Sil 41
41
Kĩkw'ũ
1Kwa mũndũ ũla wĩkalaa e mũuonĩ na syĩndũ syake,
kana ũla wĩkalaa atekũũya na aendee nesa maũndũnĩ make onthe,
na wĩ na vinya wa kũtanĩa lĩu wake,
kũlilikana kĩkw'ũ kwĩthĩawa kwĩ ũndũ wĩ woo mũno.
2Ĩndĩ kwa mũndũ ũla ũte na kĩndũ na mwonzu,
kana ũla mũkũũ mũno na ũkũũya nũndũ wa maũndũ maingĩ,
ũla ũte na ũtanu na ũtatonya kũmĩĩsya,
onaa ũtw'ĩo wa kĩkw'ũ ta ũndũ ũseo.
3Ndũkakĩe ũtw'ĩo wa kũkw'a;
lilikana ala maĩ kw'o mbee waku na ala makoka ĩtina waku.
4Ũũ nĩw'o ũtw'ĩo ũla Mwĩai watw'ĩĩie syũmbe syonthe,
kwoou nĩkĩ ũũleana na kwenda kũseo kwa Ũla wĩ Ĩũlũ Mũno?
O na wekala thayũ wa myaka ĩkũmi kana ĩana kana ngili,
ndũkakũlw'a ũasa waw'o wathi vala maveva ma ala akw'ũ mekalaa.
Ĩtuvi ya Andũ ala Athũku
5Syana sya eki ma naĩ syĩthĩawa syĩ ũthatyo,
na kĩla ĩvinda niendaa mawĩkalonĩ ma ala matamũkĩaa Ngai.
6Ũtiĩwa wa syana sya eki ma naĩ ũkathela,
na nzyawa syoo ikavũthw'a kĩvũthya kĩtakathela.
7Syana ikatũla mũtĩ ĩthe wasyo ũla ũtamũkĩaa Ngai,
nĩkwĩthĩwa nivũthĩtw'e nũndũ wake.
8Kyeva nĩ kwenyu inyw'ĩ andũ ala mũtamũkĩaa Ngai,
ala mũtiĩte mwĩao wa Ngai Ũla wĩ Ĩũlũ Mũno!
9Yĩla mwasyawa, mũsyaawa mwĩ aumanĩe,
na yĩla mũkũkw'a, kĩumo kĩu nĩkyo kĩthĩawa ũtiĩwa wenyu.
10O tondũ syĩndũ syonthe ila syumaa mũthanganĩ isyokaa mũthanganĩ,
now'o andũ ala matamũkĩaa Ngai maumaa kĩumonĩ makathi wanangĩkonĩ.
11Andũ nĩmaĩaa nũndũ wa andũ moo ala makw'a,
ĩndĩ ĩsyĩtwa ĩthũku ya eki ma naĩ yĩikalilikanwa.
12Sũvĩa ĩsyĩtwa yaku nũndũ wakw'a,
yĩkalilikanawa ĩvinda ĩasa mbee wa thaavu mwingĩ wiĩtwe vandũ.
13Mĩthenya ĩla mũndũ wĩthĩawa na ũtanu nĩ mĩvũthũ,
ĩndĩ ĩsyĩtwa ĩseo nĩyĩkalaa tene na tene.
Maũndũ ala Matumaa Mũndũ Ew'a Nthoni
14Inyw'ĩ syana syakwa, kwatai momanyĩsyo makwa na mũkekalaa na mũuo.
Ũĩ mũvithany'e na ũthwii ũtemwonany'e syĩ vata mwaũ?
15Nĩ kavaa mũndũ ũla ũvithaa ũtumanu wake,
kũte ũla ũvithaa ũĩ wake.
16Kwoou, nenga ndaĩa ndeto ila ngũũtavya,
nũndũ ve maũndũ mataĩlĩte kũtuma mũndũ ew'a nthoni,
na ti kĩla ũndũ wĩtĩkĩlawa nĩ andũ onthe.
17Ĩw'aa nthoni wĩ mbee wa asyai maku ethĩwa nĩwĩkĩte naĩ ya ũlaalai,
na wĩ mbee wa mũtongoi kana mũsumbĩ ethĩwa nĩwakengana.
18Ĩw'aa nthoni wĩ mbee wa mũsili kana ũla ũtusaa makoani ethĩwa nĩwĩkĩte ĩvĩtyo,
na wĩ mbee wa ĩkomano ya andũ ethĩwa nĩwĩkĩte ũndũ ũtaĩlĩte.
19Ĩw'aa nthoni wĩ mbee wa mũnyanyau kana mũndũ mwĩ ngwatanĩo ũndũnĩ,
ethĩwa nũtũmĩĩte nzĩa ya ũkengani,
na wĩ mbee wa atũi maku ethĩwa nĩwũyĩte.
20Ĩw'aa nthoni nũndũ wa kwĩthĩwa ũte mũĩkĩĩku kwa Ngai na ũtianĩo wake,
na ĩw'aa nthoni yĩla weethĩwa na mwĩkalo wa ĩtomo ĩvindanĩ ya kũya.
21Ĩw'aa nthoni yĩla weethĩwa wĩ mũtoonu mũndũ akũvoya kĩndũ,
na yĩla wakilĩlya mũndũ akũkethya.
22Ĩw'aa nthoni nũndũ wa kũsisya ĩlwaya,
na nũndũ wa kũlea kũtethya mũndũ wa mũsyĩ wenyu.
23Ĩw'aa nthoni nũndũ wa kũvena mũndũ syĩndũ syake,
na nũndũ wa kũketeea mũka wa mũtũi waku.
24Ĩw'aa nthoni nũndũ wa kũmũtata mũthũkũmi mũndũ mũka wa mũtũi waku,
o na ndũkathengee kĩtanda kyake.
25Ĩw'aa nthoni nũndũ wa kũumana yĩla wĩ na anyanyau,
na wanenga mũndũ mũthĩnzĩo ndũkasyoke kũmũtavya ndeto nthũku.
26Ĩw'aa nthoni nũndũ wa kũsyokea kũweta kĩla weew'a,
na nũndũ wa kumĩlya syĩmbithĩ sya andũ.
27Isu nĩsyo nthoni sya w'o,
na andũ makakũnenga ndaĩa nũndũ wa ũu.
Currently Selected:
Sil 41: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011