Sil 42
42
Maũndũ ala Ũtaĩlĩte Kwĩw'ĩa Nthoni
1Aa nĩmo maũndũ ala ũtaĩlĩte kwĩw'ĩa nthoni,
na ndwaĩlĩte kũvĩtya nũndũ wa kũkĩa andũ:
2Ndũkew'e nthoni yĩla ũkũatĩĩa mĩao ya Ũla wĩ Ĩũlũ Mũno na ũtianĩo wake,
kana yĩla ũkũmũtw'ĩĩa mũndũ ũtakĩaa Ngai kwĩthĩwa ndekĩte ĩvĩtyo.
3Ndũkew'e nthoni kwia ũtalo wa mbesa syaku,
wĩ na mũndũ ũla wĩ ngwatanĩo nake kana mũendanĩtye kyalo,
kana kũaana ũtiĩwa na anyanyau.
4Ndũkew'e nthoni kũtũmĩa ithimi sya w'o,
kana kũkwata ũtandĩthyo, o na ethĩwa nĩ mũnene kana nĩ mũnini.
5Ndũkew'e nthoni kũkany'a syana syaku,
kana kũkũna ngombo nthũku nginya nthakame yĩtĩke.
6Ethĩwa kĩveti kyaku kĩitonya kũĩkĩĩwa, kĩvithe maũndũ maku,
na vala ve andũ aingĩ, vingĩa syĩndũ syaku.
7Syĩndũ syonthe ila ũũnengane italae na kũithima,
andĩkaa ũtalo wa syĩndũ syonthe ila wakwata kana wanengane.
8Ndũkew'e nthoni kũmanyĩsya mũndũ ũte kĩlĩko kana ndia,
kana mũtumĩa mũkũũ ũla ũmanyanaa kĩ-mwĩĩ na malwaya.
Weeka ũu andũ makamanya nesa kana wĩ na ũmanyi,
naku ũkeetĩkĩlwa nĩ andũ onthe.
Eĩtu na Aaĩthe Moo
9 #
Sil 7.24-25; 26.10-11 Mwĩĩtu o na atesĩ nũtumaa ĩthe atakoma,
kĩũũyũ kĩla ũmũnengae nĩkĩtumaa aĩwa nĩ too.
E wa mũika, ĩthe ethĩawa na w'ĩa ayona ta ũtakatwawa,
na atwawa, ethĩawa na w'ĩa ayona ta ũtonya kũmenwa.
10Ethĩwa ndaamanyana kĩ-mwĩĩ na aũme, ĩthe ethĩawa na w'ĩa ayona ta ũtonya kũvukw'a,
na aisyaĩa vau kwake.
Ethĩwa e na mũũme, ĩthe ethĩawa na w'ĩa ayona ta ũtonya kũtia mũũme,
kana ta ũtonya kwĩthĩwa e ngũngũ.
11Ethĩwa mwĩĩtu waku nĩ mbaa matũ, mũsisye mũno,
ndakatume ũthekeewa nĩ amaitha maku,
wĩthĩe ũneeneawa naĩ nĩ andũ ma ndũa yonthe na kũsukwa,
na aikwĩkĩĩthya nthoni andũnĩ aingĩ.
12Ndũkamũeke ony'e mũndũ-ũme o na wĩva wanake wake,
na ndũkamũeke aeae ngewa na aka atwae.
13O tondũ tũsamũ tũthũku twanangaa ngũa,
now'o aka manangaa ala angĩ.
14Nĩ kavaa ũthũku wa mũndũ-ũme kũte ũseo wa mũndũ mũka;
aka nĩmo maetae nthoni na kĩvũthya.
Ũnene wa Ngai Syĩndũnĩ ila Woombie
15Yu nĩngũũlilikany'a mawĩa ma Mwĩai,
na nĩngũũtavya kĩla nonete.
Mwĩai aneenaa ndeto na mawĩa make mayĩkĩka,
na syũmbe syonthe nĩsyĩkaa kwenda kwake.
16O tondũ syũa yaaa na kũmulĩka syĩndũ syonthe,
now'o wĩa wa Mwĩai wusũĩte ũkumyo wake.
17Mwĩai ndaanenga alaĩka vinya,
wa kũtavany'a mawĩa make onthe ma ũseng'yo,
ala Mwĩai Mwene Ũtonyi W'onthe wambĩlĩĩlye,
nĩ kana ĩtu na nthĩ syĩkalae syĩ ndũmu ũkumyonĩ wake.
18Nũmanyaa maũndũ ala me kũndũ kũla kũliku na ala me ngoonĩ sya andũ,
na nĩwĩsĩ mĩvango yoo mĩthũku;
nũndũ Ũla wĩ Ĩũlũ Mũno nĩwĩsĩ maũndũ onthe ala matonya kũmanyĩka,
na nĩwĩsĩ mawonany'o ma mavinda.
19Nũtavanasya maũndũ ala meethĩiwe na ala makethĩwa,
na nũvuanasya maũndũ ala mavithe.
20Vai ũndũ andũ masũanĩa akalea kũmanya,
vai ndeto o na ĩmwe mbithany'e kwake.
21Nũvangĩte nesa syĩndũ sya kũseng'ya ila woombie na ũĩ wake,
we ekalaa kuma tene kũvika tene na tene.
Vai kĩndũ ũtonya kwongelwa kana kũolwa,
na nde na vata wa mũndũ o na ũmwe atw'ĩke mũtai wake.
22Mawĩa make onthe nĩ ma kwendeesya!
Andũ mamasisya monaa maitisatisa!
23Syĩndũ isu syonthe syĩ vo na syĩkalaa tene na tene,
na o na kũilyĩ ata syonthe nimwĩw'aa.
24Syũmbe syonthe syoombiwe ilĩ ilĩ,
kĩla kĩmwe kĩtailyĩ kĩla kĩngĩ,
na vai kĩmwe waaũmba kĩte kĩanĩu.
25Kĩla kĩmwe kyongelaa ũseo wa kĩla kĩngĩ.
Nũũ ũtonya kwĩany'a kũsisya ũkumyo wake?
Currently Selected:
Sil 42: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011