Tov 5
5
Kwĩyũmbanĩsya Kyalo
1Nĩvo ĩndĩ Toviasi wasũngĩie ĩthe wake amwĩa atĩĩ, “Nau nĩngwĩanĩsya maũndũ asu onthe wandavya. 2Ĩndĩ nĩũkũlya atĩĩ, mbesa ila syĩ na Kavaeli ngaikwata ata na tũyĩsene nĩ nake? Ngamũĩkĩĩthya ninyie ũũ ata, nĩ kana andĩkĩĩe na ainenga mbesa isu? Ũu wĩ o vo, o na ndyĩsĩ nzĩa ya kũthi Metia.”
3Toviti nĩwasũngĩie mwanae amwĩa atĩĩ, “Nyie nĩ na Kavaeli nĩtwaandĩkanie vandũ. Nĩnoosie valũa ũla twaandĩkanie na naũaanĩlya katĩ. Kĩla mũndũ nĩwoosie nyusu yaw'o. Tweekie ũu myaka mĩongo ĩlĩ mĩvĩtu! Yu enda ũmanthe mũndũ wa kwĩkwatw'a mũendany'e nake Metia na mũisyokany'a. Tũkaĩva mũndũ ũsu mwasyoka. Ĩndĩ no nginya mũke na mbesa isu natiĩie Kavaeli.”
Toviasi Aikomana na Lavaeli
4 #
Aevl 13.2
Toviasi nĩwaendie kũmantha mũndũ wĩsĩ nzĩa ya kũthi Metia nĩ kana maendany'e. Auma mũsyĩ oou, Toviasi nĩwakomanie na Lavaeli. Toviasi ndeesĩ kana Lavaeli nĩ mũlaĩka wa Ngai, 5na kwoou amũkũlya atĩĩ, “Mwanake, mumĩte va?”
Lavaeli nĩwamũsũngĩie amwĩa atĩĩ, “Nyie nĩ mũndũ wa Ĩsilaeli, ũmwe wa andũ ma mũsyĩ wenyu ala mekalaa kũasa. Nũkĩte vaa Nineva kũmantha wĩa.”
Toviasi nĩwamũkũlilye atĩĩ, “Nĩwĩsĩ nzĩa ya kũthi Metia?” 6Lavaeli amũsũngĩa amwĩa atĩĩ, “Ĩĩ, nĩnĩmĩsĩ. Nĩendete Metia mavinda maingĩ na nĩnĩsĩ nzĩa syonthe nesa. Nekalaa na Kavaeli mũndũ wa mũsyĩ witũ ũla ũtwĩe Metia ndũanĩ ya Lakesi. Lakesi yĩ vandũ iĩmanĩ ĩũlũ, na kũthi vo mũndũ akuaa mĩthenya ta ĩlĩ kuma Ekivatana ndũa nene ya Metia.”
7Nĩvo ĩndĩ Toviasi weeie Lavaeli atĩĩ, “Mwa, mbeteele vaa nambe kũthi nĩneene na nau. Nĩenda tũendany'e na nĩngũkũĩva nũndũ wa kyalo kĩu.”
8Lavaeli nĩwamwĩie atĩĩ, “Enda, na ndũkekale mũno”
9Toviasi nĩwaendie alika nyũmba na eea ĩthe atĩĩ, “Nĩnoona mũndũ wa Ĩsilaeli takwa tũtonya kũendany'a.”
Toviti nĩweeie Toviasi atĩĩ, “Mwĩte oke. Nĩenda kũmanya nĩ wa mũsyĩ wĩva na aumĩte mbaĩnĩ yĩva. O ta ũu nĩenda kũmanya kana nĩ mũndũ ũtonya kũĩkĩĩka na mũtonya kũendany'a.”
Toviti Aikomana na Lavaeli
10Toviasi nĩwaendie eeta Lavaeli aimwĩa atĩĩ, “Nau eenda ũkwona.” Yĩla Lavaeli walikile, Toviti nĩwe wamũkethisye mbee.
Lavaeli nĩwasũngĩie ngethi ĩsu ayasya, “Nĩĩkwatya ũendee nesa.”
Ĩndĩ Toviti asũngĩa asya, “Ndonya kũendeea nesa ata? Nyie nĩ kĩlalinda na kwoou vai kĩndũ ndonya kwona. No ũndũ ũmwe na mũndũ e mũkw'ũ; ndatonya kwona kyeni. Nakwa o ta ũu no ta nĩ mũkw'ũ. Nĩndonya kwĩw'a andũ maineena, ĩndĩ nditonya kũmona.”
Lavaeli nĩweeie Toviti atĩĩ, “Ĩthĩwa na ũkũmbaũ. Ngai nũkũũvosya kavinda kanini kokĩte. Ndũkathĩnĩke!”
