Tov 1
1
1Ũũ nĩ ũvoo wa Toviti mwana wa Tovieli, mwĩsũkũũe wa Ananieli; Ananieli aĩ mwana wa Atueli ũla waĩ mwana wa Kavaeli, wa mũsyĩ wa Asieli ũla waĩ wa mbaĩ ya Navutalĩ. 2#Kũt 4.2; 12.32 Ĩvindanĩ yĩla Salimaneseli waĩ mũsumbĩ wa Asuli, Toviti nĩwataviwe kuma ndũanĩ yake ya mũsyĩ ĩla yĩtawa Tisive. Ndũa ya Tisive yĩ ngalĩko ya ĩũlũ ya Kalilii, na ngalĩko ya ĩtheo ya Katesi ĩla yĩ Navutalĩ, ngalĩko ya ũthũĩlonĩ wa syũa wa Asoli na ngalĩko ya ĩũlũ ya Sevati.
Toviti e wa Mũika
3Ĩvindanĩ ya thayũ wakwa w'onthe, nyie Toviti nĩnĩthĩĩtwe ngĩatĩĩa ũw'o na kwĩka nesa. Mavinda maingĩ nĩnatetheeasya andũ ma mũsyĩ witũ na Ayuti ala angĩ ngya, ala twatavĩtwe vamwe tũkatwawa Nineva, nthĩ ya Asuli. 4Yĩla naĩ mwanake, twĩ o nthĩ yaitũ ya Ĩsilaeli, mbaĩ syonthe sya andũ ma Ĩsilaeli syaĩ na watho wa kũthi kumĩsya nthembo Yelũsalemu. Katĩ wa ndũa syonthe sya Ĩsilaeli, Ngai anyuvĩte ndũa ya Yelũsalemu yĩ yoka yĩthĩwe vandũ va kũthembea. Ndũanĩ ĩsu nĩvo vaakĩtwe Ĩkalũ, yĩla nĩyo mũsyĩ wake mũtheu na wa tene na tene. Ĩndĩ andũ ma mbaĩ yakwa ya Navutalĩ onthe, nĩmeevathĩte kuma ndũanĩ ya Yelũsalemu na kuma mũsyĩnĩ wa Ndeviti. 5#1Asu 12.28-29 Ĩndĩ ana-a-ĩthe makwa onthe na mbaĩ ya Navutalĩ mathembeaa kĩĩmanĩ o na kĩva; mathembeaa ngai ya mũvw'anano ya kasalũ, ĩla yaseũvĩtw'e nĩ Yelovoamu mũsumbĩ wa Ĩsilaeli, ndũanĩ ya Ndani ĩla yĩ iĩmanĩ ĩla syĩ kĩsionĩ kya Kalilii.
Toviti Aiendeea Kwĩkala Mũĩkĩĩonĩ wake.
6 #
Kũt 16.16
No inyie nĩ nyioka katĩ wa andũ ma mũsyĩ witũ naendaa Yelũsalemu kũtanĩa mboka sya kĩ-ũthaithi, o tondũ mĩao ya Mwose yĩaĩte ũndũ kĩla mũndũ waĩlĩte kwĩka. Nĩnaendaa Yelũsalemu mĩtũkĩ nĩkuĩte ngetha ya mbee, nyamũ ĩla yasyawa mbee ya indo syakwa, kĩlungu kya ĩkũmi kya ng'ombe syakwa, na w'ĩa wa mbee ũla wenzetwe malondu makwa. Nĩvo ĩndĩ naũngamaa mbee wa kĩthembeo Ĩkalũnĩ, na ngĩnenga athembi ala nĩ nzyawa sya Alũni nthembo isu. 7Nĩnanenganae kĩlungu kya ĩkũmi kya ngetha yakwa ya mbaa mbeke, ndivai, mauta, makũngũmanga, matunda ma makũyũ na matunda angĩ; nainengae Alivai ala mathũkũmaa Ngai Yelũsalemu. Kĩla mwaka ate o mwaka wa mũonza, yĩla mĩũnda yeethĩawa ĩthũmũĩte, nĩnatesaa kĩlungu kya ĩkũmi kya kelĩ kya syĩndũ syakwa, na ngĩtũmĩa mbesa isu nĩ Yelũsalemu. 8Kĩlungu kya ĩkũmi kya katatũ nĩnanengae syana ndiwa, aka ndiwa na aeni ala matwĩe katĩ wa andũ ma Ĩsilaeli. Namanengae ta mũthĩnzĩo ĩtina wa kĩla myaka ĩtatũ. Yĩla tũũya lĩu twaatĩĩaa mĩao ya Mwose, na motao ma Ndevola inyia wa ũmae wakwa Ananieli. Ĩthe wakwa aĩ anakw'a ngatiwa nĩ ndiwa.
Ũĩkĩĩku wa Toviti e Nthĩ ya Ũeninĩ
9Namina kwĩana nĩnatwaie Ana, ũmwe wa andũ ma mbaĩ yakwa. Nĩtwasyaie kavĩsĩ na twaketa Toviasi. 10Ĩtina wa ũu nĩnakwatiwe natwawa Asuli nĩ mwove. Kĩu nĩkyo kyatumie nĩtũa Nineva.
