Tov 10
10
Toviti na Ana Maisaanĩw'a
1Kĩla mũthenya Toviti nĩwatalaa mĩthenya ĩla mũndũ ũtonya kũthi Langesi na kũsyoka. Yĩla mĩthenya ĩsu yavĩtũkie, na weethĩa mwana wake Toviasi ndaĩ anasyoka, Toviti nĩwasũanĩie eekũlya atĩĩ, 2“Nĩ kyaũ kĩtumĩte aselewa kũu? Nĩkũtonyeka Kavaeli akethĩwa akwie, na kwoou vai mũndũ ũtonya kũnenga mwana wakwa mbesa isu!” 3Toviti nĩwasaanĩiw'e mũno.
4Nĩvo ĩndĩ Ana waisye atĩĩ, “Mwana wakwa nĩ mũkw'ũ, nĩnĩsĩ nde thayũ.” Ana nĩwambĩĩie kũĩa na kwĩthĩwa na kyeva nũndũ wa Toviasi. 5Aĩaa ayasya atĩĩ, “Mwa mwana wakwa, naekie wauma mũsyĩ nĩkĩ, na nue ũtumaa nĩthĩwa nĩ na ũtanu?”
6Toviti nĩwatatie kũmũkiakisya aimwĩa atĩĩ, “Mwendwa wakwa, vindya, eka kũsaanĩw'a; Toviasi nde na thĩna. No nginya vethĩwe ve kĩla kĩtumĩte maselewa kũu. Ũu wĩ o vo, mũnyanyae nĩ mũndũ wa kwĩkwatw'a na nĩ mũndũ wa mũsyĩ. Mwendwa, eka kwĩthĩwa na thĩna nũndũ wake. Nĩnĩsĩ e nzĩanĩ enũkĩte.”
7Ĩndĩ Ana nĩwasũngĩie asya atĩĩ, “Ekana nakwa; eka kũngenga, mwana wakwa nĩ mũkw'ũ!” Kĩla mũthenya Ana nĩwaumaalaa na mĩtũkĩ akasyaĩĩsye nzĩanĩ ĩla Toviasi waendie nayo. Ndaĩ atonya kũĩkĩĩa mũndũ ũngĩ. Syũa yathũa nĩwenũkaa, na kũendeea kũĩa na kwĩthĩwa na kyeva ũtukũ w'onthe ate kũkoma.
Kyalo kya kuma Ekivatana
Syumwa ilĩ ila Lakueli weevĩtĩte kwĩkĩĩa mwĩĩtu wake mboka ya mũtwaano nĩsyathelile. Kwoou Toviasi nĩwaendie kũla kwĩ Lakueli na amwĩa atĩĩ, “Vatonyeka, eka nĩnũke yu. Nĩnĩsĩ kana asyai makwa mai na wĩkwatyo wa kũmbona ĩngĩ. Mwa Lakueli, eka nĩnũke kwa ĩthe wakwa. Nĩnĩminĩte ũkũtavya thĩna ũla ĩthe wakwa waĩ naw'o yĩla naumie kũu.” 8Ĩndĩ Lakueli nĩweeie Toviasi atĩĩ, “Ĩkalanga vanini; twĩkalangany'e mwana wakwa. Nĩngũtũma andũ makamũtavye kana wĩo mũseo.” 9Ĩndĩ Toviasi nĩwaneenie na kĩthikii ayasya atĩĩ, “Aiee, mwa eka nĩnũke mũsyĩ kwa ĩthe wakwa.”
10Nĩvo ĩndĩ Lakueli wanenganie Sala kũla kwĩ Toviasi ethĩwe mũka wake vate kweteela. O ta ũu nĩwanengie Toviasi nyusu ya ũthwii wake w'onthe: Ngombo sya aũme na sya aka, ng'ombe, malondu, mang'oi, ngamĩle, ngũa, mbesa na syĩndũ sya mbwaũ. 11Kwoou nĩwamalekilye mathi na ũtanu na akethya Toviasi ngethi ya wendo. Nĩwataanĩisye nake kwa kũneena nake ndeto ithi sya ũathimo: “Mwana wakwa enda nesa, ĩthĩwa na kyalo kĩseo. Mwĩai Ngai wa ĩtunĩ nĩakũsũvĩe wĩ na mũka waku Sala. Nĩna wĩkwatyo wa kwĩsa kwona syana syenyu ndanamba kũkw'a.” 12Lakueli nĩweeie Sala atĩĩ, “Enda wĩ na mũũme waku mũkekale mũsyĩ kwa asyai make. Kuma ũmũnthĩ makeethĩawa me asyai maku, o ũndũ ũmwe nakwa nĩ na inyia waku. Nĩenda ngew'aa maũndũ maseo ĩũlũ wenyu ĩvindanĩ yonthe ya thayũ wakwa.” Lakueli nĩwaneenie ndeto sya kũtaanĩsya namo, na amaeka mathi.
Nĩvo ĩndĩ Etina weeie Toviasi atĩĩ, “Mwana wakwa mwendwa, na mwana-a-ia Toviasi, Mwĩai Ngai wa ĩtunĩ nĩekũtũnga ĩngĩ wĩ mũima. Nĩna wĩkwatyo wa kwona syana syaku wĩ na mwĩĩtu wakwa Sala ndanamba kũkw'a. Nĩngũnengane mwĩĩtu wakwa kũla ũĩ nĩ mbee wa Ngai. Ĩvindanĩ yonthe ya thayũ waku ndũkaamũthatye. Mwana wakwa enda na mũuo. Kuma ũmũnthĩ nĩ inyia waku, na Sala nĩ mwĩĩtu-a-ia waku mwendwa. Ithyonthe twĩkale na mũuo ĩvindanĩ yonthe ya thayũ witũ!” Kwoou Etina nĩwamakethisye me elĩ na ngethi ya wendo na amaeka mathi na ũtanu.
13Toviasi nĩwaumie mũsyĩ kwa Lakueli e na ũtanu mwingĩ. Nĩwataĩaa Mwĩai Ngai wa ĩtu na nthĩ, Mũsumbĩ wa nthĩ yonthe nũndũ wa kwona nesa kyalonĩ kyake. Toviasi nĩwaathimie Lakueli na Etina mũka wake ayasya atĩĩ, “Ũtanu wakwa wĩthĩwe wa kũmũnengae ndaĩa ĩvindanĩ yonthe ya thayũ wakwa!”
Currently Selected:
Tov 10: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011