Tov 7
7
Mũsyĩ kwa Lakueli
1Toviasi na Lavaeli mavika ndũanĩ ya Ekivatana, Toviasi nĩwamwĩie atĩĩ, “Mũnyanyawa Asalia, ndwae kwa Lakueli mĩtũkĩ.” Mũlaĩka ũsu nĩwatwaie Toviasi mũsyĩ kwa Lakueli. Nĩmeethĩie Lakueli ailyĩ mũomonĩ wa kĩwanza kĩla kyaĩ nza wa nyũmba yake. Lavaeli na Toviasi nĩmamũkethisye mbee; nake amasũngĩa amea, “Anyanyawa likai. Mwĩ athokye vaa mũsyĩ kwakwa.”
Nĩvo ĩndĩ Lakueli wamatwaie nyũmba kwake, 2na eea Etina mũka wake atĩĩ, “Kwa sisya ũndũ mwanake ũũ ũtutĩtye Toviti mwana wa mwendw'a-ĩthe wakwa?”
3Etina nĩwamakũlilye atĩĩ, “Kwenyu nĩ va?”
Toviasi na Lavaeli nĩmamũsũngĩie mamwĩa, “Twĩ ma mbaĩ ya Navutalĩ, ĩndĩ yu twĩ nthĩ ya ũeninĩ.”
4Etina amakũlya atĩĩ, “Nĩmwĩsĩ Toviti mwana wa mwendw'a-ĩthe waitũ?”
Nĩmasũngĩie masya, “Vate nzika nĩtũmwĩsĩ nesa.”
Etina amakũlya, “Aendee ata?”
Mamwĩa, “Eo thayũ na aendee nesa” 5Toviasi nĩwaisye atĩĩ, “Toviti nĩwe ĩthe wakwa.” 6#Mwa 33.4; 45.14; Lk 15.20 Yĩla Lakueli weewie ũu, nĩwookĩlile aĩĩte nĩ ũtanu na akethya Toviasi na ngethi ya wendo.
7Nĩvo ĩndĩ Lakueli weeie Toviasi atĩĩ, “Mwana wakwa, Ngai nĩakũathime. Ĩthe waku nĩ mũndũ mũseo na wĩ ndaĩa. Nĩ ũndũ ũthũkĩte ata mũndũ ũte ũvũngũ na mũlau ta ũsu kũtw'ĩka kĩlalinda!” Lakueli nĩweekwatĩlile Toviasi ngingo na aĩa akomee ituonĩ syake.
8O ta ũu Etina mũka wa Lakueli na Sala mwĩĩtu wake nĩmaĩie nũndũ wa Toviti.
9Lakueli nĩwathokisye Toviasi na Lavaeli nesa mũno na amoaĩa ĩmwe ya ndũũme syake. Aeni asu mamina kũthamba, makilĩlye kwĩkala nthĩ maye, Toviasi nĩweeie Lavaeli atĩĩ, “Mũnyanyawa Asalia, wĩĩsa ũkũlya Lakueli etĩkĩle nĩtwae Sala ĩndĩĩ?”
10Lakueli nĩweewie ĩkũlyo yĩu na eea Toviasi atĩĩ, “Amba kũya na kũnyw'a na ũyĩtanĩthya wĩoo ũũ. Vai mũndũ wĩ na ũthasyo wa kũtwaa Sala ate o we, nũndũ nue tũileny'e ũndũ mũno. Ĩndĩ ũu wĩ o vo, mwana wakwa, no nginya ngũtavye ũw'o. 11Nĩnĩnenganĩte Sala akatwawa nĩ aũme mũonza, onthe tũileny'e ũndũ. Kĩla ũmwe wa aũme asu akusaa ũtukũ wa mbee wa mũtwaano; akusaa malika nyũmba ya kũkoma oou. Ĩndĩ yu mwana wakwa, amba kũya na kũnyw'a. Mwĩai nũkũmũsũvĩa mwĩ elĩ.”
Toviasi nĩwasũngĩie asya atĩĩ, “Ũtasũngĩĩte ũndũ nakũlya, ndiya kana nĩnyw'e.”
12Lakueli nĩwamũsũngĩie amwĩa atĩĩ, “Nĩngũũnenga mwanya ũtwae Sala, o tondũ mĩao ya Mwose ĩwetete. Ngai mwene tei nĩwe ũvangĩte mũtwaano ũũ! Yu ĩndĩ osa Sala atw'ĩke mũka waku; kuma yu nĩmwatw'ĩka mũndũ na mũka. Sala nĩ waku kuma ũmũnthĩ kũvika tene na tene. Ngai mwene tei nĩamũsũvĩe ũtukũ ũũ, na aiendeea kũmwĩw'ĩa tei na kũmwĩka nesa.”
Mboka ya Mũtwaano
13Nĩvo ĩndĩ Lakueli weetie Sala mwĩĩtu wake. Yĩla Sala walikile nyũmba, Lakueli nĩwamũkwatie kw'oko na amũnengane kũla kwĩ Toviasi aendee kũneena ndeto sya ũathimo ayasya atĩĩ, “Nĩngũũnenga Sala, o tondũ mĩao ya Mwose yaĩtye. Endany'a nake mũsyĩ kwa ĩthe waku mwĩ ũsũvĩonĩ. Ngai ũla wĩ ĩtunĩ nĩamũnenge kyalo kĩseo na kĩ mũuo.”
14Nĩvo ĩndĩ Lakueli wavĩndũkie asisya mũka na amwĩtya vandũ aandĩke ndeto sya wĩw'ano wa mũtwaano. Kwa nzĩa ĩsu Lakueli nĩwanenganie Sala mwĩĩtu wake atwawe nĩ Toviasi, o tondũ mĩao ya Mwose yaĩtye. 15Ĩtina wa ũu, nĩmambĩĩie kũya na kũnyw'a.
16Lakueli nĩweetie mũka amwĩa atĩĩ, “Mwendwa wakwa, seũvya nyũmba ĩla ĩngĩ, na wamina ũitwaa Sala vo.”
17Etina nĩwalanilye kĩtanda o tondũ weeĩtwe nĩ Lakueli. Nĩvo ĩndĩ watwaie mwĩĩtu wake nyũmbanĩ ĩsu na Sala ambĩĩa kũĩa. Inyia wake nĩwamũvangũlile methoi na amwĩa atĩĩ, 18“Mwĩĩtu wakwa, eka kũkĩa. Nĩnĩsĩ nesa vyũ kana Mwĩai wa ĩtu nũkũalyũla kĩĩo kyaku kĩtw'ĩke ũtanu! Mwĩĩtu wakwa, ĩthĩwa na ũkũmbaũ!” Nĩvo ĩndĩ Etina waumaalile athi.
Currently Selected:
Tov 7: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011