Sil 45
45
Mwose
1 #
Kuma 6.28—11.10; 20.1-21 Kuma nzyawanĩ sya Yakovo Ngai nĩwanyuvie mũndũ wĩ tei,
ũla wendeeasya andũ onthe,
na wendetwe nĩ Ngai na andũ.
Mũndũ ũsu eetawa Mwose,
ũla andũ mamũlilikanaa na ũtanu.
2Ngai amũnengie ũkumyo wĩana wa alaĩka,
na amũnenga vinya weethĩa nũkũkĩwa nĩ amaitha make.
3Mwose nĩwaneenie, na mothĩny'o mathela,
Mwĩai nĩwatumie asumbĩ manenga Mwose ndaĩa;
nĩwamũnengie mĩao kwondũ wa andũ make,
na amwony'a ũtheu wake mũtisu.
4Mwĩai nĩwamũvathie nũndũ wa ũĩkĩĩku na ũuu wake,
nĩwamũnyuvie kuma andũnĩ onthe.
5Mwĩai nĩwatumie Mwose ew'a wasya wake,
na amũtongoesya amũlikya kĩla kĩvindunĩ kĩkamu;
amũnengie mĩao menene ũthyũ kwa ũthyũ,
mwĩao wa thayũ na ũmanyi,
nĩ kana amanyĩsye nzyawa sya Yakovo ũtianĩo wake;
amanyĩsye Ĩsilaeli motw'ĩo make.
Alũni
6 #
Kuma 4.14
Mwĩai nĩwanyuvie Alũni, mwana-a-inyia wa Mwose,
mũndũ mũtheu ta Mwose, waumĩte mbaĩnĩ ya Livai.
7 #
Kuma 28.1-43
Nĩwaseũvisye ũtianĩo wa tene na tene na Alũni,
na amũtw'ĩkĩthya mũthembi wa andũ make.
Nĩwanengie Alũni ngũa ndaasa ya ndaĩa,
na amwĩkĩa kanzũ ya ndaĩa.
8Ngai amwĩkĩie ngũa sya ndaĩa mbanake,
na amwĩkĩa syĩndũ sya kwonany'a kana nũmũnengete ũtonyi:
Ngũa sya nthĩnĩ, ngũa ndaasa na evoti.
9Ndiivonĩ sya ngũa ndaasa ya Alũni,
nĩvatumĩĩwe makũngũmanga na ngengele mbingĩ sya thaavu,
ikũnanganae yĩla ũendete na wasya wasyo ũyĩw'ĩka Ĩkalũnĩ,
na iituma Ngai alilikana andũ make.
10Mwĩai nĩwanengie Alũni ngũa ntheu,
ĩtumĩtwe na ndii sya thaavu, sya mbuluu na ingĩ sya langi wa nzambalaũ,
ngũa ĩsu yatumĩtwe nĩ mũndũ wĩsĩ kũtuma.
O ta ũu nĩwamũnengie syĩndũ sya kumya ũtw'ĩo, Ulimu na Thumimu,#45.10 Ulimu na Thumimu: Twĩndũ twĩlĩ twatũmĩawa nĩ athembi nĩ kana matavany'e kwenda kwa Ngai; kũyĩsĩkĩwe nesa ũndũ twĩndũ tũu twatũmĩawa.
11na ũlii mũtune mwokothe ũseũvĩtw'e nĩ mũndũ wĩ na ũĩ wa kũseũvya syĩndũ,
na mavia ma thooa mũnene matemeleelwe maandĩko ta mũulĩ,
na makombĩĩwa thaavunĩ nĩ mũndũ ũla ũseũvasya syĩndũ na mavia ma thooa mũnene,
nĩ kana mavia asu matemeleelwe maandĩko,
methĩwe ũlilikany'o wa ũtalo wa mbaĩ sya Ĩsilaeli.
12Alũni aĩ na kĩlaũnĩ kya thaavu ngovianĩ yake,
kyatemeleelwe maandĩko ta mũulĩ mekwasya, “Mũvathe kwondũ wa Mwĩai.”
Kyaĩ kĩlaũnĩ kya mwanya kyaseũvĩtw'e nĩ mũndũ wĩsĩ kũseũvya syĩndũ,
kyaĩ na mawanake maseo na nĩkyendeeasya kwa kũsiw'a.
