Tov 2
2
Mboka ya Mũsyĩ
1 #
Kuma 23.16
Yĩla nasyokie mũsyĩ nĩnatũngĩiwe Ana mũka wakwa na Toviasi mwana wakwa. Ĩvindanĩ ya Mboka ya Ngetha, ĩla kwa ĩsyĩtwa yĩngĩ yĩtawa Mboka ya Syumwa Mũonza, nĩnaseũvĩiw'e mboka nene na nekala nthĩ nĩye. 2Yĩla noonie ũndũ lĩu ũla waĩ mesanĩ weanaa, nĩnaneenie na Toviasi mwana wakwa namwĩa atĩĩ, “Mwana wakwa enda nza ũsisye kana ve Mũyuti ngya na wĩ na kĩkĩo kya Ngai ũmũete vaa tũĩsanĩe lĩu ũũ. Ndiambĩĩa kũya nginya ũsyoke.”
Andũ Mayũawa Nineva
3Toviasi nĩwaendie kũmantha mũndũ ngya katĩ wa ana-a-ĩthe maitũ ala maĩ Nineva nthĩ ya ũeninĩ. Ĩndĩ nĩwasyokie na ambĩta, “Nau,” nakwa neetĩka namũkũlya, “Mwana wakwa nĩ kyaũ?” Nĩwaendeeie kũneena ambĩa atĩĩ, “Nau mũndũ ũmwe waitũ nĩwooawa oyu! Ve mũndũ wamwita na amũkua amwĩkya ndũnyũ katĩ.”
4Kwa mĩtũkĩ nĩnookĩlile, natia lĩu mesanĩ o na ndaũkiitĩte, nathi noosa mwĩĩ wa mũndũ ũsu nawumya ndũnyũ na nathi kũũvitha vandũ muunyĩnĩ nĩ kana nĩse kũũthika ĩa mawĩoo. 5#Mot 19.11-13 Nĩnasyokie mũsyĩ ĩngĩ nathamba nĩthesye na naya lĩu wakwa nĩ na kyeva. 6#Amo 8.10 Nĩvo ĩndĩ nalilikanile ndeto sya mwathani Amosi:
Mboka syenyu ikatw'ĩka kĩmako,
na mbathi syenyu iitw'ĩka kĩĩo.
Nĩnaĩie.
7Syũa yathũa, nĩnaendie nenza mbũa na nathika ũla mũndũ. 8Atũi makwa nĩmanthekeeaa mayasya atĩĩ, “Kwoonai ũũ! O na ndeũkĩa! Ĩvinda yĩla yĩngĩ anesaa kũawa nũndũ wa kwĩka maũndũ aya. Anaĩ vaati nũnavonokie, ĩndĩ yu eĩka maũndũ o asu.”
Toviti Aitw'ĩka Kĩlalinda
9Ũtukũ ũsu nĩnathambie nĩ kana nĩthesye. Nĩnaendie kũkoma nza mbĩlĩlo wa nyũmba ũtee wa ũkũta. Nũndũ kwaĩ kũvyũ mũno ndyaaĩvw'ĩka mũtwe. 10Ndyeesĩ kana ũkũtanĩ ũsu ĩũlũ wakwa vaĩ nthũngũlũlũ. Nthũngũlũlũ isu nĩsyamĩĩie metho mai me muutĩa, na metho makwa mavw'ĩkwa nĩ makwaũ meũ.
Nĩnaendie kwona ndakĩtalĩ syĩ kĩvathũkany'o, ĩndĩ vai o na ũmwe waandiita ngavoa. Mũminũkĩlyonĩ nĩnatw'ĩkie kĩlalinda vyũ. Nekalile ndekwona nthĩ vandũ va myaka ĩna. Andũ ala tũileny'e ũndũ nĩmanthĩnĩkĩaa mũno. Aika andetheeisye vandũ va myaka ĩlĩ atanamba kũthi Elamu.
Ĩteta ya Mũsyĩ
11Aika amina kũthi, Ana mũka wakwa nĩwaendie kũthũkũma, na kwoou ambĩĩa wĩa wa kũtuma ngũa o ũndũ aka angĩ meekaa. 12Nĩwaĩvawa nĩ andũ ala wathũkũmaa amina kũmanenga ngũa syoo. Ĩvinda yĩmwe kwĩ mbevo, Ana nĩwatilile kĩtambaa kyaminĩte kũtumwa na akĩtwaĩa ala mamwĩtĩtye. Nĩmamũĩvie mbesa syakyo na o ta ũu mamũnenga mbũi.
13Ana avika mũsyĩ, mbũi ĩsu nĩyambĩĩe kwany'a. Nĩnakũlilye Ana mũka wakwa atĩĩ, “Mbũi ĩsu yauma va? Nĩwooya mbũi ĩno, kana ti w'o? Mĩtũngĩe ene; ti ũseo kũya lĩu wũyĩtwe.”
14Ana nĩwanzũngĩie ambĩa atĩĩ, “Aiee, nanengwa mbũi ĩno ta mũthĩnzĩo ĩũlũ wa ĩtuvi yakwa ya kũthoosya ngũa.” Nyie ndyaaĩkĩĩa ũndũ Ana wambĩie na nakwatwa nĩ nthoni nũndũ wa meko make. Nĩnamwĩaĩie atũngĩe ene mbũi ĩsu. Nĩvo ĩndĩ Ana wanzũngĩie ambĩa, “Aya, we nĩwatetheeisye ngya. Wakwatie kyaũ kumana na meko maku? Ũndũ ũla waũkwatie nĩ waĩlĩte?”
Currently Selected:
Tov 2: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011