Sil 48
48
Eliya
1Nĩvo ĩndĩ mwathani Eliya wookĩlile ailyĩ ta mwaki,
na ndeto syake syakanĩte ta ũmũĩ wa mwaki.
2Nĩwaeteie andũ yũa,
na kwa ũthangaau wake atuma matiala avũthũ.
3Nĩwaneenie ndeto kuma kwa Ngai avinga ĩtu weethĩa kũyuaa,
na mavinda atatũ nĩwaetie mwaki kuma ĩtunĩ.
4We Eliya nĩwataĩawa nũndũ wa syama syaku sya kũseng'ya!
Ve mũndũ wĩ na maũndũ ma kwĩkathĩĩa namo ta ala we waĩ namo?
5Nĩwathayũũkisye mũndũ mũkw'ũ,
wamumya kũla maveva ma ala akw'ũ mekalaa ĩsyĩtwanĩ ya Ũla wĩ Ĩũlũ Mũno.
6Nĩwaumisye asumbĩ ũnenenĩ na wamamina,
na watuma andũ me nguma mawaa na kũkw'a.
7Nĩweewie ndeto sya Mwĩai sya ũkany'o wĩ Kĩĩmanĩ kya Sinaĩ,
na weew'a motw'ĩo ma ũsilĩlo wĩ Kĩĩmanĩ kya Olevu.
8Nĩwetĩkĩisye andũ mauta matw'ĩke asumbĩ nĩ kana maĩvanĩsye,
na athani mathũkũme ĩtina waku.
9Nĩwambatiw'e wĩ kĩlinginĩ kya mwaki,
wĩ ĩkasyanĩ yĩkusĩtw'e nĩ mbalasi sya mwaki.
10Nĩkũandĩkĩtwe kana nĩwĩyũmbanĩtye kũka ĩvindanĩ yĩla yĩtw'ĩtwe,
nĩ kana ũsiĩĩe ũthatu wa Ngai ũtanamba kwingĩva mũno ũkany'e andũ,
wĩw'anĩthye aaĩthe na syana syoo,
na kũtũngĩĩa mbaĩ sya Yakovo.
11Ala mekwona makatana,
o na ala makwie me na wendo,
nĩkwĩthĩwa o naitũ tũkekala thayũ.
Elisa
12 #
2Asu 2.9,13 Yĩla Eliya wavw'ĩkiwe nĩ kĩlingi,
Elisa nĩwausũiwe nĩ veva wake;
thayũnĩ wake w'onthe, vai mũsumbĩ waatuma akwatwa nĩ w'ĩa,
na vai mũndũ waĩ atonya kũmũsiĩĩa ndakeke ũndũ ũkwenda.
13 #
2Asu 13.20-21
Vai ũndũ waĩ vinya kwake ũkethĩa ndaũtonya,
o na e mũkw'ũ mwĩĩ wake nĩwathanie.
14O tondũ e thayũ weekaa maũndũ ma kũseng'ya,
now'o o na e mũkw'ũ weekaa maũndũ ma kũseng'ya,
15 #
2Asu 18.11-12
Ĩndĩ andũ o na moona maũndũ asu onthe mayaalyũla ngoo,
o na mayaatia naĩ syoo,
kũvika yĩla matwaiwe maumw'a nthĩ yoo,
na manyaĩĩkĩw'a kĩla vandũ ĩũlũ wa nthĩ;
no andũ avũthũ matialile,
masumbĩkĩtwe nĩ nzyawa ya Ndeviti.
16Amwe moo nĩmeekie maũndũ ala mamwendeeasya Mwĩai,
ĩndĩ angĩ maendeea kwĩka naĩ.
Esekia
17 #
2Asu 20.20
Esekia nĩwaakie ũkũta kũthyũlũlũka ndũa yake,
na enza mũtaũ wa kũete kĩw'ũ ndũanĩ;
nĩwatũmĩie mĩio ya kyũma kwalya mavia,
na aseũvya ndia sya kĩw'ũ.
18 #
2Asu 18.13-17
Ĩvindanĩ ya kũsumbĩka kwake, Senakelivu nĩwavithũkĩie Yuta,
na atũma mũnene wa asikalĩ;
nĩwookie kũkita Saioni,
na eekathĩĩa mũno nũndũ wa ũng'endu wake.
19Nĩvo ĩndĩ andũ ma Yuta makwatiwe nĩ w'ĩa na moko moo matetema,
nĩmeewie woo mwingĩ ta wa mũndũ mũka ũkwaũnya,
20 #
2Asu 19.15-20,35 ĩndĩ nĩmamũvoyie Mwĩai ũla wĩ tei,
nĩmamũvoyie mamũkĩlĩlye moko moo.
O mĩtũkĩ Ũla Mũtheu nĩwamewie e ĩtunĩ,
na atũma mwathani Ĩsaia amavonokye.
21Mwĩai nĩwakũnie asikalĩ ma Asuli me maeemanĩ moo,
na mũlaĩka wake amoaa.
Ĩsaia
22Esekia nĩweekaa maũndũ ala mamwendeeasya Mwĩai,
nĩwakwatĩte akalũmya mwĩkalo wa Ndeviti ũmae wake,
o tondũ weeaĩiwe nĩ mwathani Ĩsaia,
mwathani mũnene ũla woonaa mawoni ma w'o.
23 #
2Asu 20.10-11
Ĩvindanĩ ya mwathani Ĩsaia, syũa nĩyasyokie na ĩtina;
na aasavya thayũ wa mũsumbĩ.
24Kwa ũtonyi wa Veva wa Ngai, nĩwoonie maũndũ ala makekĩka mũminũkĩlyonĩ,
na akiakisya andũ ma Saioni ala maĩ na kyeva.
25Nĩwavuanisye maũndũ ala makoka kũvika ĩvindanĩ ya mũminũkĩlyo,
na avuany'a maũndũ mavithe mbee wa matanekĩka.
Currently Selected:
Sil 48: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011