Toviti nĩwaisye atĩĩ, “Mwana wakwa eenda kũthi Metia. Nũtonya kũendany'a nake na ũimwony'a nzĩa? Nĩngũkũĩva, ndũkethĩwe na kĩũũyũ.”
Lavaeli nĩwamũsũngĩie amwĩa atĩĩ, “Vate nzika nĩngũendany'a nake. Nĩendete Metia mavinda maingĩ. Nĩnĩsĩ nzĩa sya kw'o syonthe ila syĩ iĩmanĩ na myandanĩ.”
11Toviti nĩwamũkũlilye atĩĩ, “Mũnyanyawa, kwa ndavye wumĩte mũsyĩ wĩva na wĩ wa mbaĩ yĩva?”
12Ĩndĩ Lavaeli amũsũngĩa amwĩa, “Wĩenda kũmanya mbaĩ yakwa nĩkĩ?”
Toviti amũsũngĩa, “Nĩenda kũmanya nesa asyai maku nĩ aaũ, na wĩtawa ata.”
13Lavaeli nĩwamwĩie atĩĩ, “Nĩtawa Asalia, mwana wa mũtumĩa Anania, ũmwe wa andũ ma mũsyĩ waku.”
14Nĩvo ĩndĩ Toviti wamwĩie atĩĩ, “Wĩmũthokye mũsyĩnĩ witũ! Ndũkathate nũndũ nĩendaa kũmanya ũw'o ĩũlũ waku, na andũ ma mũsyĩ waku. Kaĩ we wĩ wa andũ ma mũsyĩ wakwa, mũsyĩ mũseo ũnengetwe ndaĩa! Nĩnĩsĩ Anania na Nathani ala ana elĩ ma mũtumĩa wĩ nguma wĩtawa Semaya. Nĩtwamanyĩĩte kũendany'a ĩmwe yĩla tũendete Yelũsalemu. Mo mayaaĩtĩkĩla ĩvinda o na yĩmwe kuma nzĩanĩ ĩla nzeo. Andũ ma mũsyĩ waku nĩ andũ me kĩthito. Wumĩte mũsyĩnĩ mũseo!”
15Toviti nĩwaendeeie kũneena asya atĩĩ, “Nĩngũũnenga ĩtuvi ya kĩla mũthenya, na nĩngũĩva kĩla ũũtũmĩa wĩ na mwana wakwa. Yu endany'a na mwana wakwa, 16#Mwa 24.7,40 na mwasyoka mwĩ aima ngakwongela kĩndũ.”
Lavaeli nĩwasũngĩie asya atĩĩ, “Nĩngũendany'a nake ndũkethĩwe na nzika. Twĩthi na tũisyoka twĩ ũsũvĩonĩ. Vai mũisyo nzĩanĩ.” 17Nĩvo ĩndĩ Toviti waneenie asya atĩĩ, “Mũnyanyawa, nĩkwendea ũathimo wa Ngai.” O ta ũu nĩweeie Toviasi, “Mwana wakwa, ũmbany'a syĩndũ syonthe ila mũũtũmĩa mwĩ kyalonĩ na ĩndĩ mũithi mwĩ elĩ. Ngai wa ĩtunĩ nĩamũsũvĩe mwĩ kũla mũũthi, na aimũtũnga vaa nĩĩ mwĩ aima. Mwana wakwa, mũlaĩka wa Ngai nĩaendany'e nenyu na aĩmũsũvĩa!”
Matanamba kwambĩĩa kyalo kya kũthi Metia, Toviasi nĩwakethisye ĩthe na inyia na ngethi ya wendo. Toviti nĩwamwĩie atĩĩ, “Ĩthĩwa na kyalo kĩseo!”
18Ana, inyia wa Toviasi nĩwambĩĩie kũĩa na akũlya mũũme wake atĩĩ, “Ũtonya ata kũtũma mwana waitũ kũndũ kũasavĩte ũu. Mwana ũsu nowe wĩkwatyo witũ yĩla wĩ vamwe naitũ. 19Mbesa isu nĩsyo syĩ vata kwaku ũkethĩa no ũlikye mwana waku mũisyonĩ nĩ kana ũikwate? 20Nĩkĩ tũleete kwĩanĩwa nĩ kĩla Mwĩai ũtũnengete?”
21Toviti nĩwasũngĩie mũka atĩĩ, “Ndũkethĩwe na kyeva. Mwana waitũ nũkũthi na aisyoka e mũima. We ũkamwona ĩngĩ na metho maku. Mwendwa wakwa, ndũkaneene kana kũthĩnĩka nĩmo. Nĩmekũendany'a na mũlaĩka mũseo. Mwana waitũ ethi kyalo kĩu na aisyoka e na ũima wa mwĩĩ.” Nĩvo ĩndĩ Ana waekie kũĩa.
Currently Selected:
Tov 5: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011