla ũseũvĩtw'e nĩ mũndũ nĩ mũumanĩe,
na o na ũla waũseũvisye nĩ mũumanĩe,
nĩkwĩthĩwa nĩwaseũvisye kĩndũ kyu kyanangĩkaa na akĩta ngai.
9Ngai nũmenete andũ ala matena kĩkĩo kyake,
na o ta ũu nũmenete mwĩkalĩle woo ũla ũte na kĩkĩo kyake,
10nũndũ kĩla kyaseũviw'e kĩkasilĩlwa vamwe na ũla wakĩseũvisye.
11Kwoou Ngai akasilĩla mĩvw'anano ya andũ ala matamwĩsĩ Ngai,
nũndũ o na kau nĩ imwe sya syĩndũ ila Ngai woombie, nĩsyatw'ĩkie sya kũthatya,
nĩsyatw'ĩkie itei sya mathayũ ma andũ,
na mũteo wa maũũ ma andũ ala atumanu.
Wambĩlĩĩlyo wa Ũthaithi wa Mĩvw'anano
12Yĩla mĩvw'anano yaseũviw'e nĩw'o ũlaalai wambĩĩie,
yambĩĩa kũseũvw'a nĩyavukisye mathayũ ma andũ.
13Mĩvw'anano ndyaĩ kw'o kuma mwambĩlĩĩlyonĩ,
na ndĩkekala tene na tene.
14Yalikile kũũ nthĩ kwĩsĩla ũtumanunĩ wa andũ,
na kwoou nĩvangĩwe kũminwa o mĩtũkĩ.
15Mũtumĩa ũmwe nĩweewie kyeva mũno akw'ĩĩwa nĩ kana kake ke kanini,
na kwoou aseũvya mũvw'ano wa kana kau kake kamũtiie atataĩĩe.
Nĩwataĩaa ta ngai mũvw'ano ũsu wa mũndũ wakwie,
na kwoou atiĩa andũ make syĩthĩo sya kĩmbithĩ na mĩao ya ũthaithi woo.
16Syĩthĩo isu ite na kĩkĩo kya Ngai syaendeea kwĩkwa vandũ va ĩvinda ĩasa,
nĩsyatw'ĩkie mwĩao wa kũatĩĩawa,
na asumbĩ nĩmaumisye mwĩao andũ mathaithae mĩvw'anano myasũvye.
17Andũ ala mekalaa kũasa ũkethĩa maitonya kwona asumbĩ moo mamataĩe,
meo kũu nĩmasũanĩie ũndũ asumbĩ asu moo mailyĩ,
na maseũvya kĩndũ kĩna mũvw'ano wa mũsumbĩ ũla mataĩaa,
nĩ kana meanĩĩsye kwenda kwoo kwa kũmũtaĩa atevo, ta waĩ o vamwe na mo.
18Mũndũ ũla wasaa mĩvw'anano ĩsu aĩ na wendi mũnene wayo,
na kwoou atuma o na andũ ala matamwĩsĩ mũsumbĩ ũsu maendeesya ũthaithi ũsu.
19Mũndũ ũsu wa kwasa mĩvw'anano no kwĩthĩwa endaa kwendeesya mũsumbĩ wake,
na kwoou aseũvya mũvw'anano wa mũsumbĩ ũsu wĩ mwanake mbeange.
20Nĩvo ĩndĩ andũ aingĩ mendeeiw'e nĩ mũvw'anano ũsu mwanake,
na kwoou o kwa mĩtũkĩ mambĩĩa kũũthaitha,
o na kau vau mbeenĩ makũnengae ndaĩa o ta mũndũ.
21Ũndũ ũsu nĩwatw'ĩkie mũteo mũvithe kwa andũ onthe,
nĩkwĩthĩwa andũ ala moovetwe nĩ maũndũ mathũku kana makovwa nĩ ũkũmũ wa mũsumbĩ,
manengie syĩndũ sya ĩvia na sya mũtĩ ĩsyĩtwa yĩla yĩtaĩlĩte kũnengwa kĩndũ kana mũndũ ũngĩ o na ũmwe.
Mothũku ala Maetiwe nĩ Ũthaithi wa Mĩvw'anano
22Ĩtina wa ũu andũ nĩmongelile ũthũku ũngĩ, eka ũthũku wa kũlea kũmũmanya Ngai.
Mekalaa maitetany'a nũndũ wa kwaa ũmanyi,
na yĩla me na mothũku manene ta asu maasya me na mũuo.
23Nũndũ o na yĩla mekũaa syana syoo meanĩĩsye mĩao ya ũthaithi woo,
kana yĩla mekũtanĩa maũndũ mavithe,
o na yĩla mekũtanĩa mboka itaĩlĩte maiatĩĩa syĩthĩo ngeni,
24mayĩkalasya mathayũ moo kana o na mĩtwaano yoo yĩ mĩtheu,
ĩndĩ kwa ũseleke nĩmoaanaa mo ene kwa ene,
kana maithatany'a yĩla mũndũ weeka ũlaalai na kĩveti kya ũsu ũngĩ.
25Kĩla vandũ wĩthĩaa vausũĩte kaũ na wũaani, ũng'ei na kũkengana,
wendi mũthũku, kũlea kũĩkĩĩa, kĩthokoo na kũkũsĩĩa ũvũngũ,
26andũ matekũmanya ũndũ ũla ũseo nĩ wĩva, mate na mũvea,
nĩmavukasya mathayũ, nĩmamanyanaa kĩ-mwĩĩ matekũatĩĩa mũtuo ũla waĩlĩte,
kwananga mĩtwaano, ũlaalai na andũ kwĩthĩwa na mĩmeo mĩthũku.
27Ũthaithi wa mĩvw'anano, ĩla o na masyĩtwa mayo mataĩlĩte kũwetwa,
nĩw'o wambĩlĩĩlyo, mũminũkĩlyo, na kĩtumi kya mothũku onthe.
28Andũ ala mamĩthaithaa nĩmaneenaa na ũtanu me avũavũanu,
kana makanengane wathani wa ũvũngũ,
kana kwĩka maũndũ mathũku kana kũkũsĩĩa ũvũngũ.
29Nĩkwĩthĩwa nĩmaĩkĩĩaa mĩvw'anano ĩte thayũ,
nĩmevĩtaa mawĩvĩto ma ũvũngũ na mayĩkwatya kana maiona ũndũ ũthũku.
30Ĩndĩ ĩtina makakwata ũkany'o ũla ũmaĩlĩte nũndũ wa mavĩtyo aa elĩ:
Mbee nĩkwĩthĩwa nĩmasũanĩĩie Ngai maũndũ mathũku yĩla meenenganie kũthaitha mĩvw'anano,
na kelĩ nĩkwĩthĩwa nĩmeevĩtaa ũvũngũ maikengana nũndũ nĩmavũthasya ũtheu.
31Vinya wa kĩndũ kĩla mũndũ weevĩta nakyo ti w'o ũmũkanasya,
ĩndĩ anengawe ũkany'o ũla waĩlĩte ala mekaa naĩ,
ũkany'o ũla ala mate alũngalu makwataa nũndũ wa ĩvĩtyo yoo.
Currently Selected:
Ũĩ 14: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011