Sil 51
51
Wathi wa Kũtũnga Mũvea
1Nĩngũũtũngĩa mũvea we Mwĩai na Mũsumbĩ,
na nĩngũũtaĩa we Ngai Mũtangĩĩi wakwa.
Nĩngũũtũngĩa mũvea,
2nĩkwĩthĩwa wĩthĩĩtwe wĩ mũsũvĩi na mũtetheesya wakwa.
Nũtangĩĩte mwĩĩ wakwa kuma kĩkw'ũnĩ,
kuma kĩteinĩ kya andũ me ũvũngũ,
kuma andũnĩ maneena ndeto ite syaw'o.
Nĩwĩthĩĩtwe wĩ mũtetheesya wakwa,
nĩ mbee wa amaitha makwa,
3na ũkandangĩĩa,
nũndũ wa ũnene wa tei waku na ĩsyĩtwa yaku,
nĩwandangĩĩie kuma ũtonyinĩ wa amaitha ala mendaa kũmina,
kuma kwa ala mamanthaa kũmbũaa,
na kuma mathĩnanĩ maingĩ ala noomĩĩisye.
4Nĩwandangĩĩie kuma mwakinĩ watumaa nĩthita,
wanthyũlũlũkĩte ngalĩko syonthe,
mwaki ũla nyie ndaaũkwatya.
5Nĩwandangĩĩie kuma kũndũ kũliku kũla maveva ma ala akw'ũ mekalaa,
kuma kwa ala maneenaa ndeto nthũku na me ũvũngũ,
6na kuma ndetonĩ sya nzukũ ila mũsumbĩ wataviw'e.
Nĩnathengee kĩkw'ũ mũno,
na thayũ wakwa nĩwathengee kũla maveva ma ala akw'ũ mekalaa.
7Nĩneelingĩlĩtwe kĩla ngalĩko,
na vayaĩ mũndũ o na ũmwe wa kũndetheesya.
Nĩnamanthaa ũtethyo kuma andũnĩ,
ĩndĩ vai ũmwe waandetheesya.
8Nĩvo ĩndĩ nalilikanile tei waku we Mwĩai,
na mawĩa maku ma kuma tene,
nĩkwĩthĩwa nũtangĩĩaa ala makweteelaa,
na kũmavonokya kuma ũtonyinĩ wa amaitha moo.
9Nĩvo ĩndĩ nĩ vaa ĩũlũ wa nthĩ nakũvoyie,
nakwĩsũva ũndangĩĩe kuma kĩkw'ũnĩ.
10Nĩnamwĩkaĩlile Mwĩai nasya atĩĩ,
“We Mwĩai nue ĩthe wakwa!
Ndũkaandie ĩvindanĩ ya thĩna,
yĩla ndakethĩwa na vinya wa kũkita na amaitha ang'endu.
11Ngataĩaa ĩsyĩtwa yaku kĩla ĩvinda,
na ngakũtaĩaa na mbathi sya ũkũtũngĩa mũvea.”
Nĩwasũngĩie mboya yakwa,
12nĩkwĩthĩwa nĩwandangĩĩie kuma wanangĩkonĩ,
na wambonokya kuma ĩvindanĩ ya thĩna.
Kwondũ wa ũu nĩngũũtũngĩa mũvea na ũkũtaĩa,
nĩngũkumya ĩsyĩtwa yaku we Mwĩai.
Kũmantha Ũĩ
13Yĩla naĩ mũnini, ndanamba kwambĩĩa syalo syakwa,
nĩnavoyie na kĩthito nĩkwate Ũĩ.
14Nĩũngyĩ Ĩkalũnĩ nza nĩnamanthie Ũĩ,
na nĩngũendeea na kũmũmantha ĩvindanĩ yonthe ya thayũ wakwa.
15Kuma nĩ wa mũika, nginya nĩ mũkũũ vyũ,
ngoo yakwa nĩyatanĩaa Ũĩ mũno.
Nyaĩĩ syakwa nĩsyaatĩĩie nzĩa ndũngalu,
kuma yĩla naĩ wa mũika nĩnaatĩĩie Ũĩ.
16Nĩnateie kũtũ vanini, na nakwata Ũĩ,
na neekwatĩa momanyĩsyo maingĩ.
17Nĩnaendeeie nesa maũndũnĩ ma ũĩ,
na nĩngũtaĩa ũla ũnenganae ũĩ.
18Nĩkwĩthĩwa natwie kwĩkala kwĩanana na ũĩ,
na nĩnendaa mũno kwĩka ũseo,
na ndikekĩĩthw'a nthoni o na ĩndĩĩ.
19Nĩneethĩnisye mũno ngwate ũĩ,
na neethĩwa nĩsũvĩĩte mũno mwĩkalonĩ wakwa.
Nĩnookĩlilye moko makwa melekele ĩtunĩ nĩvoye,
na naĩa mũno nũndũ ndyeesĩ ũĩ nĩ kyaũ.
20Nĩneetw'ĩĩie mũno thayũnĩ wakwa nĩkwate ũĩ,
nakwa nĩnaũkwatie kwa nzĩa ya kwĩthesya.
Kuma vala ve ũĩ nĩnakwatie ũmanyi kuma mwambĩlĩĩlyonĩ,
na kwoou nĩnĩsĩ kana ndikatiwa ndeũtethw'a nĩ ũĩ.
21Ngoo yakwa nĩyendie mũno kũmantha Ũĩ,
na kwoou yu nĩngwatĩte ũthwii mwingĩ.
22Mwĩai nĩwanengie mũthĩnzĩo wa kũneena,
nakwa ngamũtaĩaa naw'o.
23Ũkai kwakwa inyw'ĩ ala mũte amanyĩsye;
likai na mũyĩkala nyũmbanĩ yakwa ya ũmanyĩsyo.
24Nĩkĩ mũũnyungunyĩsya na kwasya mũi na maũndũ aa,
na nĩkĩ mathayũ menyu me na waũni wingĩvĩte ũu?
25Nĩnaathamisye nasya atĩĩ,
“Ĩyoseei ũĩ mũte kũĩva kĩndũ.”
26Ĩkĩai ngingo syenyu ĩsokinĩ ya ũĩ,
na mũieka mathayũ menyu makwate ũmanyĩsyo;
Ũĩ wonekaa vakuvĩ vyũ.
27Ĩyoneei ene kana nyie ndethetye wĩa mũnini,
ĩndĩ ngekwatĩa mũuo mwingĩ.
28Ĩyoseei ũmanyĩsyo kwa kũĩva mbesa mbingĩ,
naw'o ũmanyĩsyo ũsu ũkatuma mwĩkwatĩa thaavu mwingĩ.
29Ngoo syenyu itanĩe tei wa Mwĩai,
na mũikaaĩw'e nthoni yĩla mũkũmũtaĩa.
30Tethyai wĩa wenyu ĩvindanĩ yĩla yĩvangĩtwe,
na Ngai akamũnenga ĩtuvi yenyu ĩvindanĩ yake!
Currently Selected:
Sil 51: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011