Ũĩ 12
12
1Veva waku ũla ũtakusaa wĩkalaa wĩ nthĩnĩ wa syĩndũ syonthe.
2Kwoou ala makũvĩtĩsya ũmakanasya o kavola,
na nũmalilikanasya na kũmakany'a ĩũlũ wa maũndũ ala makũvĩtĩasya namo,
nĩ kana mathaw'e kuma ũthũkunĩ na maikwĩkwatya we Mwĩai.
Naĩ sya Akanaani
3 #
Kũt 12.31; 18.9-13 Andũ ala ĩvinda ya tene mekalaa nthĩ yaku ntheu,
4nĩwamamenie nũndũ wa meko moo ma kũthatya,
nũndũ nĩmeekaa mowe na maĩ na syĩthĩo mbuku.
5Nĩmooaa syana mate na tei,
na maĩya nyama na nthakame sya andũ ala maumĩtw'e nthembo.
Maeetwe na momanyĩsyo ma ũthaithi ũtaĩlĩte,
6na asyai asu nĩmooaa syana nini ila itetonya.
Kwoou we Mwĩai nĩwatwie kũmamina ũitũmĩa aaũmae maitũ,
7nĩ kana nthĩ ĩla wonaa yĩ nzeo mbee wa nthĩ ila ingĩ syonthe,
yĩkalae athũkũmi maku we Ngai, ala maĩlĩte.
8 #
Kuma 23.28
Ĩndĩ o na andũ asu athũku ndwaamamina vyũ, nĩkwĩthĩwa maĩ o andũ tũ.
Nĩwatũmie mauĩ mathi mbee wa asikalĩ maku,
nĩ kana andũ asu athũku maminwe kavola,
9o na kau ndwaĩ ũemwa nĩ kũnengane andũ asu matamwĩsĩ Ngai maminĩwe kaũnĩ nĩ ala alũngalu,
kana kũmamina kwa ĩkũna yĩmwe ũitũmĩa nyamũ mbai kana ũitũmĩa ndeto yaku ya ũkany'o.
10Ũikany'a andũ asu kavola nĩwamanengete mwanya wa kũalyũla ngoo,
o na kau nĩweesĩ kana wumo woo waĩ mũthũku na masyaĩtwe me na naĩ,
na kana maikesa kũalyũla kĩsũanĩo kyoo.
11Andũ asu maumanĩiwe kuma mwambĩlĩĩlyonĩ,
na ndwaamaeka mate akany'e nũndũ wa naĩ syoo atĩ nĩkwĩthĩwa nĩwakĩaa mũndũ o na wĩva.
Ngai nĩ Mũsumbĩ
12Nũũ ũtonya kũneena naku we Ngai akaũkũlya,
“Ũndũ ũũ weeka nĩ mwaũ?”
Kana ve mũndũ ũtonya kũleana na ũtw'ĩo waku?
Nũũ ũtonya ũkũtalĩla mavĩtyo nũndũ wa kũmina mbaĩ ila woombie?
Kana nũũ ũtonya kũka mbee waku atetee andũ mate alũngalu?
13Nũndũ o na vai ngai ũngĩ eka we,
ũla ũsũvĩaa andũ onthe,
ũla we waĩlĩte kũmũĩkĩĩthya kana ndũnasilĩla na sila ũte wa katĩ.
14O na vai mũsumbĩ kana mũtongoi ũtonya ũkũtalĩla mavĩtyo,
nĩkwĩthĩwa nũkanĩtye andũ.
15We Ngai wĩ mũlũngalu na ũsumbĩkaa syĩndũ syonthe na ũlũngalu,
ndũtũmĩaa vinya waku ĩvinda o na yĩva kũsilĩla mũndũ atekĩte ĩvĩtyo yĩtuma akanw'a.
16Nũndũ vinya waku nĩ w'o wumo wa ũlũngalu,
na nĩwĩw'ĩaa andũ onthe tei nĩkwĩthĩwa wĩ Mwĩai wa onthe.
17Nĩwonanasya ũtonyi waku yĩla andũ matekũĩkĩĩa kana vinya waku nĩ mwĩanĩu,
na nũkanasya andũ ala mavũthĩĩasya vinya waku o na kau nĩmawĩsĩ.
18We Ngai, o na kau wĩ na vinya mwingĩ mũno, ũsilĩlaa kwa ũuu,
na nũtũsumbĩkaa na wũmĩĩsyo mwingĩ;
nũndũ wĩ na vinya wa kwĩka ũndũ o yĩla ũkwenda.
Maũndũ ala Ngai Wamanyĩisye Andũ ma Ĩsilaeli
19Kwĩsĩla mekonĩ maku we Ngai, nũmanyĩĩtye andũ maku,
kana mũndũ ũla mũlũngalu no nginya ethĩwe ayĩka andũ ala angĩ nesa,
na nũnengete syana syaku wĩkwatyo mũseo,
kwa kũinenga ũthei wa kumbũla naĩ syoo.
20Nĩwasilĩle amaitha ma andũ maku o ũimasũvĩa na kũmomĩĩsya,
o na kau maaĩlĩte kũawa,
nĩwamanengie ĩvinda na ũthei wa kũtia ũthũku woo,
21ĩndĩ ũsilĩle syana syaku na ũsilĩlo wĩ vinya,
o na kau nĩweevĩtie na watianĩa na aaũmae moo kana ũkameka maũndũ maingĩ maseo.
22Kwoou ithyĩ nũtũkanasya na ũikany'a amaitha maitũ mavinda ngili ĩkũmi mbee waitũ,
nĩ kana yĩla tũkũsilĩla tũsũanĩae ĩũlũ wa ũseo,
na yĩla tũũsilĩlwa twĩkwatasye kwĩw'ĩwa tei.
Kũkanw'a kwa Andũ ma Misili
23Ala mekalile mate alũngalu nũndũ wa ũtumanu woo,
nĩwamathĩnisye ũitũmĩa syĩndũ syoo ila ithatasya.
24Nũndũ nĩmaendeeie kwaa maatĩĩe mĩendele mĩthũku,
maithaitha ngai sya nyamũ ila o na amaitha moo mavũthĩĩasya;
makengiwe ta twana tũtumanu.
25Kwoou, o tondũ twana tũte kĩlĩko twĩkawa,
nĩwamasilĩle nĩ kana ũmasonokye.
26Ĩndĩ ala matethukĩĩasya makanw'a na ũkany'o mũnini,
Ngai akamasilĩla na ũkany'o ũla ũmaĩlĩte.
27Nũndũ nĩmathatie yĩla makaniw'e na syũmbe ila matalaa kwĩthĩwa ngai,
nĩmoonie na mamanya kana Ngai ũla vau mbeenĩ maleete kũmwĩtĩkĩla, nĩwe Ngai wa w'o.
Kwoou nĩmanengiwe ũsilĩlo ũla mũnene vyũ.
Currently Selected:
Ũĩ 12: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011