Twĩ Nineva, andũ ma mũsyĩ witũ na Ayuti ala angĩ maĩsaa lĩu o ũla waĩsawa nĩ Andũ-ma-mbaĩ-ingĩ, 11ĩndĩ nyie nĩnaleile kũya lĩu ũsu, 12nũndũ nĩnalũmĩtye mĩao ya Ngai Ũla wĩ Ĩũlũ Mũno nĩyumĩtye vyũ. 13Ũla wĩ Ĩũlũ Mũno nĩwatumie Mũsumbĩ Salimaneseli anenga ndaĩa, na kwoou nanengwa wĩa wa kũthooeaa mũsumbĩ lĩu wake. 14Mũsumbĩ ũsu atanamba kũkw'a, mavinda maingĩ nĩnaendaa nthĩ ya Metia kũmũthooea syĩndũ. Mũthenya ũmwe nĩ ndũanĩ ya Lange ĩla yĩ Metia, nĩnatiĩie Kavaeli mwana-a-inyia wa Kavilia, mbesa mĩvuko yĩana ũndũ mũna na namũkũlya ambiĩe. Mĩvuko ĩsu yaĩ na kĩlo mbee wa maana atatũ sya mbesa sya silĩva. 15Salimaneseli akw'a, Senakelivu mwana wake nĩwatw'ĩkie mũsumbĩ. Ĩtina wa ĩvinda ĩkuvĩ, kwĩsĩla nzĩanĩ mũndũ aendete Metia nĩkweethĩiwe kwĩ na mũisyo weethĩa nditonya kũthi kw'o ĩngĩ.
Toviti Aithika ala Akw'ũ
16Ĩvindanĩ yĩla Salimaneseli waĩ mũsumbĩ, nĩnasũvĩaa Ayuti ala maĩ na thĩna. 17#Yovu 31.16-20 Ala me na nzaa nĩnamanengae lĩu. Yĩla matw'ĩkĩwa nĩnamanengae imwe sya ngũa syakwa. Kĩla ĩvinda noona mwĩĩ wa ũmwe wa andũ makwa wĩ mwĩkye nza wa ũkũta wa ndũa e mũkw'ũ, nĩnawosaa na kũũthika vandũ nesa.
18Mũthenya ũmwe Mũsumbĩ Senakelivu nĩwaumie Ngai, Mũsumbĩ wa Ĩtunĩ. Ngai nĩwamũkanisye na Senakelivu aekana na Yuta. E nzĩanĩ asyokete Metia, nĩwathatĩte mũno na ũu watuma oaa andũ aingĩ ma Ĩsilaeli. Kwa kĩmbithĩ nĩnoosie mĩĩ yoo na namĩthika. Ĩtina Senakelivu nĩwesie kũmantha mĩĩ ĩsu ĩndĩ ndaamyona.
19Nĩvo ĩndĩ mũndũ ũmwe kuma Nineva watavisye mũsumbĩ kana ninyie nathikaa andũ ala wooaa. Namina kwĩw'a oou kana mũsumbĩ nĩwĩsĩ maũndũ ala neekaa, na kana thayũ wakwa wĩ mũisyonĩ nĩnakwatiwe nĩ w'ĩa. Kwoou nĩnakĩie nathi kwĩvitha. 20Syĩndũ syakwa syonthe nĩsyoosiwe na syaiwa kĩnandũnĩ kya kĩ-ũsumbĩ. Natiĩiwe o kĩveti kyakwa Ana na mwana wakwa Toviasi.
Toviti Aitangĩĩwa nĩ Aika
21Ĩtina wa maũndũ asu, o na mĩthenya mĩongo ĩna ĩte mĩthelu, Mũsumbĩ Senakelivu nĩwooaiwe nĩ ana make elĩ. Ana asu nĩmakĩie mathi iĩmanĩ sya Alalati. Esaliatoni mwana ũngĩ wa Senakelivu nĩwatw'ĩkie mũsumbĩ. Nĩwatw'ĩkĩthisye Aika mwana wa mwana-a-inyia wakwa Anaeli mũũngamĩi wa maũndũ onthe ma mbesa ma nthĩ yake, na o ta ũu amũtw'ĩkĩthya mũũngamĩi wa mĩvango ya nthĩ. 22Yĩĩ yaĩ ĩvinda ya kelĩ ya Aika kũnengwa wĩa ũsu, nũndũ ĩvindanĩ yĩla Senakelivu waĩ mũsumbĩ wa Asuli, Aika nĩwe wanenganae ndivai, aĩ mwii wa kĩnandũ, mũtali wa mbesa, na nĩwe waiaa mũulĩ ũla watũmĩawa. Nũndũ Aika aĩ mwana wa mwana-a-inyia wakwa, nĩwaneeneie nesa kũla kwĩ mũsumbĩ na nanengwa mwanya nĩsyoke Nineva.
Currently Selected:
Tov 1: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011