Sil 44
44
Wathi wa Kũtaĩa Aaũmae Maitũ
1Yu nĩtũtaĩe andũ me nguma,
aaũmae maitũ ma nzyawa syĩ kĩvathũkany'o.
2Mwĩai nĩwamanengie ũkumyo mũnene,
na nĩwoonanisye ũnene wake kuma tene mũno.
3Amwe moo maĩ asumbĩ,
na maĩ nguma nũndũ wa vinya woo;
angĩ moo maĩ atai oĩ,
na maneenaa ndeto sya wathani.
4Angĩ nĩmatongoeasya andũ na motao moo,
nũndũ maĩ na ũmanyi wa kũtongoesya andũ,
maitũmĩa ndeto sya ũĩ ũmanyĩsyonĩ woo.
5Angĩ nĩmatilaa mbathi nzeo,
nĩmatilaa mbathi na kũiandĩka.
6Angĩ maĩ athwii me na syĩndũ mbingĩ,
na nĩmekalaa mĩsyĩnĩ yoo me na mũuo.
7Andũ aa onthe nĩmanengawe ndaĩa nĩ andũ ma ĩvinda yoo,
na maĩ nguma ĩvindanĩ yoo.
8Amwe moo nĩmatiie nguma nene,
na kũvika o na ũmũnthĩ andũ nĩmamakumasya.
9Ĩndĩ kwĩ angĩ moo matalilikanawa,
na moolile weethĩa ti ta maĩ kw'o;
andũ asu mailyĩ ta mataasyawa,
na ũu now'o syana ila matiie syoolile.
10Ĩndĩ andũ aa maatĩĩe nĩmamũkĩaa Ngai,
ala meko moo maseo mataaũla.
11Nĩmatiĩie nzyawa syoo ũthwii woo,
ũtiĩwa ũsu ũkanengwa syana sya syana syoo.
12Nzyawa syoo nĩsyĩanĩasya motianĩo,
na nũndũ woo syana syoo o nasyo niendeeaa kwĩka ũu.
13Nzyawa syoo ikekalaa tene na tene,
na nguma yoo ndĩkola.
14Mĩĩ yoo yathikiwe na mũuo,
na masyĩtwa moo makalilikanawa nzyawanĩ syonthe.
15Andũ makawetaa ũĩ woo,
na ĩkomano ya andũ yĩkatavanasya ndaĩa yoo.
Enoko
16Enoko nĩwamwendeeisye Mwĩai na ooswa ambatw'a ĩtunĩ;
atiĩie nzyawa syonthe ngelekany'o ya kũalyũla ngoo.
Noa
17Noa aĩ mwĩanĩu na mũlũngalu,
ĩvindanĩ ya ũthatu wa Ngai,
nĩwanengie andũ wambĩlĩĩlyo mweũ.
Kwondũ wake nĩvatialile andũ ĩũlũ wa nthĩ,
yĩla kwauie mbua ya kĩw'ũ Kingĩ.
18Ngai nĩwatianĩie na Noa ũtianĩo wa tene na tene,
kana syũmbe ila syĩ thayũ iikaminwa ĩngĩ nĩ mbua ya kĩw'ũ kingĩ.
Avalaamu
19 #
Mwa 15.1—17.27; 22.1-18 Avalaamu aĩ ĩthe mũtaĩe wa mbaĩ mbingĩ,
vai mũndũ o na wĩva waaĩthĩwa na nguma yĩana ta yake.
20Nĩwakwataa mĩao ya Ũla wĩ Ĩũlũ Mũno,
nake Ngai aseũvya ũtianĩo nake.
Avalaamu nĩweekĩie ũvano wa ũtianĩo ũsu mwĩĩnĩ wake,
na yĩla watatiwe, nĩwoonanisye kana aĩ mũĩkĩĩku.
21Kwoou Mwĩai nĩwamwathie kwa wĩvĩto,
kana akaathima mbaĩ syonthe kwĩsĩla nzyawanĩ syake,
akaingĩvya nzyawa syake wĩthĩe syĩana kĩtoo kya nthĩ,
na kwĩthĩwa syĩ mbingĩ ta ndata sya ĩtunĩ,
na kana akamanenga nthĩ yĩthĩwe ũtiĩwa woo kuma ũkanga nginya ũkanga ũla ũngĩ,
na kuma Ũsĩnĩ wa Euvalati nginya kũla nthĩ ĩthelele.
Isaka na Yakovo
22 #
Mwa 17.9; 26.3-5; 27.28; 28.14 O ta ũu Mwĩai nĩwanengie Isaka watho,
nũndũ wa Avalaamu ĩthe wake.
Moathimo ma andũ make onthe na ũtianĩo,
23nĩwainengie Yakovo.
Nĩwalũlũmĩĩlye Yakovo kwa kũmũnenga moathimo make,
na amũnenga ĩla nthĩ yĩthĩwe ũtiĩwa wake,
na amĩaanĩsya mbaĩ ĩkũmi na ilĩ.
Currently Selected:
Sil 44: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011