Tov 8
8
Ĩimũ Yĩilũngw'a
1Yĩla maminie kũya na kũnyw'a, ĩvinda ya kũthi kũkoma nĩyavikie, na asyai ma Sala matwaa Toviasi akakome. 2Toviasi nĩwalilikanile ũtao wa Lavaeli. Nĩwaendie mũvukonĩ wake, oosa ngoo na ĩtema ya ĩkũyũ, na asilĩĩla ũla ũvaninĩ wakanĩte. 3#Mat 12.43 Mũuke wasyo nĩwatumie ndaimoni yuma, na yakĩa yathi Misili.#8.3 Misili: Misili yasũanĩawa kwĩthĩwa kĩsio kya nthĩ kĩ vaasa, na kana nĩ ũtũo wa maimũ na maveva mavuku Lavaeli nĩwamĩatĩĩie kũu, na amĩkwata amyovany'a mĩtũkĩ moko na maũũ.
Mboya Ya Toviasi
4Toviasi na Sala nĩmatiiwe nyũmba me oka asyai mamina kumaala. Toviasi nĩwookĩlile auma ũkomonĩ na eea Sela mũka wake, “Mwĩĩtu-a-ia, ũkĩla tũvoye Mwĩai Ngai atwĩw'ĩe tei, na aitũsũvĩa.” 5#Mbo 3 Sala nĩwookĩlile nĩ kana mavoye ĩmwe makũlye Ngai amasũvĩe. Nĩvo ĩndĩ Toviasi wavoyie ayasya:
“Ngai wa aaũmae maitũ nĩwaĩlĩte kũtaĩwa,
ĩsyĩtwa yaku nĩyĩkumw'e tene na tene.
Ĩtu na syĩndũ syonthe ila woombie,
nikũtaĩe tene na tene.
6 #
Mwa 2.18
Nue woombie Atamu, na woomba Eva mũka wake,
ethĩawe mũtetheesya, na aimwĩkĩaa vinya.
Andũ asu elĩ nĩmo matw'ĩkie asyai ma andũ onthe ĩũlũ wa nthĩ.
Nue waneenie wasya atĩĩ,
‘Ti ũseo mũndũ-ũme kwĩkalaa e weka,
nĩngũmba kwondũ wake mũtetheesya ũmwaĩlĩte.’
7Kwoou ndinosa mwĩĩtu-a-ia kwondũ wa wendi mũthũku wa mwĩĩ,
ĩndĩ neeka ũu nũndũ nĩ ũndũ mwaĩlu.
Twĩw'ĩe tei,
na ũitũeka twĩkale myaka mingĩ twĩ vamwe.”
8Nĩvo ĩndĩ me elĩ maisye atĩĩ, “Ameni! Ameni,”
9na makoma ũtukũ ũsu.
Kyeva kya Asyai
Ĩndĩ ũtukũnĩ ũsu Lakueli nĩweetie athũkũmi make, na mathi kwĩnza mbũa. 10Lakueli nĩwasũanĩĩte akasya atĩĩ, “Toviasi o nake nũkũkw'a, na andũ nĩmeũtũthekeea na kũtũvũthya.”
11Yĩla maminie kwĩnza mbũa, Lakueli nĩwasyokie nyũmba na eea mũka wake atĩĩ, 12“Tũma mũthũkũmi ũmwe waku wa mũndũ mũka akamanye kana Toviasi nĩ mũkw'ũ. Ethĩwa nĩ mũkw'ũ, twaĩlĩte kũmũthika andũ ala angĩ matanamba kũmanya.” 13Nĩvo ĩndĩ matũmie mũthũkũmi wa mũndũ mũka akose taa, na aithi akamanye kana Toviasi nĩ mũkw'ũ. Yĩla mũthũkũmi ũsu wavingũie mũomo, nĩwoonie Toviasi na Sala makomete makalĩkwa. 14Kwoou nĩwasyokie, na aneena na Lakueli na Etina amea kana Toviasi e o thayũ, na nde na thĩna. 15Lakueli nĩwataĩie Ngai wa ĩtunĩ.
Mboya ya Lakueli
Nĩwaisye atĩĩ,
“We Ngai wakwa nĩwaĩlĩte kũtaĩwa;
andũ maku nĩmakũtaĩe ĩvindanĩ yonthe yĩla yũkĩte.
16Nĩngũũtaĩa nũndũ wa kũtuma nĩthĩwa nĩ na ũtanu,
kĩla nĩnakĩaa kĩinaaĩkĩka;
vandũ va ũu, nũtwĩw'ĩĩte tei mwingĩ mũno.
17Twĩkũtaĩa nũndũ wa kwĩw'ĩa Toviasi na Sala tei,
ala nomo me oka ana ma asyai moo.
Mew'ĩe tei na ũimasũvĩa,
na ũimanenga thayũ wa ũtanu na wendo.”
18Nĩvo ĩndĩ Lakueli weeaĩie athũkũmi make amea malinde mbũa ĩsu kũtanakya.
Mboka ya Mũtwaano
19Lakueli nĩweeie mũka nĩaue mĩkate kwondũ wa mboka nene, nake athi ndĩthyanĩ yake aete nzaũ ilĩ na ndũũme ilĩ. Nĩweeaĩie athũkũmi make maithĩnze kwondũ wa kwĩyũmbanĩsya mboka ya mũtwaano. 20#Mwa 24.55 Lakueli nĩweetie Toviasi na amwĩa atĩĩ, “Ndikwenda kwĩw'a kana nũkwenda kũthi syumwa ilĩ ite nthelu. Ĩkala vaa tũye na tũinyw'a, ũtanĩthye mwĩĩtu wakwa ĩtina wa mathĩna onthe ala wĩthĩĩtwe namo. 21Ĩtina wa ũu ũkoosa nyusu ya ũthwii wakwa, na ũitwaa Sala kwa asyai maku e mũima na e ũsũvĩonĩ. Nyie nĩ na Etina twamina kũkw'a wĩosa nyusu ĩla ĩngĩ ĩkethĩwa ĩtialĩte ya ũthwii wakwa. Mwana wakwa, osa vinya, kuma ũmũnthĩ wĩ mwana waitũ. Twĩĩthĩwa twĩ asyai maku o tondũ twĩthĩĩtwe twĩ asyai ma Sala. Mwana wakwa, osa vinya.”
Currently Selected:
Tov 8: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011