Ũĩ 10
10
Wĩa wa Ũĩ kuma ĩvinda ya Atamu kũvika ya Mwose
1 #
Mwa 1.26-28
Ũĩ nĩwasũvĩie mũndũ ũla woombiwe mbee, ĩthe wa nthĩ yonthe,
ũla woombiwe e weka mbee wa andũ onthe;
Ũĩ nĩwamũvonokisye kuma ĩvĩtyonĩ yake,
2na amũnenga vinya wa kũsumbĩka syĩndũ syonthe.
3 #
Mwa 4.8-13
Ĩndĩ mũndũ ũmwe ũtaĩ mũlũngalu nĩwathatie na atia Ũĩ,
nĩweeminie nĩkwĩthĩwa nĩwooaie mwana-a-inyia nũndũ wa ũthilĩku wake.
4 #
Mwa 7.1—8.22
Nũndũ wa ĩvĩtyo ya mũndũ ũsu, nthĩ nĩyavw'ĩkiwe nĩ kĩw'ũ,
ĩndĩ Ũĩ amĩtangĩĩa.
Ũĩ nĩwatongoeisye mũndũ mũlũngalu e kĩndũnĩ kĩseũvĩtw'e na mbwaũ ite ndũmu.
5 #
Mwa 11.1-9; 12.1-3; 22.1-19 Yĩla nthĩ syathokoaniw'e nũndũ wa kũseũvya wĩw'ano wa kwĩka maũndũ mathũku,
Ũĩ nĩwamanyie kana vaĩ mũndũ ũmwe waĩ mũlũngalu na amwĩkalya ate ĩvĩtyo mbee wa Ngai,
na amũnenga vinya wa kwĩanĩsya mwĩao wa Ngai o na kau nĩwendete mwana wake mũno.
6 #
Mwa 19.1-29
Ũĩ nĩwavonokisye mũndũ mũlũngalu yĩla andũ ala matakĩaa Ngai maminawa,
wamũvonokya kuma mwakinĩ ũla watheeie wavĩvya ila Ndũa Itano.
7O na yu ve wonany'o wa ũthũku woo:
Nthĩ nthei ĩtoaa syũki ĩvinda yonthe,
yĩ mĩtĩ ĩsyaa matunda matesaa kwĩw'a,
na kĩtuĩ kya mũnyũ kĩũngamĩte ta ũlilikany'o wa mũndũ ũtaĩ na mũĩkĩĩo.
8Nĩkwĩthĩwa andũ ma ndũa isu nĩmavũthĩĩisye Ũĩ,
nĩmasiĩĩiwe weethĩa maitonya kũmanya ũla ũseo,
na o ta ũu matiĩa andũ onthe ũlilikany'o wa ũtumanu woo,
nĩ kana wĩthĩe andũ mailea kũmanya mavĩtyo moo.
9Ũĩ nĩwavonokisye athũkũmi make kuma mathĩnanĩ.
10 #
Mwa 27.43; 28.10-22; 32.24-30 Yĩla mũndũ ũmwe mũlũngalu wasembie akĩĩte ũthatu wa mwana-a-inyia,
Ũĩ nĩwamũtongoeisye esĩla nzĩanĩ ila nzeo.
Ũĩ nĩwamwonisye ũsumbĩ wa Ngai,
na amũnenga ũmanyi wa syĩndũ ntheu.#10.10 syĩndũ ntheu: Kana alaĩka
Ũĩ nĩwatumie aendeea nesa mawĩanĩ ala watethasya,
na atuma akwata syĩndũ mbingĩ kumana na wĩa wake.
11Yĩla andũ ala mamũthĩnasya meew'ĩie syĩndũ syake ĩtomo,
Ũĩ nĩwamũtetheeisye na amũtw'ĩkĩthya mũthwii.
12Ũĩ nĩwamũsũvĩie ndakekwe naĩ nĩ amaitha make,
na amũtangĩĩa kuma kwa ala mamwovetye.
Yĩla mũndũ ũsu waĩ na masindano me vinya, Ũĩ nĩwamũnengie ũsindi,
nĩ kana amanye kana kwĩthĩwa na kĩkĩo kya Ngai kũnengae mũndũ ũtonyi mbee wa syĩndũ ila ingĩ syonthe.
13 #
Mwa 37.12-36; 39.1-23; 41.37-44 Yĩla mũndũ mũlũngalu wathooiw'e ũkombonĩ, Ũĩ ndaamũtia,
ĩndĩ nĩwamũvonokisye kuma naĩnĩ.
Ũĩ nĩwaendanisye nake yela,
14na matukũ onthe ala mũndũ ũsu wekalile yela Ũĩ ndaamũtia.
Ũĩ nĩwekalile nake nginya amũtw'ĩkĩthya mũsumbĩ,
na amũnenga ũkũmũ ĩũlũ wa anene make.
Ũĩ nĩwoonanisye kana andũ ala masikatĩte mũndũ ũsu mũlũngalu maneenaa ũvũngũ,
na Ũĩ amũnenga ndaĩa ya tene na tene.
Ũĩ Nĩwatongoeisye Andũ ma Ĩsilaeli kuma Misili
15 #
Kuma 1.1—15.21
Ũĩ nĩwavonokisye mbaĩ ya andũ atheu na matatalĩlwa ĩvĩtyo,
kuma nthĩ ya andũ ala mamathĩnasya.
16Ũĩ nĩwalikile ngoonĩ ya mũthũkũmi wa Mwĩai,
na kwa kwĩka syama na moseng'yo Ũĩ asindana na asumbĩ makĩawa.
17Ũĩ nĩwanengie andũ atheu ĩtuvi ya wĩa woo,
na amatongoesya mesĩla nzĩanĩ yaĩ ya kũseng'ya.
Ũĩ aĩ muunyĩ woo mũthenya,
na aĩ ndata ya kyeni ũtukũ.
18Ũĩ nĩwamaingisye Ũkanga Mũtune,
amatongoesya kwĩsĩla kĩw'ũnĩ kĩliku,
19ĩndĩ Ũĩ nĩwatumie amaitha moo manyw'a kĩw'ũ makw'a,
na ambatya mĩĩ yoo kuma ũlikunĩ wa ũkanga yathambalala.
20Kwoou andũ ala alũngalu nĩmatavie syĩndũ sya andũ ala matakĩaa Ngai;
nĩmainie mbathi sya kũkumya ĩsyĩtwa yaku ĩtheu we Mwĩai,
nĩmainie me mũamba mataĩa ũtonyi waku ũla wamokitĩaa,
21nĩkwĩthĩwa Ũĩ nĩwatumie mũndũ ũla ũtaneenaa aneena,
na atuma tũũkenge tũneena ndeto ikwĩw'ĩka nesa.
Currently Selected:
Ũĩ 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011