Ũĩ 11
11
Ũĩ Nĩwatongoeisye Andũ ma Ĩsilaeli Mesĩla Weũnĩ
1 #
Kuma 15.22—17.16
Ũĩ nĩwatumie mawĩa ma andũ ma Ĩsilaeli maendeea nesa,
matongoew'e nĩ mwathani mũtheu.
2Nĩmaendie kyalo mesĩlĩte weũnĩ ũtatwĩe andũ,
na mamba maeema moo kũndũ kũtaavika andũ angĩ.
3Nĩmasiĩĩie amaitha moo,
na mokita nthũ syoo.
4Yĩla meewie waũni nĩmakwĩkaĩlile we Mwĩai,
na wamanenga kĩw'ũ kuma ĩvianĩ yũmũ,
malaũkw'a nĩ kĩw'ũ kuma ĩvianĩ yũmũ.
5Mothĩny'o ala waeteie andũ ma Misili,
nomo matethisye andũ maku yĩla maĩ na thĩna.
Ũsilĩlo ũla Andũ ma Misili Manengiwe
6Vandũ va nthongo ya ũsĩ ũvĩtasya kĩw'ũ kĩla ĩvinda,
kĩ kĩthokoany'e na kĩkavukw'a na nthakame,
7kĩthĩwe ũkany'o kwa andũ ma Misili nũndũ nĩmaumisye mwĩao twana tũnini tũawe,
we nĩwanengie andũ ma Ĩsilaeli kĩw'ũ kingĩ mũno yĩla mateekwatasya kwĩthĩwa nakyo.
8Ĩvindanĩ yĩu nĩwatũmĩie waũni woo,
kwonany'a ũndũ wakanisye amaitha moo.
9Nĩkwĩthĩwa yĩla matatiwe, o na kau makanaw'a na tei,
nĩmamanyie ũndũ andũ ala mataĩ na kĩkĩo kya Ngai mathĩnie yĩla masilĩlwe na ũthatu.
10Nũndũ we Ngai nĩwamatatie ũndũ ĩthe wa syana ũsyĩkaa ayikany'a,
ĩndĩ nĩwasilĩle andũ ala mate na kĩkĩo kya Ngai ũndũ mũsumbĩ mũthũku wĩkaa na wamatalĩla mavĩtyo.
11Ala maĩ kũasa o na ala maĩ vakuvĩ mathĩnie ũndũ ũmwe,
12nũndũ makwatiwe nĩ kyeva kingĩ,
nĩmalumaa malilikana maũndũ ala meekĩkie.
13Yĩla meewie kana kwĩsĩla ũsilĩlonĩ ũla manengiwe,
andũ ala alũngalu nĩmakwatie ũtethyo,
nĩmamanyie kana Mwĩai nĩwe weekĩte ũu.
14O na kau andũ ma Misili nĩmamũleete na makamũvũthya we ũla vau mbeenĩ wekĩtw'e ĩtheka na akatiwa,
mũminũkĩlyonĩ wa maũndũ ala meekiwe nĩmaseng'iw'e nĩwe,
nũndũ nĩmakwatiwe nĩ waũni mwingĩ ũtailyĩ waũni ũla andũ alũngalu maĩ naw'o.
15 #
Kuma 8.1-24; 10.12-15 O tondũ mosũanĩo moo matumanu na mathũku,
mamatwaie ũtee mathaitha nzoka ite kĩlĩko, na nyamũ ite vata,
now'o wamatũmĩie nyamũ mbingĩ ite kĩlĩko imakany'e,
16nĩ kana mamanye kana mũndũ akanaw'a na syĩndũ o ila ũnavĩtasya nasyo.
17Kw'oko kwaku we Ngai kũla kwĩ vinya w'onthe,
kũla kwoombie nthĩ kuma kĩndũnĩ kĩtaĩ na wũmbo,
kũyaĩ kwaĩwa nĩ nzĩa ya kũmatũmĩa kwa wingĩ nyamũ mbai syĩtawa nduva na mĩnyambũ ĩte w'ĩa.
18O ta ũu we Ngai waĩ ũtonya kũmba nyamũ mbai itaaĩthĩwa kw'o na itesĩwe,
kana nyamũ syĩ ũthatu mwingĩ ivevũũkaa mwaki,
kana syelũkaa ikaumya syũki yiũ mũno,
kana syumasya methonĩ masyo ngala nthũku sya mwaki.
19O na eka kwĩthĩwa nyamũ isu syaĩ itonya kũaa andũ,
kũsyona o ũu mana kwaĩ kũtonya kũtuma andũ moawa nĩ w'ĩa.
20O na eka ũu, we Ngai waĩ ũtonya kũmina andũ na ĩvevũũka yĩmwe ya mĩthũmũ yaku,
ũmaatĩĩe na ũsili wa katĩ na kũmanyaĩĩkya na mĩthũmũ ya vinya waku.
Ĩndĩ nĩwavangie syĩndũ syonthe kwĩanana na kĩthimo, ũtalo, na ũito wasyo.
Ngai e Vinya na e Tei
21Mavinda onthe we Ngai wĩthĩawa ũtonya kwonany'a vinya waku,
nũũ ũtonya kũkĩlany'a vinya na ũtonyi waku?
22Wasisya nthĩ yonthe kwaku yĩanene na mbeke ĩla ĩtheeasya kĩthimi o vanini,
kana ta ĩlovoto yĩmwe ya ĩmwe ya kĩoko yavalũka nthĩ.
23Ĩndĩ we Ngai nĩwĩw'ĩaa andũ onthe tei, nũndũ nũtonya kwĩka maũndũ onthe,
na nĩwũmĩĩasya naĩ ila andũ mekaa nĩ kana maalyũle ngoo.
24We nĩwendete syĩndũ syonthe ila syĩ kw'o,
na vai kĩndũ ũmenete katĩ wa ila woombie,
nũndũ ta kethĩwa ve kĩndũ ũmenete, ndwĩthĩwa waakyũmba.
25Nĩkũlya, ve kĩndũ kĩthĩwa kyaaĩkala kethĩwa kũyaĩ kwenda kwaku?
Kana ve kĩndũ kĩthĩwa vo kethĩwa ndwaakyũmba?
26We Mwĩai nĩwĩkalasya syĩndũ syonthe nũndũ nĩ syaku,
we ũla wendete syĩndũ ila syĩ thayũ.
Currently Selected:
Ũĩ 11: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011