Sil 50
50
Simioni Mwana wa Oniasi
1Simioni Mũthembi Mũnene, mwana wa Oniasi,
nĩwe waĩ mũtongoi wa ana-a-ĩthe make na nĩwanengetwe ndaĩa nĩ andũ make.
Ĩvindanĩ ya thayũ wake,
nĩwatũngĩĩie Ĩkalũ kũla kwaĩ kũomboku na ayiĩĩa.
2Nĩwaakie wambĩlĩĩyo wa ngũta ilĩ ila syathyũlũlũkĩte Ĩkalũ.
3Ĩvindanĩ yake kĩthima kya kĩw'ũ nĩkyenziwe,
kĩthima kĩu kya kwia kĩw'ũ kyeanaa yĩla ĩtangi ya mbulonzi.
4Nĩwasũanĩie ũndũ ũtonya kũtangĩĩa andũ make maikaminwe,
na aiĩĩa ndũa weethĩa o na amaitha makamĩvithũkĩa maitonya kũmyananga.
5Simioni oonekaa e mũndũ wa ndaĩa athyũlũlũkĩtwe nĩ andũ,
yĩla wumaalĩte kuma vala Vandũ Vatheu Mũno.
6Ailyĩ ta ndata ya kĩoko ĩkumĩlĩĩla matunĩ,
kana ta mwei yĩla mũima.
7Ailyĩ ta syũa yĩmulĩkĩte Ĩkalũ ya Ũla wĩ Ĩũlũ Mũno,
kana ta ũtaathi ũkũtisatisa matunĩ matheu.
8Ailyĩ ta malaa ma losi ĩvindanĩ ya mbua ya uũa,
kana ta malaa ma lili mameete vakuvĩ na kĩthima kya kĩw'ũ,
kana ta nthongoo syĩ Levanoni ĩvindanĩ ya syũa.
9Ailyĩ ta ũvani wakanĩte wĩ kĩndũnĩ kya kũtoeesya;
ailyĩ ta kĩndũ kĩseũvĩtw'e na thaavu mũtumbatumbe,
na kĩkanakavw'a na mĩthemba yonthe ya mavia ma thooa mũnene.
10Ailyĩ ta mũthata ũsyaĩte matunda ũkausũa,
kana ta mũtalakwe mũasa ũvikĩte matunĩ.
11Yĩla Simioni weekĩa ngũa yake ndaasa ya ndaĩa,
na kwĩkĩa ngũa sya ndaĩa mbanake,
na aithi kĩthembeonĩ kĩtheu,
nĩwatumaa kĩwanza kya Ĩkalũ kĩthĩwa na ũkumyo.
12Yĩla ũkũnengwa mĩthĩnzĩo nĩ athembi,
aũngamĩte vakuvĩ na kĩthembeo,
athyũlũlũkĩtwe nĩ ana-a-ĩthe make athembi,
eethĩawa ailyĩ ta mũkũũ mũnini wa Levanoni,
mamũthyũlũlũkĩte ta matina ma mĩkĩndũ.
13Athembi asu maĩ nzyawa sya Alũni,
na meekĩĩte ngũa syoo sya ndaĩa,
na makaũngama mbee wa wũmbano wa andũ onthe ma Ĩsilaeli,
makwete nthembo sya kũthembea Mwĩai.
14Simioni amina ũthũkũmi wake kĩthembeonĩ,
na kwia nthembo sya Ũla wĩ Ĩũlũ Mũno, Mwene Ũtonyi W'onthe,
15nĩwatambũũkisye kw'oko oosa kĩkombe,
na atulũla ndivai ĩtinanĩ ya kĩthembeo yĩthĩwe nthembo ya kũnyuwa,
yĩ mũuke mũseo kwa Ũla wĩ Ĩũlũ Mũno, Mũsumbĩ wa onthe.
16Nĩvo ĩndĩ athembi, nzyawa sya Alũni malonzanilye,
na mavuva masoo moo maseũvĩtw'e na silĩva mũtumbatumbe,
nĩmalonzanilye na wasya mũnene weew'ĩka kĩla vandũ,
nĩ kana Ũla wĩ Ĩũlũ awĩw'e.
17Nĩvo ĩndĩ andũ onthe vamwe kwa mĩtũkĩ,
makomie nthĩ na ĩvu,
mamũthaithe Mwĩai woo, Mwene Ũtonyi W'onthe, Ngai Ũla wĩ Ĩũlũ Mũno.
18Aini namo nĩmainie mbathi sya kũmũtaĩa,
nĩmainie na mawasya maseo ma kwendeesya.
19Andũ namo nĩmaendeeie kũmwĩsũva Mwĩai Ũla wĩ Ĩũlũ Mũno,
maivoya ũla wĩ tei,
nginya mũvango wa ũthaithi wathela.
Ũu nĩw'o maminie kũmũthaitha.
20 #
Mot 6.24-27
Ĩtina wa ũu Simioni Mũthembi Mũnene,
nĩwatheeie vala ve andũ na kũkĩlya moko make,
melekele wũmbano w'onthe wa andũ ma Ĩsilaeli,
aneene na kũmanenga ũathimo wa Mwĩai,
nũndũ nowe e weka weetĩkĩlĩtw'e kũweta ĩsyĩtwa ya Mwĩai.
21Andũ nĩmakumamaa ĩngĩ,
nĩ kana mose ũathimo wa Ũla wĩ Ĩũlũ Mũno.
Ndeto sya Mũthya
22Nayu ĩndĩ mũtaĩei Ngai ũla woombie syĩndũ syonthe,
ũla wĩkaa maũndũ manene kĩla vandũ,
ũla ũtwĩkalĩtye thayũ kuma yĩla twasyaiwe,
na ũtwĩkĩte maũndũ manene kwĩanana na tei wake.
23Twĩvoya Ngai atũnenge ngoo syĩ na ũtanu,
na kũetee nthĩ ya Ĩsilaeli mũuo ĩvindanĩ yĩla twĩ thayũ,
o tondũ kwailyĩ ĩvinda ya tene.
24Twĩvoya Ngai atwĩw'ĩe tei,
na kũtũvonokya ĩvinda yĩla twĩ thayũ.
25Ve mbaĩ ilĩ nĩmenete,
na ya katatũ o na ndyaĩlĩte kwĩtwa mbaĩ:
26Aetomu ala mekalaa Kĩĩmanĩ kya Seili na Avilisiti,
na Asamalia atumanu ala mekalaa Sekemu.
Ndeto sya Kũminĩa
27Nyie Yosua mwana wa Silaki mwana wa Eleasali wa ndũa ya Yelũsalemu,
nĩnaandĩka ĩvukunĩ yĩĩ momanyĩsyo ma ũĩ na ũmanyi,
ũla nonoetye kuma ngoonĩ yake.
28Nĩ mũathime mũndũ ũla wĩkĩaa kĩthito kwĩmanyĩsya maũndũ aa,
na kwĩthĩwa mũĩ nũndũ wa kũmekĩa ngoonĩ.
29Ethĩwa akamekaa,
akeethĩwa na vinya mwingĩ wĩthĩe vai ũndũ ũmũema,
nũndũ akaendelaa nzĩanĩ ya kyeni kya Mwĩai.
Currently Selected:
Sil 50: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011