Tov 12
12
Mũlaĩka Lavaeli Aiweta nĩwe ũũ
1Mboka ya mũtwaano yamina kũthela, Toviti nĩweetie mwana wake Toviasi na amwĩa atĩĩ, “Mwana wakwa, ndũkalee kũĩva mũnyanyau ũla mwaendanisye ĩmwe, na ũimwongela mbesa.” 2Toviasi nĩwamũkũlilye atĩĩ, “Nau, wĩona naĩlĩte kũmũĩva mbesa syĩana ata? O na ngamũĩva nyusu ya syĩndũ ila tũnookie tũkuĩte ndyĩthĩwa na thĩna. 3Nũndetie mũsyĩ nĩ ũsũvĩonĩ na nde na thĩna. Nũnavoisye kĩveti kyakwa, nũnandeteie mbesa kuma kwa Kavaeli, nayu nĩwakũvosya. Wĩona naĩlĩte kũmũnenga kyaũ nũndũ wa maũndũ asu onthe?” 4Toviti nĩwamũsũngĩie amwĩa atĩĩ, “Waĩlĩte kũmũnenga nyusu ya syĩndũ syonthe ila mũnaetie wĩ nake.”
5Nĩvo ĩndĩ Toviasi weetie Lavaeli na amwĩa atĩĩ, “Osa nyusu ya syĩndũ syonthe ila wandetheeisye kũkwata, syĩthĩwe ĩtuvi yaku na ũithi na mũuo!”
6Nĩvo ĩndĩ Lavaeli weetie Toviti na Toviasi vandũ ũtee na amea atĩĩ, “Taĩai Ngai, tavany'ai ũtaĩo wake kwa andũ onthe, nũndũ wa maũndũ manene ala ũmwĩkĩte. Mũkumyei, na kũtaĩa ĩsyĩtwa yake. Vatonyeka tavyai andũ onthe maũndũ ala Ngai wĩkĩte, na mũikaaeke kũmũtũngĩa mũvea. 7Nũseo kũlea kũweta kĩmbithĩ kya mũsumbĩ, ĩndĩ maũndũ ala Ngai wĩkaa maĩlĩte kũtavanw'a kĩla vandũ, nĩ kana ataĩwe na kũnengwa ndaĩa.
“Mweeka nesa, vai ũndũ mũthũku ũkamũkwata.
8 #
Sil 29.8-13
“Kũvoya na kũtĩĩa kũya, vamwe na kũnenga ngya ũtethyo na kwĩka maũndũ ala maĩlĩte, nĩ kũseo mbee wa kwĩthĩwa na ũthwii na kũlea kũĩkĩĩwa. Kũtetheesya ngya nĩ kũseo mbee wa kwĩthĩwa na thaavu mwingĩ. 9#Nth 11.4; Nda 4.27; Sil 3.30 Kwĩthĩwa wĩ mũlau kũkatuma ũtangĩĩwa kuma kĩkw'ũnĩ, na ũiekewa naĩ syaku syonthe. Ala matetheeasya ngya makekala thayũ mũasa. 10Ĩndĩ ala mekaa naĩ na maũndũ mavuku, matumaa makwatwa nĩ maũndũ mathũku.
11“Nĩngũmũtavya yu ũw'o ũla wĩvo w'onthe ndeũmũvitha kĩndũ. Nĩnĩnaminie kũmũtavya kana ti ũseo kũweta kĩmbithĩ kya mũsumbĩ, ĩndĩ nĩ ũseo kũweta maũndũ ala Ngai wĩkĩte. 12#Yovu 33.23-24; Meko 10.4; Ũvu 8.3-4 Yĩla we Toviti wĩ na Sala mũka wa mwana waku mwavoyaa, ninyie natwaie mboya syenyu kũla kwĩ Ngai ũla mũtheu. O ta ũu yĩla wathikaa andũ, nĩnamũtavasya maũndũ ala wĩkĩte. 13Mũthenya ũla wookĩlile mesanĩ ũtanamba kũya ũkathike mũndũ ũsu mũkw'ũ, Ngai nĩwandũmie nũke ũkũtata. 14Ĩndĩ yu Ngai nũndũmie nũke ũkũvosya, na kũtangĩĩa Sala mũka-a-mwana waku. 15#Nzek 4.10; Lk 1.19; Ũvu 8.2 Ninyie nĩtawa Lavaeli, ũmwe wa alaĩka mũonza ala mekalanasya na Ngai ũtheunĩ wake mũtisu meyũmbanĩtye kũmũthũkũma.” 16Toviti na Toviasi nĩmakwatiwe nĩ w'ĩa mwingĩ, na mavalũka nthĩ matetemete nĩ w'ĩa. 17Ĩndĩ Lavaeli nĩwameie atĩĩ, “Ekai kũkĩa, maũndũ onthe nĩ maseo, lilikanaai kũtaĩa Ngai kĩla ĩvinda. 18Ngai anendaa nũke kũmũtetheesya; ti inyie neetw'ĩĩie kũka, kwoou mwinĩaei Ngai mbathi ĩvindanĩ yĩla mwĩ thayũ. 19Inyw'ĩ mwasũanĩaa kana nĩmwambonie ngĩya; noonekaa ta ngũya, ĩndĩ ndyaĩsaa. 20No nginya mũtaĩe Mwĩai Ngai, na kũmũtũngĩa mũvea yĩla mwĩ ĩũlũ wa nthĩ. Nĩngũsyoka yu kũla kwĩ ũla wandũmie. Andĩka maũndũ onthe ala mekĩkĩte kũla ũĩ.” 21Nĩvo ĩndĩ Lavaeli waendie. Toviti na Toviasi nĩmaũngamie na mayaamwona ĩngĩ. 22Nĩmambĩĩie kwina mbathi sya kũtaĩa, na kũtũnga mũvea nũndũ wa maũndũ onthe manene ala Ngai weekie yĩla mũlaĩka Lavaeli waĩ vamwe namo.
Currently Selected:
Tov 12: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011