Tov 3
3
Mboya ya Toviti
1Nĩnakwatiwe nĩ nthoni mũno na nambĩĩa kũĩa. Nĩnambĩĩie kũvoya nĩ na kĩĩo na nasya atĩĩ,
2“Ame Ngai, we nue mwene ũlũngalu,
meko maku onthe nĩ malũngalu.
Nzĩa syaku syonthe syusĩe mumo na ũw'o;
nue mũsili wa nthĩ yonthe.
3Yu ĩndĩ Ngai,
ndilikane na ũinzisya.
Ndũkangany'e nũndũ wa naĩ syakwa,
kana nũndũ wa mavĩtyo makwa,
kana mavĩtyo ma aaũmae makwa.
4Mo mayaatĩĩaa mĩao yaku,
kwoou nĩwaekie tũvithũkĩwe,
tũtavwe na kũawa.
Nĩwatumie tũtw'ĩka andũ ma kũvũthw'a,
na kũthekeewa nĩ andũ ma nthĩ syonthe kũla watũnyaĩĩkĩsye.
5Mavinda maingĩ nĩwasilĩle aaũmae makwa,
nũndũ wa naĩ syoo na kũngany'a nũndũ wa naĩ syakwa.
Tũyaĩ aĩkĩĩku na nĩtwaleile kũatĩĩa mĩao yaku,
kwoou ũkany'o witũ kĩla ĩvinda wĩthĩawa ũtwaĩlĩte.
6“Yu ĩkana nakwa ũndũ ũkwenda;
osa thayũ wakwa nĩ kana nume nthĩ ĩno.
Eka mwĩĩ wakwa ũsyoke mũthanganĩ;
nĩ kavaa kethĩwa nĩ mũkw'ũ.
Nĩngũthĩnw'a nĩ kũumangwa kũtambaĩlĩte,
na nĩngũthĩnw'a nĩ kũkw'a ngoo.
Yu ĩndĩ Mwĩai umya mwĩao,
mina mathĩna makwa onthe,
ndwae ũthũmũonĩ wakwa wa tene na tene.
Ndũkandie.
Nĩ kavaa ngakw'a kũte kwĩkala thayũ wa thĩna,
na kwĩw'a ngĩumangwa ũu.”
Mathĩna ma Sala.
7Mũthenya o ũsu, ndũanĩ ya Ekivatana ĩla yĩ Metia, Sala mwĩĩtu wa Lakueli nĩwaumiwe nĩ mũndũ mũka ũmwe ũla waĩ mũthũkũmi wa ĩthe wake. 8Sala atwaĩtwe mavinda mũonza ĩndĩ Asimotiũsi, ĩimũ ĩthũku nĩyooaa mũũme wa Sala matanamba kũmanyana kĩ-mwĩĩ ĩtina wa kũtwaana. Mũthũkũmi ũsu mũndũ mũka nĩweeie Sala atĩĩ, “Nue wũaa aũme ala makũtwaa. Yu ũtwaĩtwe nĩ aũme mũonza, na vai ũmwe waaĩkala thayũ nginya mũkasyaa kavĩsĩ. 9Wĩtũthĩnĩsya kĩ? Enda, ũatĩĩe aũme asu maku makwie. Nĩ kavaa o na tũkalea kwĩsa kwona kana we ũsyaĩte!”
10Yĩla Sala weewie ndeto isu, nĩwakwatiwe nĩ kĩũũyũ mũno na aĩa. Nĩwalĩsile nyũmbanĩ ya ĩũlũ ya ĩthe ayenda kwĩyũaa. Ĩndĩ yĩla Sala wasũanĩie nĩwaisye, “Aiee, ndiĩyũaa, andũ maikese kũvũthya nau maimwĩa, ‘Waĩ na kana o kamwe kelĩtu kala ũnendete mũno, ĩndĩ nĩkaneeyũaie nũndũ wa woo.’ Ũndũ ta ũsu nũũtuma ĩthe wakwa mũkũũ akw'a, nakwa ndyĩthĩwa nĩ na ĩvĩtyo. Aiee, nyie ndiĩyũaa, nĩvoya Ngai ose thayũ wakwa ndikew'e ngĩumwa ũu ĩngĩ!”
Mboya ya Sala
11Nĩvo ĩndĩ Sala waũngamie ndĩlĩsyanĩ, ookĩlya moko make na avoya ayasya:
“Ame Mwĩai, Ngai wĩ tei,
ĩsyĩtwa yaku nĩyĩtaĩwe;
syũmbe syonthe ila woombie nikũtaĩe tene na tene.
12Yu Mwĩai, nue nzyaĩĩsye ũndetheesye.
13Neena na ndeto yaku nĩkũtuma numa ĩũlũ wa nthĩ,
na ĩndĩ ndiĩthĩwa ndonya kũendeea kwĩw'a ngĩũmangwa.
14Mwĩai we nĩwĩsĩ kana ndyaamanyana kĩ-mwĩĩ na mũndũ,
ndyaavukw'a nĩ mũndũ-ũme.
15Ndyaaĩyĩkĩĩthya nthoni,
kana ngekĩĩthya ĩsyĩtwa ya ĩthe wakwa nthoni,
kuma yĩla twatũie nthĩ ĩno ya ũeninĩ.
Ĩthe wakwa nde mwana ũngĩ ũtw'ĩka mũtiĩwa wake,
na vai mũndũ tũileny'e ũndũ ũtonya kũndwaa.
Yu nĩnĩminĩte kũkw'ĩĩwa nĩ aũme mũonza ala mandwaĩte,
ve vata mwaũ wa kũendeea kwĩthĩwa nĩ thayũ?
Ethĩwa ti kwenda kwaku kwosa thayũ wakwa,
vatonyeka mbĩw'ĩe tei.
Ndũkaeke nĩendee kwĩw'a ngĩumwa ũu.”
Ngai Ayĩw'a Mboya ya Toviti na ya Sala.
16Toviti na Sala maendee kũvoya, Ngai e ĩtunĩ nĩweewie mboya syoo, 17#Mot 36.6-9; Tov 6.10-12 na atũma Lavaeli mũlaĩka wake amatetheesye. Lavaeli nĩwatũmiwe akaumye makwaũ meũ ala maĩ methonĩ ma Toviti nĩ kana one nthĩ ĩngĩ. O ta ũu nĩwatũmiwe akavange mũtwaano wa Sala na Toviasi mwana wa Toviti. Sala aĩ mwĩĩtu wa mwana-a-inyia wa Toviti, na kwoou aĩ na ũthasyo wa kũtwaana na Toviasi. O ta ũu Ngai nĩweeaĩĩte mũlaĩka Lavaeli akaumye ĩimũ Asimotiũsi kuma vala ve Sala. Ĩvindanĩ yĩla Toviti wasyokete nyũmba kwake kuma mbĩlĩlo, Sala nake aĩ nyũmba kwake Ekivatana, atheete kuma nyũmbanĩ yake ya ĩũlũ.
Currently Selected:
Tov 3: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011