Sil 47
47
Nathani
1 #
2Sam 7.2-3; 12.1 Ĩtina wa Samũeli, Nathani nĩwatw'ĩkie mwathani,
athanae ĩvindanĩ ya kũsumbĩka kwa Ndeviti.
Ndeviti
2 #
1Sam 17.34—18.7; 2Sam 5.7; 8.1; 12.13 Ndeviti anyuviwe katĩ wa andũ onthe ma Ĩsilaeli,
o tondũ mathunya mavathawa kuma nthembonĩ sya mũuo.
3Ndeviti athaũkaa na mĩnyambũ ta ũkũthaũka na tũtena twa mbũi,
na kũthaũka na nyamũ mbai syĩtawa nduva ta ũkũthaũka na tũtena twa ĩlondu.
4E wa mũika, nĩwooaie mũndũ mũnene mũasa,
na avetea andũ ma Ĩsilaeli nthoni,
yĩla wekisye ĩvia na kĩkũtha,
yakima Ngoliathi avalũka na ngathĩĩo syake.
5Ndeviti eekie ũu nĩkwĩthĩwa nĩwamũvoyie Mwĩai, Ũla wĩ Ĩũlũ Mũno,
nake eekĩa kw'oko kwake kwa aũme vinya,
nĩ kana oae ngũmbaũ nene,
na kũtuma vinya wa andũ make ũtaĩwa.
6Kwoou nĩmamũkumisye nĩkwĩthĩwa nĩwũaĩte andũ ngili makũmi,
na mamũkathĩĩa nĩkwĩthĩwa nĩwaathimiwe nĩ Mwĩai,
yĩla weekĩiwe ngovia ya ũsumbĩ.
7Nĩkwĩthĩwa nĩwooaie amaitha make kĩla ngalĩko,
nĩwaminie Avilisiti amaitha make,
na aananga vinya woo kũvika o na ũmũnthĩ.
8Maũndũnĩ onthe ala Ndeviti weekaa,
nĩwatũngĩaa mũvea na kũmũkumya Ũla Mũtheu, Ũla wĩ Ĩũlũ Mũno.
Nĩwainaa na ngoo yake yonthe,
nĩkwĩthĩwa nĩwamwendete Mũmbi wake.
9Nĩwaiie aini mbee wa kĩthembeo,
nĩ kana mainae mbathi sya kwendeesya.
10Nĩwatumie mĩthenya ya mboka yĩthĩwa yĩ nzeo mbee,
na avangĩĩa yĩla mboka isu syĩĩthĩawa mwakanĩ w'onthe;
nĩwatumie ĩsyĩtwa ya Mwĩai yĩkala yĩitaĩwa,
mbathi syeew'ĩkaa vandũnĩ va kũthaithĩa kuma kwakya.
11Mwĩai nĩwaekeie Ndeviti naĩ syake,
na anenevya vinya wake tene na tene;
nĩwaseũvisye ũtianĩo nake kana we vamwe na nzyawa syake,
makasumbĩkaa Ĩsilaeli me na ndaĩa nene.
Solomoni
12Ĩtina wa Ndeviti, mwana wake mũĩ nĩwe wasumbĩkie,
nĩwekalile nesa nĩkwĩthĩwa ĩthe nĩwamũmbanĩtye.
13 #
1Asu 4.21-32
Solomoni asumbĩkie ĩvinda ya mũuo,
Ngai nĩwamũnengie mũuo ngalĩko syonthe,
nĩ kana Solomoni amwakĩe Ĩkalũ,
aseũvye vandũ va kũthaithĩa vala vakekalaa tene na tene.
14We Solomoni, yĩla waĩ wa mũika waĩ mũĩ mũno,
kĩlĩko kyaku kyausũĩte ũmanyi o tondũ ũsĩ wusũaa kĩw'ũ!
15Ũĩ waku nĩwamanyĩkie kĩla vandũ ĩũlũ wa nthĩ,
nĩwausũisye nthĩ na nthimo na ndaĩ.
16Nguma yaku nĩyamanyĩkie o na kũvika ithamanĩ syĩ kũasa,
na andũ nĩmakwendete nũndũ wa mũuo waku.
17Mbathi syaku, nthimo, ndeto sya ũĩ, na mosũngĩo maku,
syatumie andũ ma nthĩ syonthe maseng'wa nue.
18 #
1Asu 10.21,27 Ĩsyĩtwanĩ ya Mwĩai Ngai,
ũla wĩtawa Ngai wa Ĩsilaeli,
woombanisye thaavu weethĩa wingĩvĩte ta ĩvulũ,
na woombany'a silĩva weethĩa wingĩvĩte ta kyũma kĩũmu.
19 #
1Asu 11.1
Ĩndĩ nĩwanengie aka mwĩĩ waku,
na watw'ĩka ngombo ya mawendi maku.
20Nĩwaanangie ndaĩa yaku,
na wavukya nzyawa syaku,
nĩwaeteie syana syaku ũsilĩlo,
na waietee kĩĩo nũndũ wa ũtumanu waku.
21 #
1Asu 12.15-20
Ũsumbĩ nĩwaanĩkie kũndũ kwĩlĩ,
andũ ma Evalaimu mambĩĩa ũsumbĩ woo.
22 #
2Sam 7.15
Ĩndĩ o na ũu wĩ o vo, Mwĩai ndaaeka kwĩthĩwa na tei,
na ndaalea kwĩanĩsya maũndũ ala wathanĩte,
ndaaĩtĩkĩla kũvetanga nzyawa sya Ndeviti ũla wanyuvie,
kana kũmina nzyawa sya Ndeviti ũla wamwendete Ngai,
na kwoou nĩwatialilye andũ amwe ma nzyawa sya Yakovo,
na atialya andũ ma mũsyĩ wa Ndeviti.
Leovoamu na Yelovoamu
23Solomoni nĩwakwie,
na atia ũmwe wa ana make asumbĩke vandũ vake,
ĩndĩ mwana ũsu aĩ mũtumanu mũno na ndaĩ na ũmanyi.
Mwana ũsu eetawa Leovoamu.
Ũtongoi wake nĩwatumie andũ mamũlea.
O ta ũu yĩla Yelovoamu mwana wa Nevati wasumbĩkie,
nĩwatumie andũ ma Ĩsilaeli meka naĩ,
na atongoesya andũ ma Evalaimu maatĩĩa nzĩa nthũku.
24Kuma ĩvindanĩ yĩu, naĩ sya andũ nĩsyaingĩvie,
nginya syatuma maumw'a nthĩ yoo.
25Nĩmeekie ũthũku wa kĩla mũthemba,
nginya Mwĩai amakany'a.
Currently Selected:
Sil 47: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011