Ũĩ 13
13
Ũtumanu wa Kũthaitha Syũmbe
1Andũ onthe ala matamwĩsĩ Ngai maĩ atumanu kwĩanana na mũtuo woo,
mayaĩ matonya kũmũmanya Ngai kumana na syĩndũ nzeo ila syonekaa,
o na mayaamanya mũmbi o na kau nĩmoonaa syĩndũ ila we woombie.
2Ĩndĩ masũanĩie atĩ mwaki kana kĩseve kana kĩuutani,
ndata sya ĩtunĩ kana kĩw'ũ kĩna itulumo,
kana syeni nene ila syĩ ĩtunĩ, nĩsyo ngai ila isumbĩkaa nthĩ.
3Ethĩwa andũ masũanĩie kana syĩndũ ii nĩsyo ngai nũndũ wa kwona syĩ mbanake na sya kwendeesya,
nĩmamanye kana Mwĩai ũla wasyũmbie nĩwe mũseo kwĩ syo,
we nĩwe wumo wa wanake na nĩwe wasyũmbie.
4Ethĩwa andũ nĩmaseng'ie nĩ kwona vinya wasyo na mũmbĩle wasyo,
nĩmemanyĩsye kumana nasyo kana we ũla wasyũmbie e vinya mũno mbee wasyo.
5Nũndũ kumana na ũnene na wanake wa syĩndũ ila syoombiwe,
mũndũ ethĩawa atonya kũmanya ũla wasyũmbie.
6Ĩndĩ andũ ta asu ti ta maĩlĩte kũtalĩlwa mavĩtyo mũno,
nũndũ nĩkũtonyeka ũkethĩa mavĩtisye o maimantha Ngai na mayenda kũmũmanya.
7Nũndũ maendee kwĩkala katĩ wa syĩndũ ila Ngai woombie,
mekalaa mayenda kũimanya,
na maĩkĩĩaa syĩndũ ila monaa,
nĩkwĩthĩwa syonekaa syĩ mbanake mũno.
8Ĩndĩ ũu wĩ o vo, andũ asu mailea kũtalĩlwa mavĩtyo.
9Nũndũ ethĩwa maĩ na ũtonyi wa kũmanya maũndũ maingĩ ũkethĩa nomekuũe nthĩ,
nĩ kyaũ kyatumie matamanya kwa mĩtũkĩ Mwĩai ũla woombie syĩndũ isu?
Ũtumanu wa Kũthaitha Mĩvw'anano
10 #
Ĩsa 44.9-20; Yel 10.1-16; Val-Yel 8-73 Ĩndĩ andũ ala ma mana mũno nĩ ala mekwatasya syĩndũ ite thayũ,
ala metaa syĩndũ syasĩtwe na moko ma andũ, “Ngai,”
syĩndũ sya thaavu kana silĩva iseũvĩtw'e na ũĩ, ikavw'anana na nyamũ,
kana ĩvia yĩte wĩa yasiwe nĩ mũndũ tene mũno.
11Mũndũ ũla wĩsĩ kwasa nũtemaa mũtĩ ũla mũseo na kwa ũĩ aiwumya masyũlyo,
na ĩndĩ aitũmĩa ũmanyi wake mwingĩ nũseũvasya kĩndũ kya vata kya kũtũmĩwa nĩ andũ.
12Nĩwosaa ilungu ila watialya aithũkũma,
akaua lĩu akaya akavũna.
13Ĩndĩ nĩwosaa kĩmwe kya ilungu isu syatiala,
kĩlungu kĩte wĩa, kĩkonzeku na kĩna makundo maingĩ.
Nũkyasaa nesa ĩvindanĩ yĩla ũthũmũĩte,
nũkyasaa na ũmanyi mwingĩ yĩla ũilyĩ mana.
Nũkyasaa kĩkethĩwa na mũvw'ano ta wa mũndũ,
14kana akakyasa kĩkethĩwa na mũvw'ano ta wa nyamũ ya mana.
Nũkĩvakaa langi mũtune,
na aitũmĩa langi kũvw'ĩka kw'onthe kũla kũkwoneka kũte kũseo.
15Nĩvo ĩndĩ ũseũvĩasya mũvw'anano ũsu vandũ vawaĩlĩte,
na kũũathĩĩa vo na mĩsumaa ũkalũma.
16Nũsũvĩaa mũvw'anano ũsu nĩ kana ndũkavalũke,
nũndũ nĩwĩsĩ kana ndũtonya kwĩtethya,
nũndũ no mũvw'anano tũ, na waĩlĩte kũtetheew'a.
17Yĩla ũkũvoyea syĩndũ, mũtwaano wake na syana,
ndew'aa nthoni kũvoya kĩndũ kĩu kĩte thayũ.
18Avoyaa kĩndũ kyonzu kĩmũnenge ũima wa mwĩĩ;
avoyaa kĩndũ kĩkw'ũ kĩmũnenge thayũ;
avoyaa kĩndũ kĩtesĩ ũndũ kĩmũtetheesye;
aithi kyalo avoyaa kĩndũ kĩtatonya kũtambya kĩmũnenge kyalo kĩseo;
19na kwondũ wa kũmantha mbesa, wĩa na kũtethya wĩa nesa,
avoyaa anengwe vinya nĩ kĩndũ kĩ moko mate vinya.
Currently Selected:
Ũĩ 13: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011