Sil 43
43
Ũseo wa Syũa
1Ĩtu yonekaa yĩ yanake nũndũ wa ũtheu wayo,
ĩtu nĩyonekaa yĩitisatisa nũndũ wa wanake wayo.
2Yĩla syũa yĩkuma nĩyĩtavanasya yĩendee kwambata,
Kĩu nĩ kĩndũ kya kũseng'ya kyoombiwe nĩ Ũla wĩ Ĩũlũ Mũno!
3Mũthenya katĩ syũa nĩyĩvĩvasya nthĩ ĩkoma,
nũũ ũtonya kũmĩĩsya ũvyũvu wayo?
4Mũndũ aivuvĩĩa ĩiko nũvĩvaw'a nĩ muutĩa wayo,
ĩndĩ syũa yĩvĩvasya iĩma na ũvyũvu mwingĩ mavinda atatũ kũvĩtũka ũsu wa ĩiko;
yumasya mĩthũmũ ya mwaki,
kyeni kyayo kĩmulĩkaa mũndũ akaeka kwona.
5Ngai ũla wayũmbie nĩ mũnene,
Yĩla wayĩaĩa nĩyĩkalaataa kyalonĩ kyayo.
Ũseo wa Mwei
6O ta ũu nĩwoombie mwei, ũla ũtaseleawa,
kũaany'a myei na mavinda me kĩvathũkany'o.
7Mwei nũmanyĩthasya andũ ĩvinda ya mboka ila itw'ĩtwe,
mavinda amwe nĩwumasya kyeni kingĩ na mavinda angĩ ũyumya kyeni kĩnini.
8Mwaka ũtalawa na myei nũndũ wa mwei ũla wĩ matunĩ.
Kwona ũndũ mwei ũendeeaa kũneneva nĩ ũndũ wa kũseng'ya,
wĩthĩawa wonany'o kwa syĩndũ ila syĩ matunĩ,
yĩla wakanĩte wĩ yayayanĩ.
Wanake wa Ndata na Ũtaathi
9Kũtisatisa kwa ndata nĩkwanakavasya yayaya,
nĩ wanake mũseo matunĩ ma Mwĩai.
10Syeeaĩwa nĩ Ũla Mũtheu iũngamaa kwĩanana na mwĩao wake;
iileelaa wĩanĩ wasyo wa kũsyaĩĩsya.
11Sisya ũtaathi na ũitaĩa ũla wawũmbie,
nĩ mwanake mũno na nĩ mũtheu.
12Wĩlingĩlaa matunĩ na kyelenge kyanake,
kĩseũvĩtw'e nĩ moko ma Ũla wĩ Ĩũlũ Mũno.
Moseng'yo ma Syĩndũ ila Syoombiwe
13Ngai nĩwĩaĩaa ĩa na yĩyambĩĩa kwĩtĩka,
nĩwĩaĩaa ũtisi na ũyĩanĩsya ũsilĩlo wake mĩtũkĩ.
14O ta ũu makũmbĩ make nĩmavingũkaa,
na matu nĩmaumaa vo maũlũkĩte ta nyũnyi.
15Vinyanĩ wake mũnene nĩwũmbanasya matu,
na nĩwatũangaa mavia ma mbalavu makatw'ĩka mbua ya mavia.
16Iĩma syamwona nithingithaa,
na kwendanĩ kwake kĩseve kya ngalĩko ya ĩtheo nĩkĩuutanaa.
17Wasya wa kĩtundumo kyake nũkanasya nthĩ,
na now'o kĩuutani kyumĩte ngalĩko ya ĩũlũ na kĩlingi syĩkaa.
Nũnyaĩĩkasya ĩa yĩkatheea ta nyũnyi ikũvũĩla,
yĩkatheea ta ngie iũvũĩla.
18Andũ nĩmaseng'aa moona wanake wa weũ wa ĩa,
nĩmaseng'aa moona ũndũ yĩtheeaa nthĩ.
19Ngai nĩwonoasya mũumbĩ wĩ ĩa ĩũlũ wa nthĩ ũkethĩa ũilyĩ mũnyũ,
mũumbĩ ũsu wathitha na kũma wĩthĩawa ũilyĩ ta mĩw'a myũĩ.
20Kĩseve kĩthithu kuma ngalĩko ya ĩũlũ nĩkĩuutanaa,
na kĩituma kĩw'ũ kyũma kĩkatw'ĩka ĩa,
kĩla ndia ya kĩw'ũ nĩvw'ĩkawa nĩ ĩa,
kĩw'ũ kĩvw'ĩkawa nĩ ĩa ta ngao ya kĩthũi.
21Ngai nũvĩvasya iĩma na aivĩvya weũ,
na nĩwũmasya nyeki ĩla mbĩũ ĩkekala ta ĩvĩvĩtw'e nĩ mwaki.
22Ĩndĩ mũumbĩ nũtumaa syĩndũ syonthe iseũva ĩngĩ mĩtũkĩ,
yĩla kwathitha na ĩmwe yooka.
23Ngai nĩwatũmĩie ũĩ wake kũvindĩthya ũkanga mũnene,
na nĩweekĩie ithama ũkanganĩ nthĩnĩ.
24Andũ ala mesĩlaa ũkanganĩ na meli nĩmawetaa mĩisyo ĩla yĩ vo,
na tweew'a ngewa syoo nĩtũseng'aa.
25Ũkanganĩ kwĩ syũmbe isaanĩtye na sya kũseng'ya,
kwĩ nyamũ sya kĩla mũthemba, na imwe nene mũno.
26Ngai nũtumaa atũmwa make maendeea nesa,
na syĩndũ syonthe ikwatanĩtw'e nĩ ndeto yake.
27Nĩtũtonya kũneena maũndũ maingĩ mũno,
ĩndĩ tũitonya kũmaweta onthe;
kwa ũkuvĩ twĩasya atĩĩ, “We nĩwe syĩndũ syonthe.”
28Twĩumya va vinya wĩanĩe wa kũmũtaĩa?
Nĩkwĩthĩwa nĩwe mũnene kwĩ syĩndũ syonthe ila woombie.
29Mwĩai nĩwaĩlĩte kũkĩwa na nĩ mũnene mũno vyũ,
na ũtonyi wake nĩ wa kũseng'ya.
30O na wamũtaĩa Mwĩai mũno ũndũ ũtonya,
nĩ mũnene mũno ũkethĩa ndũtonya kũmũtaĩa ũndũ waĩlĩte.
O na wamũkumya Ngai na vinya waku w'onthe ũtekũnoa,
ndwĩsa kũmũtaĩa ũndũ waĩlĩte.
31Ve mũndũ waamwona nĩ kana atũelesye ũndũ ũilyĩ?
Ve mũndũ ũtonya kũmũkumya mũno ũndũ vaĩlĩte?
32Ve moseng'yo matiele manene kwĩ aa,
nũndũ twonete syĩndũ mbũthũ katĩ wa ila woombie.
33Mwĩai mwene nĩwe woombie syĩndũ syonthe,
na anenga andũ ala mamũkĩaa ũĩ.
Currently Selected:
Sil 43: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011