Tov 11
11
Toviasi na Sala Maivika Mũsyĩ.
1Yĩla mavikie vakuvĩ na ndũa ya Kaselini, ngalĩko ĩla ĩngĩ ya Nineva, 2Lavaeli nĩwaisye atĩĩ, “Toviasi, nowĩsĩ ũndũ watiie ĩthe waku ailyĩ yĩla twamũtiie. 3Twaĩlĩte kũtongosya tũkavika mbee wa kĩveti kyaku, nĩ kana tũkaseũvye nyũmba andũ ala angĩ matanamba kũvika. 4Ndũkalee kũkua ĩla nyongo ya ĩkũyũ.” Kwoou nĩmaendanisye matongosya, na ngitĩ ya Toviasi yaendany'a namo. 5Ĩvindanĩ yĩu Ana nĩwekalĩte nthĩ asyaĩĩsye nzĩa vala mwana wake ũtonya kumĩlĩĩla. 6Nĩwamwonie kwa mĩtũkĩ okĩte na aneena na wasya mũnene eea Toviti atĩĩ,
“Mwana waitũ nũya okĩte e na mũnyanyae.” 7Matanamba kũvika vala ve Toviti, Lavaeli nĩweeie Toviasi atĩĩ, “Ĩthe waku nũkwona nthĩ ĩngĩ. 8Ĩkĩa ĩla nyongo ya ĩkũyũ methonĩ make, na ndawa ĩsu nĩkũtuma ala makwaũ meũ mombũka na kuma, na kwoou ĩthe waku nũkwĩthĩwa atonya kwona ĩngĩ.”
9Ana nĩwasembie kũla kwĩ mwana wake, amũkumbatĩlya kĩthũinĩ na amwĩa atĩĩ, “Mwana wakwa, yu nũndũ nĩnakwona ĩngĩ wĩ thayũ, nĩnĩkw'e na mũuo!” Ana nĩwaĩie nĩ ũtanu.
Kũvoa kwa Toviti
10Toviti nĩwookĩlile, na aumaalĩla mũvĩanĩ wa kĩwanza avavatĩte. 11Toviasi nĩwaendie kũla kwĩ ĩthe wake akwete ĩla nyongo ya ĩkũyũ. Nĩwamĩvuvie yalika methonĩ ma ĩthe wake, na atuma ethĩwa e mũlũmu. Nĩwamwĩie atĩĩ, “Nau, osa vinya.” 12#Meko 9.18 Nĩvo ĩndĩ wamwĩkĩie ĩla ndawa metho, 13na akũa ikonde ila syaĩ ndeenĩ sya metho make. 14Toviti nĩwakumbatĩlye Toviasi na aĩa nĩ ũtanu ayasya atĩĩ, “Mwana wakwa, nĩngwene, nue kyeni kya metho makwa!” Nĩvo ĩndĩ waisye,
“Nĩataĩwe Mwĩai Ngai!
Ĩsyĩtwa yake nĩyĩtaĩwe tene na tene!
Alaĩka make onthe atheu nĩmataĩwe.
15Nĩwe wandeteie thĩna ũũ,
ĩndĩ yu nĩwambĩw'ĩa tei,
yu nĩnĩmwene mwana wakwa Toviasi.”
Nĩvo ĩndĩ Toviasi walikile nyũmba e na ũtanu, aimũtaĩa Ngai na wasya mũnene. Nĩwatavisye ĩthe ũndũ woonie nesa kũla waĩ, na kana ndaetete mbesa syĩ syoka, ĩndĩ nĩwaĩ anatwaa Sala mwĩĩtu wa Lakueli, ũla waĩ nzĩanĩ okĩte akilĩlye kũvika Nineva.
Kũvika kwa Sala
16Toviti nĩweewie mũyo mũno na ataĩa Ngai aũmaalĩte athi mũvĩanĩ wa ndũa kũthaũa mũka-a-mwana. Yĩla andũ ma Nĩneva mamwonie nĩmaseng'ie mũno, nũndũ Toviti aendete vate mũndũ wa kũmũtetheesya kũthi. 17Toviti nĩwataĩie Ngai na atavya andũ onthe ũndũ Ngai wamwĩw'ĩie tei, na atuma ona nthĩ ĩngĩ.
Yĩla Toviti wakomanie na Sala mũka wa mwana wake, nĩwamũkethisye na amwĩa atĩĩ, “Mwĩĩtu wakwa, wĩmũthokye! Nĩataĩwe Ngai nũndũ wa ũkũete we mwĩĩtu wakwa kũla tũĩ. Ngai nĩ aathime ĩthe waku, na aikũathima wĩ na Toviasi mwana wakwa. Wĩmũthokye mũsyĩnĩ waku mweũ. Ĩthĩawa kĩla ĩvinda wĩ mũathime, na ũyĩthĩawa na ũtanu na ũima wa mwĩĩ. Mwĩĩtu wakwa, lika nyũmba!”
Mũthenya ũsu waĩ wa ũtanu mũnene kwa Ayuti onthe ma Nineva. 18Syana sya eĩtu-a-inyia ma Toviti ila nĩ Aikalĩ na Natavu nĩsyookie kũtana vamwe na Toviti.
Currently Selected:
Tov 11: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011