Tov 6
6
Toviasi Aikwata Ĩkũyũ
1Toviasi na ũla mũlaĩka nĩmambĩĩie kyalo. Toviasi aendete na ngitĩ yake. Mũthenya wa mbee wa kyalo ĩa mawĩoo, nĩmavikie ũtee wa Ũsĩ wa Tingilisi. 2Nĩvo ĩndĩ Toviasi watheeie ũsĩnĩ akathambe maũũ. Ĩkũyũ yĩmwe ĩnene nĩyathaanyũkie kuma kĩw'ũnĩ yĩyenda kũmũmelya. Toviasi nĩwakayie, 3na mũlaĩka amwĩa atĩĩ, “Kwata ĩkũyũ yĩu, ndũkayĩeke yĩthi!” 4Toviasi nĩwakwatie ĩkũyũ yĩu na ayumya ayia ũtee wa ũsĩ.
Mũlaĩka nĩweeie Toviasi atĩĩ, “Tema ĩkũyũ yĩu ũyatũany'e, na ũyumya nyongo ya yo, ngoo na ĩtema. Ia syĩndũ isu nũndũ nitonya kũtũmĩwa ta ndawa. Ĩkya maa ma ĩkũyũ yĩu ĩtheka.”
5Toviasi nĩweekie ũndũ mũlaĩka wamwĩaĩie. Nĩvo ĩndĩ woosie nyama ĩmwe ya ĩkũyũ yĩu amĩua aya na avaka nyama ĩla ĩngĩ mũnyũ nĩ kana ndĩkathũke.
Nĩmaendeeie na kyalo nginya mathengeea Metia. 6Toviasi nĩwakũlilye ũla mũlaĩka atĩĩ, “Mũnyanyawa Asalia, ũwau ũla ũvoaw'a nĩ nyongo, ngoo kana ĩtema ya ĩkũyũ nĩ wĩva?” 7Mũlaĩka nĩwamũsũngĩie amwĩa atĩĩ, “Ngoo na ĩtema ya ĩkũyũ nitonya kũvĩvw'a na iitũmĩwa kũlũngya ĩimũ kana veva mũthũku ũla ũũthĩny'a mũndũ. Mũndũ ũsu akaeka kũvithũkĩwa vyũ, na ndakathĩnw'a ĩngĩ. 8Nũtonya kũtũmĩa nyongo ĩsu kũiita mũndũ ũla wĩ na makwaũ meũ metho. Wavaka nyongo ĩsu methonĩ make na ũivuva makwaũ asu, mũndũ nĩwambĩĩa kwona nthĩ ĩngĩ.”
Toviasi na Mũlaĩka me nzĩanĩ ya kũthi Ekivatana
9Yĩla mavikie Metia, makilĩlye kũvika ndũanĩ ya Ekivatana, 10Lavaeli nĩwaneenie asya atĩĩ, “Mũnyanyawa Toviasi!”
Toviasi nĩweetĩkie, “Ĩĩ, wĩasya ata?”
Lavaeli amwĩa, “Ũmũnthĩ wĩoo twĩkomela kwa Lakueli, mũndũ wa mũsyĩ wenyu. Lakueli e mwana o ũmwe mwĩĩtu wĩtawa Sala. 11Kwĩanana na kĩthĩo, we wĩ ũndũ ũileny'e na Sala, na wĩ na ũthasyo wa kũmũtwaa na kwosa ũtiĩwa wa ĩthe wake. 12Sala nĩ mwĩĩtu wĩ mosũanĩo maseo, wĩ ũkũmbaũ, na nĩ mwanake mũno. Ĩthe wake nĩ mũndũ mũseo. Ũmũnthĩ wĩoo nĩngũneenany'a na ĩthe wake ĩũlũ wa mũtwaano, na nũkwĩtĩkĩla ũkũnenga Sala atw'ĩke mũka waku. Ĩtina wa ũu twauma Lakesi nĩtũũthi kũtanĩa mũtwaano. Lakueli ndesa kũlea ũitwaa Sala, na ndetĩkĩla mũndũ ũngĩ amũtwae. Aketĩkĩla mũndũ ũngĩ atwae Sala, ethĩwa atũla mĩao ya Mwose na ethĩwa aĩlĩte kũawa.”
13Nĩvo ĩndĩ Toviasi weeie Lavaeli atĩĩ, “Mũnyanyawa Asalia, nĩnĩminĩte kwĩw'a maũndũ ala makwatie aũme mũonza ala matwaie Sala vau mbeenĩ, ũndũ kĩla ũmwe wa aũme asu wakusaa mĩtũkĩ mũthenya wa mũtwaano, o na atanamba kũmanyana kĩ-mwĩĩ na Sala. 14O ta ũu nĩnĩw'ĩte kana aũme asu moaawa nĩ ĩimũ. Ĩimũ yĩu yĩithĩnasya Sala, ĩndĩ yũaa mũndũ-ũme o na wĩva ũla watata kũmũthengeea. Nĩngũkĩa ĩimũ yĩu. Nyie nĩ mwana o ũmwe, na nakw'a asyai makwa nĩmekũawa nĩ kyeva; o na mai na mwana ũngĩ ũtonya kũmathika.”
15Mũlaĩka nĩwamũsũngĩie amwĩa atĩĩ, “Yu nĩwũlilwe nĩ ũndũ ĩthe waku waisye. Akwĩie nũtwae mũndũ mũka kuma andũnĩ ma mbaĩ yaku. Kwoou ĩthukĩĩsye nesa ũndũ ngũkwĩa. Ndũkakĩe ĩimũ yĩu. Twaa Sala! Nĩnĩsĩ nesa kana ũmũnthĩ wĩoo Lakueli nũkwĩtĩkĩla ũtwae Sala. 16Mwalika nyũmba ya kũkoma, lika ũkuĩte ngoo na ĩtema sya yĩla ĩkũyũ na ũisilĩĩla ũvaninĩ wakanĩte, 17nĩ kana mũuke ũnyaĩĩkĩe nyũmba. Ĩimũ yĩu yeew'a mũuke ũsu, nĩyĩkũthi na yĩimũthengeea Sala ĩngĩ. Ĩndĩ mũtanamba kũmanyana kĩ-mwĩĩ ĩvinda ya mbee mwatwaana, no nginya mũkĩle mwĩ elĩ na mũivoya Mwĩai wa ĩtu amwĩwie tei na aimũsũvĩa. Ndũkakĩe, nũndũ kuma kũmbwa kwa nthĩ, Sala avangĩtwe ethĩwe e waku. Nũũtangĩĩa Sala kuma ĩimũnĩ yĩu, na ayĩendany'a naku mũsyĩ kwaku. We na Sala mũkasyaa syana mbingĩ ila ũkethĩwa wendete mũno, kwoou ndũkakĩe.”
Toviasi nĩweethukĩĩisye nesa maũndũ onthe ala Lavaeli wamũtavisye. Nĩwamanyie kana me ũndũ maileny'e na Sala ngalĩkonĩ ya mũsyĩ wa ĩthe wake. Toviasi nĩwambĩĩie kwenda Sala na enda mũno kũmũtwaa.
Currently Selected:
Tov 6: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011