13Vai mũndũ ũngĩ mbee wa Alũni waaĩthĩwa na syĩndũ mbanake ta isu,
o na vai mũndũ ũngĩ waasyĩkĩa ate o ana make mwene,
na nzyawa syake mavinda onthe.
14Nthembo ila wĩumasya ikavĩvaw'a vyũ,
na ikaumaw'a kelĩ kwa mũthenya mavinda onthe.
15 #
Ali 8.1-36
Mwose nĩwavathie Alũni ethĩwe mũthembi,
na amwĩtĩkĩsya mauta matheu;
ũsu waĩ ũtianĩo wa Ngai na Alũni wa tene na tene,
na wa nzyawa syake tene na tene,
mamũthũkũmae Mwĩai ta athembi,
na kũathimaa andũ ĩsyĩtwanĩ yake.
16Mwĩai nũwanyuvie Alũni katĩ wa andũ onthe amumĩasye nthembo,
atoeeasye ũvani wĩ na mũuke mũseo wĩthĩawe ũlilikany'o,
na kwĩw'anĩthya andũ na Ngai.
17Ngai nĩwanengie Alũni mĩao yake,
amũnenga ũtonyi wa kumasya motw'ĩo na kũsila,
amanyĩasye nzyawa sya Yakovo motw'ĩo make;
amanyĩasye Ĩsilaeli mĩao yake.
18 #
Mot 16.1-35
Andũ amwe mataĩ athembi nĩmavangie kũleana na Alũni,
nĩmamwĩw'ĩie kĩwĩu yĩla maĩ weũnĩ.
Ndathani na Avilamu na andũ moo,
Kola na kĩkundi kyake nĩmamũthatĩie mũno.
19Yĩla Mwĩai woonie ũu ndaaendeew'a,
nĩwathatie mũno na kwoou amamina;
nĩweekie syama amasinda,
na amamina na mwaki wakanĩte.
20Nĩwatumie Alũni ataĩwa mũno mbee,
na amũnenga ũtiĩwa;
kwa kũtw'a athembi manengawe mosyao ma mbee ala maseo,
nĩ kana methĩawe na lĩu mwingĩ.
21Kwoou athembi nĩmaĩsaa nthembo ila syumĩw'e Mwĩai,
ila Mwĩai wanengie Alũni na nzyawa syake.
22 #
Mot 18.20; Kũt 12.12 Ĩndĩ ndaanengwa kĩsio kya nthĩ katĩ wa andũ kĩtw'ĩke ng'ũndũ yake,
nowe e weka katĩ wa andũ onthe ũtaatw'ĩlwa ng'ũndũ,
nũndũ Mwĩai nĩwe kĩlungu kyake na ũtiĩwa wake.
Vineasi
23 #
Mot 25.7-13
Vineasi mwana wa Eleasali nĩwe wa katatũ kwa kũtaĩwa mũno,
nũndũ nĩwendete mũno kũmũkĩa Mwĩai,
nĩkwĩthĩwa nĩwaũngamie na ũlũmu yĩla andũ maleile ũtongoi,
nĩwaũngamie na ũlũmu na ũkũmbaũ,
na eew'anĩthya andũ ma Ĩsilaeli na Ngai.
24Kwoou Mwĩai nĩwaseũvisye ũtianĩo wa mũuo nake,
amũtw'ĩkĩthya mũtongoi wa vandũ va kũthaithĩa na wa andũ make,
nĩ kana we na nzyawa syake methĩawe na ndaĩa ya ũthembi tene na tene.
25O ta ũu Mwĩai nĩwaseũvisye ũtianĩo na Ndeviti mwana wa Yese, wa mbaĩ ya Yuta,
kana mwana ũmwe akatw'ĩkaa mũsumbĩ ĩtina wa ĩthe wake,
ĩndĩ nzyawa sya Alũni ikeethĩawa syĩ athembi.
26Mwĩai nĩamũnenge ũĩ ngoonĩ syenyu,
mumĩasye andũ make ũtw'ĩo wa ũlũngalu,
nĩ kana maikaaeke kũendeea nesa,
na ndaĩa yoo ĩiendeea kwĩthĩawa vo nzyawanĩ syoo syonthe.
Currently Selected:
Sil 45: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011