Sil 40
40
Thĩna wa Thayũ wa Mũndũ
1Kĩla mũndũ anengetwe wĩa mũito atethye,
na nzyawa sya Atamu nĩsilĩĩlĩtwe mũio mũito,
kuma mũthenya ũla mũndũ wasyaiwe,
nginya yĩla ũkasyoka mũthanganĩ ũla nĩw'o nyinyia wa andũ onthe.
2Ngoo sya andũ syusũĩte kũsaanĩw'a,
w'ĩa na kĩũũyũ nũndũ wa mũthenya wa kĩkw'ũ,
3kuma mũsumbĩ ũla wĩkalĩle kĩvĩla kya kĩ-ũsumbĩ kya ndaĩa,
kũvika ngya ĩla yĩkalaa kĩtoonĩ na mũunĩ,
4na kuma mũndũ ũla wĩkĩaa ngũa ĩilyĩ ta ndune na ngovia ya kĩ-ũsumbĩ,
kũvika mũndũ ũla wĩkĩĩte ngũa ngaamu sya makunia.
5Onthe me na ũthatu na kĩwĩu, kĩthokoo na kũsaanĩw'a,
kũkĩa kĩkw'ũ, ũmaitha na ĩteta.
O na ũtukũ mũndũ akomete kĩtandanĩ kyake,
too wake nũvũavũanasya mesilya make.
6Akwataa too mũnini kana akaĩwa nĩ too vyũ,
na yĩla wakoma athĩnaa o tondũ ũkũthĩnaa mũthenya.
Nũthĩnaw'a nĩ mawoni ala mamũkĩaa kĩlĩkonĩ kyake,
ũkethĩa ailyĩ ta mũndũ ũsembete aumĩte kaũnĩ.
7Kavinda kala ũkũvonokw'a nũamũkaa,
na kũseng'a eethĩa ekĩaa vathei.
8Kwa syũmbe syonthe, andũ na nyamũ,
na mavinda mũonza kwa ene naĩ,
9vethĩawa kĩkw'ũ na kwĩtĩkya nthakame, kũemanwa na kaũ,
mĩisyo, yũa, mathĩna na mowau mathũku.
10Mathĩna aa onthe moombiwe kwondũ wa ala athũku,
na nũndũ woo nĩkwookie ĩla mbua ya kĩw'ũ kingĩ.
11Syĩndũ syonthe ila syumĩte mũthanganĩ isyokaa mũthanganĩ,
o tondũ nakyo kĩw'ũ kĩsyokaa ũkanganĩ.
Ĩtuvi ya Naĩ
12Meko onthe ma kũnengane ĩtuvi ya wendeesyo na ma kũthĩny'a andũ makavetwa,
ĩndĩ maũndũ ala mekĩtwe kwa ũĩkĩĩku makekala tene na tene.
13Ũthwii wa andũ athũku ũkathela ũndũ ũsĩ ũng'alaa,
ũkaomboka na kĩlitũko ta kya kĩtundumo kwĩ mbua nene.
14O tondũ mũndũ mũlau wĩthĩawa na kĩtumi kya kũtana,
now'o nake ũla ũtũlaa mĩao ũkaminwa vyũ.
15Syana sya andũ ala matakĩaa Ngai iikethĩwa na ũsyao mwingĩ,
iilyĩ ta mĩi ĩte na vinya ĩvianĩ ĩthei.
16Makangaa mameete ũtee wa ĩia kana ũsĩ,
makakũwa mbee wa nyeki ila ingĩ syonthe.
17Kwĩka andũ nesa kũilyĩ ta mũũnda mũseo wusũĩte moathimo,
na kũtethya ngya kũkekala tene na tene.
Maũndũ Amwe nĩ Maseo kwĩ angĩ
18Kwa mũndũ ũla wĩ na syĩndũ syake sya kũtũmĩa,
na ũla ũthũkũmaa na kĩthito, thayũ nĩ wa kwendeesya,
ĩndĩ mũndũ ũla wĩthĩaa ũthwii mũvithe e vaseo mbee woo.
19Mũndũ akwata syana na ayaka ndũa nĩwĩthĩawa na nguma,
ĩndĩ kũkwata ũĩ nĩ kũseo mbee wa maũndũ asu elĩ.
Mũndũ e na ng'ombe mbingĩ na mĩũnda ya mĩsavivũ nũmanyĩkaa mũno,
ĩndĩ nĩ ũseo mbee mũndũ kwĩthĩwa na kĩveti kĩtaweteka ĩvĩtyo.
20Ndivai na mbathi nitanĩthasya ngoo,
ĩndĩ kwenda ũĩ nĩ kũseo mbee wasyo.
21Mũtũlilũ na ngitaa nene nĩsyumasya wasya mũseo,
ĩndĩ mũndũ ayina na wasya mũseo nĩwendeeasya mbee wasyo.
22Metho nĩmendeeaw'a nĩ wũmbe na wanake wa mũndũ,
ĩndĩ nĩmendeeaw'a mũno mbee nĩ kwona lĩu mũmeu mũũndanĩ.
23Mũnyanyae wa mũndũ kana mwana-a-inyia nĩ ma vata mũno,
ĩndĩ mũndũ kwĩthĩwa na mũka wake nĩ ũndũ wĩ vata mbeange.
24Ana-a-inyia ma mũndũ na atetheesya make methĩawa me ma vata ĩvindanĩ ya thĩna,
ĩndĩ kũtethya ngya nĩkũtangĩĩaa mũndũ nesa kwĩ mo.
25Mũndũ e na thaavu na silĩva nitumaa ew'a e ũsũvĩonĩ,
ĩndĩ ũtao mũseo nĩ wa vata mũno mbee wasyo.
26Mũndũ e na mbesa na e na vinya ethĩawa na wĩkwatyo,
ĩndĩ kĩkĩo kya Mwĩai kĩ vata mũno mbee wasyo.
Mũndũ e na kĩkĩo kya Mwĩai ndanyivĩawa nĩ kĩndũ;
mũndũ e nakyo ndethĩawa na vata wa kwĩtya ũtethyo.
27Kũmũkĩa Mwĩai kũilyĩ ta mũũnda wa ũathimo,
na kũsũvĩaa mũndũ mbee wa syĩndũ ila ingĩ syonthe.
Kĩmanyĩo kya Kũvoya Syĩndũ
28Mwana wakwa, ndũkekale thayũ wa kũvoya andũ syĩndũ,
nĩ kavaa ũkakw'a kũte kwĩthĩwa wĩ mũvoyi.
29Mũndũ ũla wĩkwatasya ũngĩ amũnengae lĩu,
ekalaa thayũ ũtatalwa ta thayũ.
Yĩla mũndũ ũsu ũkũya lĩu wa andũ angĩ nĩwĩyaĩasya ndaĩa,
ĩndĩ mũndũ mũmanyĩsye nesa na wĩ na kĩlĩko nĩwĩsiĩĩaa ndakeke ũu.
30Kwa mũndũ ũte nthoni kũvoya ũtethyo nĩ ũndũ mũseo,
ĩndĩ ĩtina ũndũ ũsu ũtw'ĩkaa ta mwaki wakanĩte ĩvunĩ yake.
Currently Selected:
Sil 40: KAMBA
Highlight
Copy
Compare
Share
Want to have your highlights saved across all your devices? Sign up or sign in
BIBLE SOCIETY OF KENYA © 2011