Ĩsa Ũelesyo wa Ĩvuku Yĩĩ
Ũelesyo wa Ĩvuku Yĩĩ
Ĩvuku yĩĩ yĩnengetwe ĩsyĩtwa ya mwathani ũmwe wĩ nguma wa Ĩsilaeli. Ĩsaia atethasya wĩa wake wa kwathana kwambĩĩa mwaka wa maana mũonza na mĩongo ĩtano kũvika mwaka wa maana mũonza mbee wa kũsyawa kwa Klĩsto. Ĩvuku yĩĩ yĩna mbathi nzeo mũno, na o ta ũu yĩna ndeto sya kwĩkĩa andũ vinya na sya kwendeesya. Aandĩki ma Ũtianĩo Mweũ nĩmaandĩkĩte mũno ndeto imwe sya ĩvuku yĩĩ maandĩkonĩ moo. Meenda kwonany'a ũndũ Ngai weanĩisye ũtianĩo wake wa kũtangĩĩa andũ make yĩla watũmie mwana wake Yesũ Klĩsto, ũla waetie mũuo wa tene na tene (Ĩsa 9.6-7; 11.1-9). Ĩvuku yĩĩ nĩyĩtonya kũaanw'a ilungu itatũ nene:
Kĩlungu kya mbee: Ĩsa 1—39. Kĩlungu kĩĩ kĩwetete maũndũ ala maendee yĩla ũsumbĩ wa Yuta na andũ ala mekalaa Yelũsalemu waĩ na mathĩna maingĩ kuma kwa Asuli. Andũ aingĩ vamwe na atongoi moo nĩmatiĩte Ngai ũla wa w'o, na makambĩĩa kũthaitha mĩvw'anano. Mwathani Ĩsaia nĩweesĩ kana andũ nĩmaekete kũmwĩkwatya Mwĩai Ngai. Nĩmoolĩtwe kana nĩwe wamatangĩĩie kuma ũkombonĩ wa Misili. Mwathani Ĩsaia nĩwatavisye andũ ma Ĩsilaeli kana maendee kwĩmanthĩa wanangĩko.
Kĩlungu kya kelĩ: Ĩsa 40—55. Kĩlungu kĩĩ kĩwetete maũndũ ala maendee yĩla andũ aingĩ ma Yuta mataviwe matwawa nthĩ ya ũeninĩ. Mekalile kũu mate na mũtongoi na mate na wĩkwatyo. Mwathani Ĩsaia easya kana Ngai akathasya andũ make ala me na thĩna mũnene mũno. Ngai akatũnga andũ make nthĩ yoo ene na ndũanĩ yoo ene. Ngai wa andũ ma Ĩsilaeli e kĩvathũkany'o na ngai ingĩ; nĩwe woombie ĩtu na nthĩ. Akatuma andũ ma Ĩsilaeli maalyũka nĩ kana andũ angĩ maendee nesa. Maũndũ asu makeanĩw'a kwĩsĩla ũthũkũminĩ wa “Mũthũkũmi wa Mwĩai.” Mĩsoa ĩla ĩwetete ũvoo wa Mũthũkũmi wa Mwĩai nĩ ĩmwe katĩ wa mĩsoa ya mavuku ma Ũtianĩo Mũkũũ ĩla yĩsĩkĩe nesa.
Kĩlungu kya katatũ: Ĩsa 56—66. Kĩlungu kĩĩ kĩwetete mũno ĩũlũ wa ĩvinda yĩla andũ ma Ĩsilaeli masyokie Yelũsalemu, na mendaa kũĩkĩĩthw'a kana Ngai akeanĩsya ũndũ wamathie. O ta ũu nĩkĩwetete ĩũlũ wa ũlũngalu na sila wa katĩ, kwĩanĩsya mwĩao wa Savato, ĩũlũ wa nthembo na mboya.
Maũndũ ala me Ĩvukunĩ yĩĩ
Mokany'o na maũndũ ala Ngai wathanie 1.1—12.6
Kũkanw'a kwa nthĩ ingĩ 13.1—23.18
Ngai aisilĩla nthĩ yonthe 24.1—27.13
Mokany'o angĩ na maũndũ angĩ ala Ngai wathanie 28.1—35.10
Esekia Mũsumbĩ wa Yuta aivithũkĩwa nĩ Asuli 36.1—39.8
Maũndũ ala Ngai wathie andũ na kũmanenga wĩkwatyo 40.1—55.13
Mokany'o angĩ na maũndũ ala Ngai wathie andũ 56.1—66.24
Currently Selected:
Ĩsa Ũelesyo wa Ĩvuku Yĩĩ: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011